1Pe 5 | KaaIBT22L | STEP | Arańızdaǵı jámáát aqsaqallarına olarday jámáát aqsaqalı bolǵan men, Masiyxtıń shekken azaplarınıń gúwası hám Ol qaytıp kelgende ashıq kórinetuǵın saltanatınıń sheriklesi sıpatında mınalardı ótinish etemen:

‏ 1 Peter 5

Jámáát aqsaqalları hám jasları

1 Arańızdaǵı jámáát aqsaqallarına olarday jámáát aqsaqalı bolǵan men, Masiyxtıń shekken azaplarınıń gúwası hám Ol qaytıp kelgende ashıq kórinetuǵın saltanatınıń sheriklesi sıpatında mınalardı ótinish etemen: 2 Qudaydıń sizlerge tapsırǵan súriwin májbúriy túrde emes, al shın kewilden, Qudaydıń erkine say qılıp baǵıńlar. Bunı aqsha ushın paydakúnemlik penen emes, al óz qálewińiz benen isleńler. 3 Ózlerińizge tapsırılǵan adamlarǵa ústemlik etpey, súriwge úlgi bolıńlar. 4 Solay etseńiz, bas Shopan kelgende, sónbeytuǵın ullılıq tajın alasızlar.

5 Háy jaslar, sol sıyaqlı sizler de aqsaqallarǵa boysınıńlar. Hámmeńiz bir-birińiz benen kishipeyil qatnasta bolıńlar. Sebebi: «Quday menmenlerge qarsı turadı,
Biraq kishipeyillilerge Óz miyrimin beredi». ^{▼▼ Hkm 3:34.}

6 Sonlıqtan ózlerińizdi Qudaydıń qúdiretli qolı astında pás tutıńlar. Sonda belgilengen waqıt kelgende, Ol sizlerdi mártebeli etedi. 7 Barlıq ǵam-táshiwishlerińizdi Oǵan tapsırıńlar. Óytkeni Ol sizlerge ǵamxorlıq qıladı.

8 Saq hám sergek bolıńlar. Dushpanıńız shaytan kimdi jutsam eken dep, aqırǵan arıslanday bolıp gezip júr. 9 Isenimde bekkem bolıp, shaytanǵa qarsı turıńlar. Sebebi dúnyanıń basqa jerlerindegi tuwısqanlarıńızdıń birdey azap shegip atırǵanınan xabarıńız bar. 10 Pútkil miyrimniń tiykarı bolǵan Quday sizlerdi Iysa Masiyx arqalı Óziniń máńgilik saltanatına shaqırdı. Qısqa ómirińizde azap shegip atırǵan bolsańız da, Ol sizlerdi jetilistiredi, bekkemleydi, kúsh-quwat beredi hám tıyanaqlı qıladı. 11 Qúdiret máńgi-baqıy Onıki bolsın! Awmiyin.

Sońǵı sálemnama

12 Men sizlerge usı qısqasha xatımdı ózim isenimli tuwısqanım dep esaplaytuǵın Silaǵa ^{▼▼ Sila – grekshe tekstte bul attıń basqa variantı Silvanus.} jazdırıp atırman. Sizlerdi jigerlendirip, bul xatta aytqanlarımnıń Qudaydıń haqıyqıy miyrimi ekeni haqqında gúwalıq beremen. Usı miyrim menen bekkem turıńlar.

13 Sizler menen birge tańlanǵan Babilondaǵı ^{▼▼ Babilon – Rim názerde tutılǵan.} iseniwshiler jámááti hám tutınǵan ulım Mark sizlerge sálem aytıp atır. 14 Bir-birińizdi súyispenshilik penen súyip, sálemlesińler.

Masiyxqa tiyisli bolǵan sizlerdiń hámmeńizge tınıshlıq yar bolsın!