1Sa 17 | KaaIBT22L | STEP | Filistler urısıw ushın áskerlerin toplap, Yahudanıń Soxo qalasına jıynaldı. Olar Soxo menen Azeqa qalası aralıǵındaǵı Efes-Dammim degen jerge orda qurdı.

‏ 1 Samuel 17

Dawıttıń Goliyattı óltiriwi

1 Filistler urısıw ushın áskerlerin toplap, Yahudanıń Soxo qalasına jıynaldı. Olar Soxo menen Azeqa qalası aralıǵındaǵı Efes-Dammim degen jerge orda qurdı. 2 Shaul menen izraillılar da toplandı. Olar Ela oypatlıǵına orda qurıp, filistlerge qarsı sawashqa tayarlandı. 3 Filistler bir tóbeshikti, al izraillılar ekinshi tóbeshikti iyeledi. Olardıń ortasında oypatlıq bar edi.

4 Filistler sapınan gatlı Goliyat degen kúshli bir jawınger ortaǵa shıqtı. Onıń boyı altı shıǵanaq hám bir qarıs edi. 5 Ol basına qoladan islengen duwlıǵa, ústine qoladan islengen sawıt kiyip alǵan bolıp, sawıtınıń awırlıǵı shama menen bes mıń shekel edi. 6 Onıń ayaqları qola dizeqap penen qaplanıp, jawırınına qola semser asqan edi. 7 Semseriniń sabı toqıw úskenesiniń qadasınday, al semseriniń ushındaǵı temirdiń awırlıǵı altı júz shekel edi. Goliyattıń úlken qalqanın nókeri onıń aldında kóterip júretuǵın edi.

8 Goliyat turıp, sapta turǵan izraillılarǵa bılay dep baqırdı:

– Sizler nege sawash maydanına shıqtıńız? Men filistpen, al sizler Shauldıń qulları emessizler me? Maǵan qarsı shıǵıw ushın arańızdan birin tańlań. 9 Eger ol meniń menen urısıp, meni óltire alsa, onda bizler sizlerdiń qullarıńız bolamız. Eger men ústin kelip, onı óltire alsam, onda sizler bizlerge qul bolıp, bizlerge xızmet qılasızlar.

10 Sońınan filist sózin dawam etip:

– Búgin men Izrail áskerleriniń shermendesin shıǵaraman. Meniń menen alısatuǵın bir adamdı aldıma shıǵarıń, – dedi.

11 Filisttiń bul sózlerin esitip, Shaul da, izraillılar da qattı qorqıp, qáweterge tústi.

12 Dawıt Yahudanıń Beytlehem qalasınan bolǵan efratlı Ishay degen adamnıń ulı edi. Ishaydıń segiz ulı bar edi. Shauldıń patshalıǵı dáwirinde Ishay qartayıp qalǵan bolıp, adamlar arasında eń jası úlkeni edi. 13 Ishaydıń úlken úsh ulı Shaul menen birge sawashqa ketken edi. Sawashqa ketken ullarınıń eń úlkeniniń atı Eliab, ekinshisiniń atı Abinadab, úshinshisiniń atı Shamma edi. 14 Dawıt eń genje ulı edi. Úlken úsh ulı Shauldıń janında edi. 15 Al Dawıt bolsa, ákesiniń súriwin baǵıw ushın, Shauldıń janınan Beytlehemge qaytıp kelgen edi.

16 Filist Goliyat qırıq kún dawamında azanlı-kesh ortaǵa shıǵıp, urısıwǵa shaqırdı.

17 Bir kúni Ishay ulı Dawıtqa bılay dedi:

– Mına bir efa quwırmash penen on shórek nandı al da, olardı tezirek ordaǵa, aǵalarıńa aparıp ber. 18 Al mına on bólek irimtikti bolsa, olardıń mıńbasısına ber. Aǵalarıńnıń hal-jaǵdayın bil hám olardıń jaqsı ekenin bildiretuǵın qanday da bir belgi alıp kel. 19 Aǵalarıń, Shaul hám basqa barlıq izraillılar menen birge Ela oypatlıǵında filistlerge qarsı urısıp atır.

