1Sa 1 | KaaIBT22L | STEP | Efrayımnıń tawlı úlkesiniń Rama qalasında Efrayım urıwınıń Suf tiyresinen bolǵan Elqana degen bir adam jasaytuǵın edi. Ol Suftıń quwlıǵı, Toxudıń shawlıǵı, Elihudıń aqlıǵı hám Eroxamnıń ulı edi.

‏ 1 Samuel 1

Samueldiń tuwılıwı

1 Efrayımnıń tawlı úlkesiniń Rama qalasında Efrayım urıwınıń Suf tiyresinen bolǵan Elqana degen bir adam jasaytuǵın edi. Ol Suftıń quwlıǵı, Toxudıń shawlıǵı, Elihudıń aqlıǵı hám Eroxamnıń ulı edi. 2 Elqananıń Xanna hám Peninna atlı eki hayalı bar edi. Peninnanıń balaları boldı, al Xanna qursaq kótermedi. 3 Elqana Álemniń Jaratqan Iyesine sıyınıp, Oǵan qurbanlıq beriw ushın hár jılı óz qalasınan Shiloǵa baratuǵın edi. Ol jerde Eliydiń eki ulı Xofniy hám Pinexas Jaratqan Iyeniń ruwxaniyleri edi. 4 Elqana qurbanlıq shalǵan kúni hayalı Peninnaǵa hám onıń ul-qızlarına payların bergende, 5 Xannaǵa jaqsı jerinen pay beretuǵın edi. Sebebi Quday Xannanı násilsiz qılıp qoyǵan bolsa da, Elqana onı súyetuǵın edi. 6 Biraq Peninna Jaratqan Iyeniń perzent bermegenin kúndesiniń betine basıp, oǵan bárqulla azap beretuǵın edi. 7 Bul hár jılı dawam etti. Xanna Jaratqan Iyeniń Úyine hár kelgende, kúndesi oǵan azap beretuǵın edi. Al ol jılap, hesh nárse jemeytuǵın edi. 8 Sonda kúyewi Elqana oǵan: «Xanna, nege jılaysań, nege awqat jemeyseń? Nege bunshama qayǵılısań? Men sen ushın on uldan artıq emespen be?» – deytuǵın edi.

9 Bir kúni olar Shiloda iship-jep bolǵannan keyin, Xanna ornınan turdı. Sonda ruwxaniy Eliy Jaratqan Iyeniń Ibadatxanasınıń kirer awzındaǵı óz orınlıǵında otır edi. 10 Xannanıń júregi qayǵıǵa tolıp, óksip jılawı menen Jaratqan Iyege duwa etti. 11 Ol bılay dep wáde berdi:

«Álemniń Jaratqan Iyesi! Eger Sen qulıńnıń qayǵısına názer salıp, meni eske alsań hám Óz qulıńdı umıtpay, oǵan bir ul sıylasań, men onı ómir boyı Saǵan baǵıshlayman. Onıń basına hesh qashan páki tiymeydi».

12 Xanna Jaratqan Iyege usılay duwa etiwin dawam etip turǵanda, Eliy onıń awzın gúzetip otırdı. 13 Xanna ishinen duwa etkenlikten, onıń tek erinleri jıbırlap turdı, al dawısı esitilmedi. Sol sebepten Eliy onı más dep oylap qaldı. 14 Eliy oǵan:

– Máskúnemlikti qashanǵa shekem dawam eteseń? Ishkendi toqtat, – dedi.

15 Sonda Xanna Eliyge:

– Yaq, mırzam, olay emes. Men bir qayǵıǵa batqan hayalman. Men sharap ta, ótkir ishimlik te ishken joqpan. Tek júregimdegi qayǵımdı Jaratqan Iyege tógip atırman. 16 Qulıńızdı uyatsız hayal dep oylamańız. Qayǵı-hásiretim kúshli bolǵanlıqtan, usı waqıtqa deyin jalbarınıp turman, – dep juwap berdi.

17 Sonda Eliy oǵan:

– Aman-esen qayta ber. Izraildıń Qudayı tilegińdi orınlasın, – dedi.

18 Xanna oǵan:

– Maǵan kewlińiz tolsın, – dedi de, óz jolına tústi. Sońınan ol awqatlandı, onıń júzi de burınǵıday qayǵılı bolmadı. 19 Olar erteńine azanda erte turıp, Jaratqan Iyege sıyınǵannan soń, Ramadaǵı óz úyine qaytıp keldi. Elqana hayalı Xanna menen jaqınlastı hám Jaratqan Iye Xannanı esine aldı. 20 Xanna hámiledar bolıp, waqtı kelgende ul tuwdı. Xanna: «Men onı Jaratqan Iyeden tilep alǵanman», – dep oǵan Samuel ^{▼▼ Samuel – «Quday esitti» degen mánisti bildiriwi múmkin.} dep at qoydı.

Xannanıń Samueldi Qudayǵa baǵıshlawı

21 Elqana Jaratqan Iyege jıllıq qurbanlıǵın hám wáde etip ataǵan qurbanlıǵın beriw ushın pútkil xojalıǵı menen birge Shiloǵa ketti. 22 Biraq Xanna olar menen birge ketpedi. Ol kúyewine:

– Bala emshekten shıqqannan keyin, onı Jaratqan Iyege xızmet etiwge alıp baraman. Ol Jaratqan Iyeniń aldında bolıp, máńgige sol jerde qaladı, – dedi.

23 Kúyewi Elqana oǵan:

– Neni maqul tapsań, sonı isle. Balanı emshekten shıǵarǵanıńsha, usı jerde bol. Jaratqan Iye saǵan wádeńde turıwǵa járdem bersin, – dedi.

Solay etip, Xanna ulın emshekten shıǵarǵanǵa shekem úyde bolıp, onı emizdi. 24 Bala emshekten shıqqannan soń, Xanna balanı, úsh jasar buǵanı, bir efa ^{▼▼ Bir efa – shama menen 22 l.} undı hám bir mes sharaptı alıp, Jaratqan Iyeniń Shilodaǵı Úyine bardı. Bala ele jas edi. 25 Olar buǵanı shalǵannan keyin, balanı Eliyge apardı. 26 Sońınan Xanna Eliyge bılay dedi:

– O, mırzam! Aldıńızda ant iship aytaman: men usı jerde, siziń janıńızda turıp, Jaratqan Iyege duwa etken hayalman. 27 Men Jaratqan Iyeden mına balanı sorap, duwa etken edim. Ol meniń tilegimdi orınladı. 28 Men de onı Jaratqan Iyege baǵıshlayman. Ol bir ómir Jaratqan Iyege xızmet etedi.

Sońınan olar sol jerde Jaratqan Iyege sıyındı.