‏ 1 Samuel 15

Jaratqan Iyeniń Shauldan júz burıwı

1Bir kúni Samuel Shaulǵa bılay dedi:

– Jaratqan Iye seni maylap, Óz xalqı Izrail ústinen patsha etip qoyıw ushın meni jibergen edi. Endi Jaratqan Iyeniń sózlerin tıńla. 2Álemniń Jaratqan Iyesi bılay deydi: «Izraillılarǵa islegen jamanlıǵı ushın amaleklerdi jazalamaqshıman. Óytkeni olar Mısırdan shıqqan Izrail xalqına qarsı shıqqan edi. 3Endi barıp, amaleklerge hújim qıl hám olarǵa tiyisli barlıq nárseni tolıq joq qıl. Olardı ayama. Erkegin de, hayalın da, balaların da, nárestelerin de, ógizin de, qoyın da, túyesin de, eshegin de, hámmesin óltir».

4Shaul áskerlerin toplap, olardı Telaim qalasında sanaqtan ótkizdi. Ol jerde eki júz mıń piyada ásker bolıp, Yahuda urıwınan da on mıń ásker bar edi. 5Shaul amaleklerdiń qalasına barıp, oypatlıqta buqqı jasadı. 6Sońınan ol ken xalqına: «Sizlerdi de amalekler menen birge qırıp taslamawım ushın, bólinip, olardıń arasınan shıǵıp ketińler. Sebebi sizler Mısırdan shıqqan Izrail xalqına jaqsılıq islegen edińler», – dep xabar jiberdi. Sonda kenler amaleklerden ayırılıp shıqtı.

7Shaul Xawiladan Mısırdıń shıǵısındaǵı Shurǵa shekemgi amaleklerdi qıyrattı. 8Ol amalek patshası Agagtı tiriley qolǵa aldı, al onıń pútkil xalqın qılıshtan ótkerip, qırıp tasladı. 9Biraq Shaul hám onıń adamları Agagtı, onıń eń jaqsı qoyların, sıyırların, eń semiz tanaların hám qozıların, ulıwma jaqsı nárselerdi ayap, olardı tolıq qırıp taslawdı qálemedi. Al áhmiyetsiz hám hálsizlerin qırıp tasladı.

10Sonda Jaratqan Iyeden Samuelge mınaday sóz tústi:

11– Men Shauldı patsha etip tayınlaǵanıma ókinemen. Ol Mennen júz burıp, buyrıqlarımdı orınlamadı.

Samuel ashıwlandı hám túni menen Jaratqan Iyege jalbarındı. 12Erteńine Samuel azanda erte turıp, Shaul menen ushırasıwǵa bardı. Biraq ol Shauldıń Karmel qalasına ketkenin, sol jerde ózine bir eskertkish ornatqannan soń, tómen túsip Gilgalǵa qaytqanın bildi. 13Samuel Shaulǵa kelgende, Shaul oǵan:

– Seni Jaratqan Iye jarılqasın. Men Jaratqan Iyeniń buyrıǵın orınladım, – dedi.

14Biraq Samuel onnan:

– Onda nege qulaǵıma qoydıń mańıraǵanı hám sıyırdıń móńiregeni esitilip tur? – dep soradı.

15Shaul oǵan:

– Adamlarım olardı amaleklerden alıp keldi. Qudayıń Jaratqan Iyege arnap qurbanlıqqa shalıw ushın, qoy hám sıyırlardıń eń jaqsıların ayap alıp qaldı, qalǵanların tolıq joq qıldıq, – dep juwap berdi.

16Sonda Samuel Shaulǵa:

– Toqtay tur, búgin túnde Jaratqan Iyeniń maǵan nelerdi aytqanın saǵan bildireyin, – dedi.

– Ayt, – dedi Shaul.