20 Erteńine Dawıt azanda erte turdı. Súriwdi bir shopanǵa qaldırıp, Ishaydıń buyrıǵı boyınsha azıq-awqatlardı aldı da, jolǵa shıqtı. Ol ordaǵa jetip barǵanda, áskerler sap tartıp, súren salıwı menen sawashqa shıǵıp atırǵan edi. 21 Izraillılar menen filistler bir-birine qarama-qarsı bolıp sapqa dizilgen edi. 22 Dawıt aparǵan zatların júklerdi qarawıllaytuǵın adamǵa qaldırıp, sapqa qaray juwırıp ketti. Ol tuwısqanlarınıń janına barıp, olar menen sálemlesti. 23 Dawıt tuwısqanları menen sóylesip turǵanda, gatlı filist jawıngeri Goliyat óz sapınan ortaǵa shıǵıp, burınǵı sózlerin tákirarlap baqıra basladı. Dawıt bunı esitti. 24 Izraillılar Goliyattı kórgende qattı qorqıp, onnan qasha basladı. 25 Izraillılar bir-birine: «Izraildı masqaralaw ushın ortaǵa shıǵıp turǵan mına adamdı kórip tursızlar ma? Onı óltirgen adamǵa patshamız úlken baylıq sıylap, qızın da bermekshi. Hátte, onıń ákesiniń xojalıǵın da Izrailda salıq tólewden azat qılmaqshı», – dedi.

26 Dawıt janındaǵılarǵa:

– Bul filistti óltirip, Izraildı shermendelikten qutqarǵan adamǵa ne beriledi? Tiri Qudaydıń áskerlerin masqaralaytuǵınday, bul súnnetsiz filist kim bolıptı? – dedi. 27 Adamlar burınǵı sózlerdi qaytalap, Goliyattı óltirgen adamǵa neler beriletuǵının aytıp berdi.

28 Dawıttıń áskerler menen sóyleskenin esitkende, úlken ájaǵası Eliabtıń ashıwı keldi. Ol Dawıtqa:

– Bul jerge nege keldiń? Shóldegi azǵantay qoyımızdı kimge taslap kettiń? Seniń qanshelli menmen hám qanshelli jaman niyetli ekenińdi bilemen. Sen tek urıstı tamashalaw ushın kelgenseń, – dedi.

29 Dawıt oǵan:

– Men ne qıldım? Sorawǵa da bolmay ma? – dedi.

30 Ol ájaǵasınıń qasınan ketip, basqa adamlardan da sol nárselerdi soradı. Olar da burınǵıday juwaptı berdi.

31 Dawıttıń sózlerin esitkenler onı Shaulǵa jetkizdi. Shaul Dawıttı shaqırttı. 32 Dawıt Shaulǵa:

– Mına filist sebepli hesh kimniń ruwxı túspesin. Qulıńız bolǵan men barıp, onıń menen alısaman, – dedi.

33 Shaul oǵan:

– Sen bul filistke qarsı shıǵıp, onıń menen alısa almaysań. Sebebi sen ele jassań, al ol bolsa, jaslıǵınan jawınger adam, – dedi.

34 Biraq Dawıt Shaulǵa bılay dedi:

– Qulıńız bolǵan men ákemniń súriwin baǵaman. Arıslan yamasa ayıw kelip, súriwden bir qozını alıp qashsa, 35 izinen quwıp, oǵan hújim qılaman hám qozını awzınan alıp qalaman. Eger arıslan yamasa ayıw maǵan taslansa, onıń jalınan uslap alıp, urıp óltiremen. 36 Qulıńız bolǵan men arıslandı da, ayıwdı da óltirgenmen. Mına súnnetsiz filisttiń basına da sol kún tuwadı. Sebebi ol tiri Qudaydıń áskerlerin masqaraladı. 37 Meni arıslannıń hám ayıwdıń pánjesinen qutqarǵan Jaratqan Iye bul filisttiń qolınan da qutqaradı.

Sonda Shaul Dawıtqa:

– Meyli bar, Jaratqan Iye saǵan yar bolsın! – dedi.

38 Shaul óziniń sawash kiyimlerin Dawıtqa berdi. Basına qola duwlıǵa, ústine sawıt kiygizdi. 39 Dawıt patshanıń sawash kiyimleriniń ústinen qılıshın da asınıp júrmekshi boldı. Biraq ol bularǵa úyrenbegenlikten, Shaulǵa:

– Men bul kiyimler menen júre almayman, sebebi úyrenbegenmen, – dedi de, olardı sheship tasladı.

