1Sa 11 | KaaIBT22L | STEP | Ammon patshası Naxash Giladtaǵı Yabesh qalasına kelip, qalanı qamal etti. Pútkil yabeshliler Naxashqa: – Bizler menen kelisim dúz. Bizler saǵan xızmet etemiz,

‏ 1 Samuel 11

Shauldıń ammon xalqın jeńiwi

1 Ammon patshası Naxash Giladtaǵı Yabesh qalasına kelip, qalanı qamal etti. Pútkil yabeshliler Naxashqa:

– Bizler menen kelisim dúz. Bizler saǵan xızmet etemiz, – dedi.

2 Biraq Ammon patshası Naxash:

– Men bir shárt penen kelisim dúzemen. Pútkil Izrail xalqın masqara etiw ushın, hár birińizdiń oń kózińizdi oyıp alaman, – dedi.

3 Yabesh qalasınıń aqsaqalları Naxashqa:

– Izraildıń hámme jerine xabarshılar jiberiwimiz ushın, bizlerge jeti kún máwlet ber. Eger bizlerdi qutqaratuǵın hesh kim tabılmasa, saǵan táslim bolamız, – dedi.

4 Xabarshılar Shaul jasap atırǵan Giba qalasına kelip, bolıp atırǵan waqıyalardı xalıqqa xabarlaǵanda, xalıq dad salıp jılay basladı. 5 Tap usı waqıtta Shaul ógizlerin aydap, atızdan kiyatırǵan edi. Ol:

– Adamlarǵa ne boldı? Nege bunsha jılap atır? – dep soradı. Sonda yabeshlilerdiń jollaǵan xabarın oǵan aytıp berdi.

6 Shaul bul gáplerdi esitken waqıtta, Qudaydıń Ruwxı onı biylep aldı. Shaul qattı ashıwǵa mindi. 7 Ol bir jup ógizdi soyıp, olardı jilikledi de, jiliklerdi xabarshılar arqalı Izraildıń hámme tárepine jiberip: «Shaul menen Samueldiń izine ermegen hár bir adamnıń ógizlerine de anıq usılay islenedi», – dedi.

Xalıq Jaratqan Iyeden qorqqanınan qaltırap, hámmesi bir jaǵadan bas shıǵarıp, jolǵa atlandı. 8 Shaul olardı Bezekke jıynadı. Sonda Izraildıń basqa urıwlarınan úsh júz mıń, al Yahuda urıwınan otız mıń adam boldı. 9 Izraillılar sol jerge kelgen yabeshli xabarshılarǵa:

– Giladtaǵı Yabesh turǵınları erteń kún tas tóbege kóterilgende qutqarılatuǵının aytıńlar, – dedi.

Xabarshılar barıp, bul xabardı jetkizgende, yabeshliler quwanıp ketti. 10 Olar Naxashqa:

– Erteń sizlerge táslim bolamız. Sonda bizlerge neni maqul kórseńiz, sonı isleń, – dedi.

11 Erteńine Shaul adamların úsh toparǵa bóldi. Olar erte tańda ammonlardıń ordasına bastırıp kirip, olardı kún qızǵansha qırıp tasladı. Aman qalǵanları tarap ketip, dara-dara bolıp qashtı. 12 Bunnan keyin, xalıq Samuelge:

– «Shaul ma bizge patsha bolatuǵın?» – degenler kimler edi? Olardı alıp kelińler, óltiremiz, – dedi.

13 Biraq Shaul olarǵa:

– Búgin hesh kim óltirilmeydi. Sebebi Jaratqan Iye búgin Izrail xalqına qutqarılıw berdi, – dedi.

14 Al Samuel xalıqqa:

– Gilgalǵa barıp, sol jerde patshalıqtı qayta tastıyıqlayıq, – dedi.

15 Solay etip, pútkil xalıq Gilgalǵa barıp, Jaratqan Iyeniń aldında Shauldıń patshalıǵın tastıyıqladı. Sol jerde, Jaratqan Iyeniń aldında tatıwlıq qurbanlıqların berdi. Shaul da, pútkil Izrail xalqı da jaqsılap bázim qurdı.