‏ 1 Samuel 16

Dawıttıń patshalıqqa maylanıwı

1Jaratqan Iye Samuelge:

– Shauldıń Izrailǵa patsha bolıwınan Meni bas tarttı dep, qashanǵa shekem ol ushın qayǵırıp júreseń? May quyatuǵın shaqıńdı záytún mayına toltırıp jolǵa shıq. Seni beytlehemli Ishaydıń úyine jiberemen. Sebebi Men onıń ullarınıń birin patsha etiw ushın tańlap aldım, – dedi.

2Samuel:

– Qalay baraman? Shaul bunı esitse, meni óltiredi-ǵo, – dedi.

Sonda Jaratqan Iye bılay dedi:

– Óziń menen birge bir qashardı al da: «Jaratqan Iyege qurbanlıq beriw ushın keldim», – dep ayt. 3Ishaydı qurbanlıq asına mirát et. Sonda Men saǵan ne islewiń kerekligin bildiremen. Saǵan kórsetken adamımdı maylap, Meniń ushın patsha etip qoyasań.

4Samuel Jaratqan Iyeniń aytqanın orınlap, Beytlehem qalasına bardı. Qala aqsaqalları onı qorqınısh penen kútip alıp:

– Tınıshlıq pa? – dep soradı. 5Samuel olarǵa:

– Awa, tınıshlıq. Jaratqan Iyege qurbanlıq beriw ushın keldim. Ózlerińizdi páklep, meniń menen birge qurbanlıq asına júrińler, – dedi.

Sońınan ol Ishaydı hám onıń ulların páklew rásiminen ótkerip, qurbanlıq asına mirát etti. 6Ishay hám onıń ulları kelgende, Samuel Eliabtı kórip: «Haqıyqattan da, Jaratqan Iyeniń aldında turǵan mına adam – Onıń maylaǵanı», – dep oyladı.

7Biraq Jaratqan Iye Samuelge: «Onıń shırayına, boyınıń uzınlıǵına qarama. Sebebi Men onı maqul kórmedim. Men adamlar sıyaqlı qaramayman. Adam sırtqı kórinisine qaraydı, al Men júrekke qarayman», – dedi. 8Ishay ulı Abinadabtı shaqırıp, Samueldiń aldınan ótkerdi. Biraq Samuel: «Jaratqan Iye bunı da tańlamadı», – dedi. 9Keyin Ishay úshinshi ulın, Shammanı alıp keldi. Biraq Samuel: «Jaratqan Iye bunı da tańlamadı», – dedi. 10Solay etip, Ishay óziniń jeti ulın da Samueldiń aldınan ótkerdi. Biraq Samuel: «Jaratqan Iye bulardıń hesh birin de tańlap almadı», – dedi. 11Sońınan Samuel Ishaydan:

– Bular ullarıńnıń hámmesi me? – dep soradı.

Ishay oǵan:

– Eń kishkenesi bar. Ol qoy baǵıp júr, – dep juwap berdi.

Samuel Ishayǵa:

– Birewdi jiberip, onı shaqırt. Ol kelmegenshe, awqatqa otırmaymız, – dedi.

12Ishay birewdi jiberip, ulın aldırttı. Ol qızıl júzli, sımbatlı bolıp, kózleri janıp turǵan edi. Jaratqan Iye Samuelge: «Ornıńnan turıp, onı mayla. Tańlaǵan adamım usı boladı», – dedi. 13Samuel záytún mayı quyılǵan shaqtı alıp, aǵalarınıń kóz aldında jigittiń basına may quydı. Usı kúnnen baslap, Jaratqan Iyeniń Ruwxı Dawıttı biylep aldı. Sońınan Samuel Ramaǵa qaytıp ketti.

Dawıttıń Shaulǵa xızmet etiwi

14Sol arada Jaratqan Iyeniń Ruwxı Shauldı tárk etti. Jaratqan Iye jibergen jaman bir ruwx onı qıynaytuǵın edi. 15Xızmetshileri Shaulǵa:

– Qarań, Quday jibergen jaman ruwx sizdi qıynap atır. 16Taqsır, xızmetshilerińiz bolǵan bizlerge buyrıq beriń. Bizler liranı jaqsı shertetuǵın birewdi tawıp keleyik. Sonda Quday jibergen jaman ruwx sizge kelgende, ol adam lira shertedi hám siz jeńil tartasız, – dedi.

17Shaul xızmetshilerine:

– Yaqshı, liranı jaqsı shertetuǵın birewdi tawıp, maǵan alıp kelińler, – dep buyırdı.

18Sonda xızmetshilerden biri:

– Beytlehemli Ishaydıń ullarınıń birin kórgen edim. Ol liranı jaqsı shertedi eken. Bunıń ústine, ol batır jigit hám jawınger adam eken. Onıń sózleri mánili, qáddi-qáwmeti de kelisken. Jaratqan Iye de onıń menen birge, – dedi.

19Shaul Ishayǵa: «Qoy baǵıp júrgen ulıń Dawıttı maǵan jiber», – dep xabarshılar jónetti. 20Ishay bir eshekke nan, bir mes sharap hám bir ılaqtı artıp, Dawıt penen qosa Shaulǵa jiberdi. 21Dawıt Shaulǵa barıp, onıń xızmetine kirdi. Shaul Dawıttı júdá jaqsı kórdi hám onı ózine nóker etip aldı. 22Shaul Ishayǵa: «Dawıttıń xızmetimde qalıwına ruxsat ber. Oǵan kewlim toldı», – degen xabar jiberdi.

23Sol kúnnen baslap, Quday jibergen jaman ruwx Shaulǵa kelgende, Dawıt lira shertetuǵın edi. Sonda Shaul ózine kelip jaqsı bolatuǵın, jaman ruwx ta onı tárk etetuǵın edi.