1Sa 12 | KaaIBT22L | STEP | Bunnan keyin, Samuel Izrail xalqına bılay dedi: – Men aytqanlarıńızdıń hámmesine qulaq asıp, sizlerge patsha tayınlap berdim.

‏ 1 Samuel 12

Samueldiń sońǵı sózi

1 Bunnan keyin, Samuel Izrail xalqına bılay dedi:

– Men aytqanlarıńızdıń hámmesine qulaq asıp, sizlerge patsha tayınlap berdim. 2 Endi sizlerdi basqaratuǵın patshańız bar. Al men qartaydım, shashlarım da aǵardı. Ullarım da sizler menen birge. Jaslıǵımnan baslap, usı kúnge shekem sizlerge biylik ettim. 3 Mine, men aldıńızda turıppan. Aytıńlar, qaysı birińizdiń ógizińizdi aldım? Kimniń eshegin tartıp aldım? Kimdi aldadım? Kimge zulımlıq qıldım? Kimnen para alıp, onıń ayıpların kórmeslikke aldım? Jaratqan Iyeniń hám Onıń maylaǵan patshasınıń aldında gúwalıq berińler. Sizlerden bir nárse alǵan bolsam, qaytarıp bereyin.

4 Xalıq oǵan:

– Bizlerdi aldamadıń, bizlerge zulımlıq ta qılmadıń, hesh kimniń qolınan hesh nárse almadıń, – dedi.

5 Samuel olarǵa:

– Mennen birde bir nuqsan tappaǵanıńızǵa Jaratqan Iye de, Ol maylaǵan patsha da gúwa, – dedi.

– Awa, gúwa, – dedi xalıq.

6 Samuel sózin bılay dep dawam etti:

– Muwsa menen Xarondı tayınlap, ata-babalarıńızdı Mısır elinen alıp shıqqan Jaratqan Iye boladı. 7 Endi usı jerde turıńlar. Jaratqan Iyeniń sizlerdi hám ata-babalarıńızdı qutqarıw ushın islegen barlıq jaqsı islerin Onıń aldında sizlerge dálillep bereyin. 8 Yaqıp Mısırǵa ketkennen keyin, ata-babalarıńız Jaratqan Iyege jalbarınǵanda, Ol Muwsa menen Xarondı jiberdi. Olar ata-babalarıńızdı Mısırdan alıp shıǵıp, usı jerge ornalastırdı. 9 Biraq ata-babalarıńız ózleriniń Qudayı Jaratqan Iyeni umıttı. Sonlıqtan Jaratqan Iye olardı Xasor patshasınıń sárkárdası Siseranıń, filistlerdiń hám Moab patshasınıń qolına tapsırdı. Olar ata-babalarıńızǵa qarsı urıstı. 10 Ata-babalarıńız Jaratqan Iyege: «Bizler gúna isledik. Seni taslap, Baal hám Ashtarta butlarına xızmet ettik. Endi bizlerdi dushpanlarımızdıń qolınan qutqar, Saǵan xızmet etemiz», – dep jalbarındı. 11 Sonda Jaratqan Iye Erubbaaldı, Bedandı, Iftaxtı hám Samueldi, yaǵnıy meni jiberip, qáwipsiz jasawıńız ushın, átirapıńızdı qorshaǵan dushpanlarıńızdıń qolınan sizlerdi qutqardı. 12 Biraq sizler Ammon patshası Naxashtıń ózlerińizge qarsı atlanǵanın kórgenińizde, patshańızdıń Qudayıńız Jaratqan Iye ekenine qaramastan: «Yaq, bizlerdi patsha basqarsın», – dedińler. 13 Mine, ózlerińiz tańlap, tilep alǵan patshańız! Awa, Jaratqan Iye sizlerge patsha berdi. 14 Eger Jaratqan Iyeden qorqıp, Oǵan xızmet qılsańız, Onıń sózlerin tıńlap, buyrıqlarına qarsı shıqpasańız, sizler de, sizlerdi basqaratuǵın patshańız da Qudayıńız Jaratqan Iyege erseńiz, hámmesi jaqsı boladı. 15 Eger Jaratqan Iyeniń sózine qulaq aspay, Onıń buyrıqlarına qarsı shıqsańız, Jaratqan Iye ata-babalarıńızdı jazalaǵanı sıyaqlı, sizlerdi de jazalaydı. 16 Endi ornıńızda turıp, Jaratqan Iyeniń kóz aldıńızda isleytuǵın ullı isin kórińler. 17 Házir biyday orımı waqtı emes pe? Men Jaratqan Iyege jalbarınaman hám Ol aspandı gúrkiretip, jawın jawdıradı. Sonda sizler patsha qoyıwdı sorap, Jaratqan Iyeniń názerinde qanday jamanlıq islegenińizdi jaqsı túsinip alasız.

18 Samuel Jaratqan Iyege jalbarındı hám Jaratqan Iye sol kúni aspandı gúrkiretip, jawın jawdırdı. Xalıq Jaratqan Iyeden de, Samuelden de qattı qorqtı.

19 Olar Samuelge:

– Nabıt bolmawımız ushın, bizler, yaǵnıy óz qullarıń ushın Qudayıń Jaratqan Iyege jalbarın. Óytkeni bizler patsha sorap, óz gúnalarımız ústine gúna jamadıq, – dedi.

20 Sonda Samuel xalıqqa bılay dedi:

– Qorqpańlar, sizler bul úlken jamanlıqtı isledińler. Biraq endi Jaratqan Iyeden júz burmay, Oǵan erińler hám shın júrekten xızmet etińler. 21 Hesh kimdi qutqara almaytuǵın jaramsız butlardıń izine ermeńler. Sebebi olar paydasız. 22 Óziniń ullı atı ushın Jaratqan Iye Óz xalqınan júz burmaydı. Sebebi Ol sizlerdi Óz xalqı qılıwdı maqul taptı. 23 Maǵan kelsek, sizler ushın Jaratqan Iyege jalbarınıwdan waz keshiw arqalı, Oǵan qarsı gúna islewden awlaq bolǵayman! Men sizlerge tek jaqsı hám tuwrı joldı kórsetemen. 24 Jalǵız Qudaydan qorqıńlar, Oǵan shın júrekten sadıqlıq penen xızmet etińler. Onıń sizler ushın qanday ullı islerdi islegenin este tutıńlar! 25 Biraq jawızlıq islewdi dawam ete berseńiz, ózlerińiz de, patshańız da qırılıp ketesizler.