1Sa 13 | KaaIBT22L | STEP | Shaul Izrailda eki jıl patshalıq etkennen soń ,

‏ 1 Samuel 13

Filistler menen urıs

1 Shaul Izrailda eki jıl patshalıq etkennen soń ^{▼▼Evreyshe qoljazbalarda bul ayat bılay baslanǵan: «Shaul patsha bolǵanda… jasta edi». Evreyshede jastıń sanı joq. Áyyemgi grekshe awdarmanıń bazı qoljazbalarında bılay jazılǵan: «Shaul patsha bolǵanda otız jasta edi».}, 2 xalıqtan úsh mıń adamdı tańlap alıp, olardıń eki mıńın Mixmas hám Beyt-Eldiń tawlı úlkelerinde óz janına alıp qaldı. Al bir mıńın Benyamin urıwına tiyisli bolǵan Giba qalasındaǵı Ionatannıń janına jiberdi. Xalıqtıń qalǵanın úylerine qaytardı.

3 Ionatan filistlerdiń Gibadaǵı saqshılar toparın qıyrattı. Filistler bul tuwralı esitti. Al Shaul: «Evreyler bul xabardı esitsin», – dep pútkil el boylap kárnay sherttirdi. 4 Solay etip, izraillılardıń hámmesi Shauldıń filistlerdiń saqshılar toparın qırǵanı hám filistlerdiń izraillılardı jek kórip qalǵanlıǵı tuwralı esitti. Sonlıqtan xalıq Gilgalǵa, Shauldıń janına jıynaldı.

5 Filistler izraillılar menen urısıw ushın toplandı. Olar úsh mıń ^{▼▼ úsh mıń – Áyyemgi grek hám suriya tilindegi awdarmalardan. Evreyshe qoljazbalarda «otız mıń».} sawash arbası, olardıń ústindegi altı mıń áskeri hám teńiz qumınday sansız piyada áskerleri menen kelip, Beyt-Awenniń shıǵısındaǵı Mixmasqa orda qurdı. 6 Izraillılar ózleriniń qáwipli jaǵdayda ekenin hám áskerleriniń qısqıǵa alınǵanın kórgende, úńgirlerge, sheńgelliklerge, jartaslardıń quwıslarına, shuqırlarǵa hám suw saqlaǵıshlarǵa jasırındı. 7 Evreylerdiń ayırımları bolsa, Iordannan Gad hám Gilad jerlerine kesip ótti. Biraq Shaul ele Gilgalda edi. Onıń izine ergen pútkil áskerler qorqınıshtan qaltırastı. 8 Shaul Samuel tárepinen belgilengen múddetke boysınıp, jeti kún kútti. Biraq Samuel Gilgalǵa kelmey atırǵanlıqtan, xalıq Shauldıń janınan kete basladı. 9 Sonda Shaul:

– Jandırılatuǵın qurbanlıq penen tatıwlıq qurbanlıǵı ushın beriletuǵın mallardı maǵan alıp kelińler, – dedi de, jandırılatuǵın qurbanlıqtı usındı. 10 Shaul jandırılatuǵın qurbanlıqtı berip bolar-bolmastan, Samuel keldi. Shaul sálem beriw ushın onıń aldına shıqtı. 11 Samuel Shauldan:

– Ne islep qoydıń? – dep soradı.

Shaul oǵan bılay juwap berdi:

– Adamlarım janımnan kete basladı. Sen de belgilengen kúni kelmediń. Bunıń ústine, filistlerdiń Mixmasqa toplanǵanın kórgenimde: 12 «Endi filistler Gilgalǵa, meniń ústime bastırıp keledi, al men elege shekem Jaratqan Iyeden miyrim soramadım», – dep oyladım. Sonlıqtan men jandırılatuǵın qurbanlıqtı beriwdi sheshtim.

13 Samuel Shaulǵa:

– Sen aqılsızlarsha is tutıp, Qudayıń Jaratqan Iyeniń ózińe bergen buyrıǵın orınlamadıń. Bulay islemegenińde, Ol seniń Izrail ústinen patshalıǵıńdı máńgilik qılar edi. 14 Biraq endi seniń patshalıǵıń uzaqqa barmaydı. Jaratqan Iye Óziniń kewline jaqqan birewdi tawıp, onı Óz xalqı ústinen húkimdar etip qoydı. Sebebi sen Jaratqan Iyeniń buyrıǵına boysınbadıń, – dedi.

15 Sonnan keyin, Samuel Gilgaldan shıǵıp, Benyamin urıwınıń Giba qalasına ketti. Shaul janında qalǵan adamlardı sanap shıqtı. Olar shama menen altı júz adam edi. 16 Shaul, onıń ulı Ionatan hám olardıń adamları Benyamin urıwına tiyisli bolǵan Giba qalasına ornalastı. Al filistler bolsa, Mixmasqa orda qurǵan edi. 17 Filistlerdiń ordasınan úsh topar ásker eldi tonaw ushın bólinip shıqtı. Toparlardıń biri Shuwal úlkesindegi Ofraǵa, 18 ekinshisi Beyt-Xoronǵa, úshinshisi Seboim oypatlıǵı ústinen kóterilip turǵan shólge baratuǵın jol arqalı shegaradaǵı jerlerge qaray jol aldı.

19 Pútkil Izrail elinde birde bir temirshi usta joq edi. Óytkeni filistler: «Evreyler nayza hám qılısh soǵıp almasın», – degen edi. 20 Sonlıqtan pútkil Izrail xalqı paznaların, ketpenlerin, baltaların hám oraqların egetiw ushın filistlerge barıwǵa májbúr edi. 21 Pazna hám ketpenlerdiń egew bahası bir shekeldiń úshten eki bólegine shamalas bolǵan gúmisten, al bel, balta hám ushlı qurallardı egew bahası bir shekeldiń úshten birine teń bolǵan gúmisten ibarat edi. 22 Sol sebepli sawash waqtında Shaul menen Ionatannıń qasındaǵılardıń hesh birinde qılısh ta, nayza da bolmadı. Olar tek Shaul menen Ionatanda ǵana bar edi.

23 Sol arada filistlerdiń bir toparı Mixmas ótkeline qaray shıqtı.