1Sa 10 | KaaIBT22L | STEP | Sońınan Samuel záytún mayı quyılǵan ıdısın alıp, maydı Shauldıń basına quydı hám onı súyip, bılay dedi: – Jaratqan Iye seni maylap, Óz xalqı ústinen húkimdar etip qoydı.

‏ 1 Samuel 10

1 Sońınan Samuel záytún mayı quyılǵan ıdısın alıp, maydı Shauldıń basına quydı hám onı súyip, bılay dedi:

– Jaratqan Iye seni maylap, Óz xalqı ústinen húkimdar etip qoydı. 2 Búgin meniń janımnan ketkenińnen soń, Benyamin jeriniń shegarasındaǵı Selsaxtaǵı Rahilanıń mazarı janında eki adamdı ushıratasań. Olar saǵan: «Sen izlep ketken eshekler tabıldı. Ákeń esheklerdi oylaǵandı qoyıp, balama ne boldı eken dep, seni qayǵırıp atır», – deydi. 3 Onnan arman qaray júrip, Tabordaǵı terebinf aǵashına barasań. Ol jerde úsh adamdı ushıratasań. Olardıń birewi úsh ılaq, ekinshisi úsh nan, al úshinshisi sharap quyılǵan mes alıp, Qudaydıń úyine, Beyt-Elge baratırǵan boladı. 4 Olar sálemlesip, saǵan eki nan beredi, sen olardı alasań. 5 Sońınan filistlerdiń saqshılar bólimshesi ornalasqan Gibat-Elohimge barasań. Qalaǵa kirgenińde, sıyınıw ornınan túsip kiyatırǵan payǵambarlar toparın ushıratasań. Olar arfa, dáp, sırnay hám lira ^{▼▼ Lira – barmaq penen shertiletuǵın tarlı saz ásbabı.} shertkenlerge qosılıp, ózgeshe bir awhalda kiyatırǵan boladı. 6 Sonda Jaratqan Iyeniń Ruwxı seni tolıq biylep alıp, sen de olar menen birge ózgeshe awhalǵa túseseń hám pútkilley basqa adamǵa aylanasań. 7 Bul belgiler orınlanǵanda, jaǵdayǵa qaray is tut. Óytkeni Quday seniń menen birge boladı. 8 Endi mennen aldın Gilgalǵa barıp, sol jerde meni jeti kún kút. Men jandırılatuǵın qurbanlıqlardı hám tatıwlıq qurbanlıqların beriw ushın seniń janıńa baraman. Men janıńa barǵanımda, ne islew kerekligin bildiremen.

9 Shaul Samueldiń janınan ketiw ushın burılıwdan-aq, Quday Shauldıń júregin ózgertip jiberdi. Sol kúni Samuel aytqan hámme nárse orınlandı. 10 Olar Gibaǵa kelgende, Shauldı payǵambarlar toparı qarsı aldı. Sonda Qudaydıń Ruwxı Shauldı biylep alıp, Shaul da olar menen birge ózgeshe awhalǵa túsip qaldı. 11 Onı burınnan tanıytuǵınlardıń hámmesi onıń payǵambarlar menen birge ózgeshe awhalda júrgenin kórgende, bir-birine: «Kishtiń ulına ne bolǵan? Shaul da payǵambarlardıń arasında ma?» – desti.

12 Sol jerde otırǵanlardıń biri: «Al olardıń ákesi kim eken?» – dedi. «Shaul da payǵambarlardıń arasında ma?» – degen gáp usıdan qalǵan eken. 13 Shaul ózgeshe awhaldan ózine kelgennen keyin, sıyınıw ornına kóterildi.

14 Sonda aǵası Shauldan hám onıń xızmetshisinen:

– Sizler qay jerge bardıńlar? – dep soradı.

Shaul oǵan:

– Bizler esheklerdi izledik. Olardı taba almaǵannan soń, Samuelge bardıq, – dep juwap berdi.

15 Aǵası Shaulǵa:

– Samuel saǵan ne ayttı, maǵan da aytıp ber, – dedi.

16 Shaul oǵan:

– Ol bizlerge esheklerdiń tabılǵanın anıq aytıp berdi, – dedi. Biraq ol Samueldiń ózine patshalıq tuwralı aytqan sózleri haqqında tis jarmadı.

17 Samuel Izrail xalqın Mispaǵa, Jaratqan Iyeniń aldına jıynap, 18 olarǵa bılay dedi:

– Izraildıń Qudayı Jaratqan Iye bılay deydi: «Men izraillılardı, yaǵnıy sizlerdi Mısırdan alıp shıqtım. Mısırlılardıń hám ózlerińizdi ezgen barlıq patshalardıń qolınan sizlerdi qutqardım. 19 Biraq sizler búgin ózlerińizdi barlıq músiybet hám qıyınshılıqlarıńızdan qutqarǵan Qudayıńızdan júz burıp, ózlerińizge bir patsha qoyıp beriwdi talap ettińiz». Endi Jaratqan Iyeniń aldında urıwlarıńız hám tiyrelerińiz boyınsha dizilińler.

20 Samuel pútkil Izrail urıwların birme-bir aldıǵa shıǵardı. Shek boyınsha olardan Benyamin urıwı tańlandı. 21 Sońınan Benyamin urıwı tiyreleri boyınsha shaqırılǵanda, Matriydiń tiyresi tańlandı. Eń sońında Matriydiń tiyresinen Kishtiń ulı Shaul tańlandı. Biraq onı izlegende, taba almadı. 22 Sonda xalıq Jaratqan Iyeden:

– Ol adam ele bul jerge kelmedi me? – dep soradı.

Jaratqan Iye olarǵa:

– Ol usı jerde, júklerdiń arasında jasırınıp jatır, – dep juwap berdi.

23 Olar juwırıp barıp, Shauldı sol jerden alıp keldi. Shaul xalıqtıń arasında turǵanda, hámmeniń boyı onıń iynine kelip turdı. 24 Samuel xalıqqa:

– Jaratqan Iyeniń tańlaǵan adamın kórip tursızlar ma? Pútkil xalıq arasında oǵan teń keletuǵını joq, – dedi.

Sonda xalıq:

– Jasasın patsha! – dep baqırdı.

25 Samuel xalıqqa patshalıqtıń huqıqları tuwralı bayanlap berdi. Olardı bir kitap qılıp jazıp, Jaratqan Iyeniń aldına qoydı. Sońınan hámmeni úyine qaytardı. 26 Shaul da Gibaǵa, óz úyine qayttı. Quday júreklerine túrtki salǵan márt adamlar oǵan joldas boldı. 27 Biraq geybir jaramas adamlar: «Ol bizlerdi qalay qutqara aladı?» – dep Shauldı mensinbey, oǵan sıylar bermedi. Al Shaul ózin sezbegenge aldı.