1Pe 3 | KaaIBT22L | STEP

‏ 1 Peter 3

Erli-zayıplılarǵa aqıl-násiyatlar

1 – 2 Háy hayallar, Masiyx Qudayǵa boysınǵanday, sizler de kúyewlerińizge boysınıńlar. Sonda olardıń geybirewleri Qudaydıń sózine qulaq aspasa da, sizlerdiń Qudaydan qorqıp, pák ómir súrip atırǵanıńızdı kórip, sózlerińiz arqalı emes, al siz, hayallardıń úlgili ómirińiz arqalı qolǵa kirgizilip, iseniwshi boladı. 3 Sulıwlıǵıńız tek sırtqı bezeniwlerden: áshekóylengen shashlar, taǵılǵan altınlar hám sánli kiyimlerden ǵana ibarat bolmasın. 4 Al sulıwlıǵıńız sırlı bolǵan ishki dúnyańızdan, yaǵnıy jumsaq hám tınısh bolǵan joǵalmaytuǵın ruwxıy gózzallıqtan ibarat bolsın. Bul Quday aldında júdá qımbatlı. 5 Ótmishte Qudaydan úmit etken muxaddes hayallar da óz kúyewlerine boysınıp, usılay bezengen. 6 Solardıń biri Sara da óz kúyewi Ibrayımdı «xojayınım» dep atap ^{▼▼ Jar 18:12.}, oǵan boysındı. Eger sizler de jaqsılıq islep, hesh qanday qorqınıshqa berilmeseńiz, Saranıń qızları bolasızlar.

7 Háy kúyewler, sol sıyaqlı sizler de hayallarıńızdı jaqsı túsinip jasańlar. Olardıń názik ekenin hám máńgilik ómirdi sizler menen birge miyras etip alatuǵının bilip, olardı húrmet etińler. Solay etseńiz, duwa etkenińizde tosqınlıq bolmaydı.

Haqıyqatlıq ushın azap shegiw

8 Juwmaqlastırıp aytqanda, hámmeńiz bir niyet penen birlesińler. Basqalardıń quwanısh hám qayǵısın bólisińler. Bir-birińizdi tuwısqanlarsha súyińler. Qayırqom hám kishipeyil bolıńlar. 9 Jamanlıqqa jamanlıq, ǵarǵısqa ǵarǵıs penen juwap qaytarmańlar. Kerisinshe, jaqsılıq penen juwap qaytarıńlar. Sebebi sizler Qudaydıń jarılqawın miyras etip alıw ushın shaqırılǵansızlar. 10 «Kim de kim ómirden zawıqlanıp,
Jaqsı kúnler keliwin qálese,
Tilin jaman sózden, awzın ótirik sóz aytıwdan tıysın.
11 Jamanlıqtan qashıp, jaqsılıq islesin.
Tınıshlıqqa umtılıp, soǵan kúsh salsın.
12 Óytkeni Jaratqan Iyeniń kózi haq adamlarda,
Qulaǵın túrer olardıń jalbarınıwlarına.
Biraq Jaratqan Iye jamanlıq qılatuǵınlarǵa qarsı shıǵar». ^{▼▼ Zab 33:13-17.}

13 Jaqsılıq islewge intalı bolsańız, kim sizlerge jamanlıq isleydi? 14 Haq islerińiz ushın azap shegip atırǵan bolsańız, sizler baxıtlısızlar! Adamlardıń qorqıtqanınan qorqpańlar hám qáweterlenbeńler. 15 Masiyxtı «Iyemiz» dep, júregińizde ayrıqsha qásterleńler. Sizlerdegi úmit haqqında soraǵan hár bir adamǵa juwap beriwge hámme waqıt tayar bolıńlar. 16 Degen menen, bunı múláyimlilik penen, húrmet kórsetip isleńler. Masiyxqa tiyisli bolǵan sizlerdiń jaqsı júris-turısıńızdı jamanlap mazaq etetuǵınlar uyalıp qalıwı ushın, hújdanıńızdı taza tutıńlar. 17 Jaqsılıq etip azap shegiw Qudaydıń qálewi bolsa, bul jamanlıq islep azap shegiwden jaqsıraq.

18 Masiyxtıń Ózi de haq bola tura, nahaqlar ushın azap shekti. Ol bizlerdi Qudayǵa alıp keliw ushın, gúnalarımız ushın bir mártebe qurban boldı. Denesi óltirilse de, Ol ruwxta tirildi. 19 Ol, hátte, qamaqta bolǵan ruwxlarǵa da barıp, Óz jeńisin járiyaladı. 20 Áyyemgi waqıtları Nuxtıń zamanında keme soǵılǵanda, Quday adamlardıń táwbe etiwin sabırlılıq penen kútse de, olar Oǵan boysınbaǵan edi. Sol kemege az ǵana adam, yaǵnıy segiz adam minip, suwdan qutqarıldı ^{▼▼ Jar 6–8.}. 21 Bul – Iysa Masiyxtıń qayta tiriliwi arqalı házir sizlerdi qutqaratuǵın suwǵa shomıldırılıwdıń tımsalı. Suwǵa shomıldırılıw deneni kirden tazalaw emes, al Qudaydan pák hújdan soraw degendi bildiredi. 22 Masiyx aspanǵa kóterilip, Qudaydıń oń jaǵında otır ^{▼▼ Zab 109:1.}. Oǵan perishteler, aspandaǵı biylewshiler hám kúsh iyeleri boysındı.