17Samuel sózin dawam etip bılay dedi:

– Ózińdi pás sanap júrgenińde, Izrail urıwlarınıń basshısına aylanbadıń ba? Jaratqan Iye seni maylap, Izrailǵa patsha etip qoymadı ma? 18Ol seni: «Barıp, sol gúnakar amaleklerdi pútkilley qırıp tasla. Hámmesin joq qılmaǵansha, olar menen urıs», – degen tapsırma menen jibergen edi. 19Olay bolsa, nege Jaratqan Iyeniń sózine qulaq aspadıń? Nege oljaǵa taslanıp, Jaratqan Iyeniń názerinde jawız bolǵan isti islediń?

20Shaul Samuelge bılay dep juwap berdi:

– Biraq men Jaratqan Iyeniń sózine qulaq astım. Men Onıń jibergen jerine bardım. Amalek xalqın tolıq qırıp taslap, olardıń patshası Agagtı usı jerge alıp keldim. 21Adamlarım bolsa, Gilgalda Qudayıń Jaratqan Iyege arnap qurbanlıqqa shalıw ushın qırıp taslanıwı kerek bolǵan oljadan eń jaqsı qoy hám mallardı aldı.

22Sonda Samuel Shaulǵa bılay dep juwap berdi:

– Jandırılatuǵın hám basqa qurbanlıqlar bergennen góre, Ózine qulaq asqanlarǵa Jaratqan Iye kóbirek quwanbay ma? Qulaq asıw qurbanlıqtan, boysınıw qoshqardıń mayınan artıǵıraq. 23Sebebi boysınbawshılıq palkerlik sıyaqlı gúna, al menmenlik butparazlıq penen barabar. Sen Jaratqan Iyeniń buyrıǵın orınlawdan bas tartqanıń ushın, Jaratqan Iye de seni patsha etiwden bas tarttı.

24Shaul Samuelge:

– Men gúna isledim! Awa, Jaratqan Iyeniń buyrıǵına da, seniń sózlerińe de boysınbay, adamlarımnan qorqqanım ushın, olarǵa qulaq saldım. 25Biraq endi ótinemen, meniń gúnamdı keshir. Jaratqan Iyege sıyınıwım ushın meniń menen birge qayt, – dedi.

26Al Samuel Shaulǵa:

– Men seniń menen birge qaytpayman. Óytkeni sen Jaratqan Iyeniń buyrıǵın orınlawdan bas tarttıń, Jaratqan Iye de seni Izrailǵa patsha etiwden bas tarttı, – dedi.

27Samuel ketpekshi bolıp burılǵanda, Shaul onıń shapanınıń eteginen uslap qaldı. Shapan jırtıldı. 28Sonda Samuel:

– Búgin Jaratqan Iye Izraildıń patshalıǵın seniń qolıńnan aldı hám sennen jaqsıraǵına berdi. 29Izraildıń ullı Qudayı jalǵan sóylemeydi, pikirin de ózgertpeydi. Pikirin ózgertetuǵınday Ol adam emes, – dedi.

30Shaul Samuelge:

– Men gúna isledim. Biraq xalqımnıń aqsaqalları hám basqa izraillılardıń aldında maǵan húrmet kórset. Qudayıń Jaratqan Iyege sıyınıwım ushın, meniń menen birge qayt, – dedi.

31Solay etip, Samuel Shaul menen birge qayttı hám Shaul Jaratqan Iyege sıyındı.

32Sońınan Samuel:

– Amaleklerdiń patshası Agagtı meniń aldıma alıp kelińler, – dep buyırdı. Agagtı baylawlı halda Samueldiń aldına alıp keldi. Al Agag ishinen: «Ólim qáwpiniń shetlep ótkeni anıq», – dep oyladı. 33Biraq Samuel oǵan:

– Qılıshıń analardı balalarınan qalay ayırǵan bolsa, seniń anań da hayallar arasında balasınan ayırılsın, – dedi de, Agagtı Gilgalda, Jaratqan Iyeniń aldında qılısh penen shawıp tasladı.

34Keyin Samuel Ramaǵa, al Shaul Gibadaǵı óz úyine qayttı. 35Sol kúnnen baslap ómiriniń aqırına shekem Samuel Shauldı qaytıp kórmedi. Biraq onıń ushın qayǵırıp júrdi. Al Jaratqan Iye bolsa, Shauldı Izrailǵa patsha etip tayınlaǵanına pushayman edi.