40 Dawıt tayaǵın qolına alıp, saydan bes sıypaq tas terip aldı. Olardı shopan dorbasına salǵannan soń, saqpanın aldı da, filist Goliyatqa qaray júrdi.

41 Filist te, onıń aldında qalqanın kóterip júrgen nókeri de Dawıtqa qaray júrdi. 42 Goliyat Dawıtqa bastan-ayaq qarap shıǵıp, onı mensinbedi. Sebebi Dawıt qızıl júzli, sımbatlı jas jigit edi.

43 – Maǵan tayaq penen shıǵatuǵınday, men ne saǵan iyt pe edim? – dep, Goliyat óz qudaylarınıń atı menen Dawıttı náletledi. 44 Sońınan:

– Berman kel, deneńdi aspandaǵı quslar menen qır daladaǵı haywanlarǵa jem qılayın, – dedi.

45 Dawıt oǵan bılay dedi:

– Sen maǵan qılısh, nayza hám semser menen qarsı shıǵıp tursań. Al men sen masqaralaǵan Izrail áskerleriniń Qudayı, Álemniń Jaratqan Iyesiniń atı menen saǵan qarsı shıǵıp turman. 46 Búgin Jaratqan Iye seni maǵan táslim etedi. Seni óltirip, basıńdı deneńnen juda qılaman. Búgin filist áskerleriniń óliklerin kóktegi quslar menen jerdegi haywanlarǵa jemtik qılaman. Sonda pútkil jer júzi Izrailda Quday bar ekenin bilip aladı. 47 Bul jerdegilerdiń hámmesi Jaratqan Iyeniń qılısh hám nayza menen qutqarmaytuǵının bilip aladı. Sebebi bul urısta Jaratqan Iyeniń Ózi urısadı. Ol sizlerdi bizlerge táslim etedi.

48 Goliyat taslanbaqshı bolıp, Dawıtqa qaray júrdi. Dawıt ta onıń menen alısıw ushın, filistler sapına qaray tez juwırıp ketti. 49 Dawıt qolın dorbasına tıǵıp, bir tastı aldı da, saqpanına salıp, atıp jiberdi. Tas filisttiń qaq mańlayın tesip kirdi. Filist et betinen jerge jıǵıldı. 50 Solay etip, Dawıt filist Goliyattı saqpan hám tas penen jeńdi. Qolında qılıshı bolmasa da, onı óltirip, jerge qulattı. 51 Sońınan Dawıt juwırıp barıp, filisttiń ústine minip turdı. Onıń semserin qınınan suwırıp aldı da, onı óltirip, basın kesip aldı. Ózleriniń batırı bolǵan Goliyattıń ólgenin kórgen filistler qasha basladı. 52 Izrail hám Yahuda áskerleri tura kóterilip, filistlerdi Gattıń kirer awzına hám Ekron dárwazalarına shekem quwıp bardı. Shaarayımnan Gat hám Ekron qalalarına baratuǵın jolda filistlerdiń ólikleri jayrap jattı. 53 Filistlerdi quwıp bolıp qaytıp kelgen izraillılar filistlerdiń ordasın talan-taraj etti. 54 Dawıt filist Goliyattıń basın alıp, Erusalimge ákeldi, al onıń qural-jaraqların óz shatırına qoydı.

55 Shaul Dawıttıń Goliyat penen alısıwǵa shıqqanın kórgende, sárkárda Abnerden: «Abner, mına jas jigit kimniń balası?» – dep soraǵan edi. Al Abner patshaǵa: «Aldıńızda ant iship aytaman: patsham, men bilmeymen», – dep juwap bergen edi. 56 Sonda patsha oǵan: «Bul jigittiń kimniń ulı ekenin bil», – dep buyırǵan edi.

57 Dawıt Goliyattı óltirip, ordaǵa qaytıp keliwden-aq, Abner onı ertip, Shaulǵa apardı. Goliyattıń kesilgen basın Dawıt ele qolına uslap júrgen edi. 58 Shaul Dawıttan:

– Kimniń ulısań? – dep soradı.

Dawıt oǵan:

– Beytlehemli qulıńız Ishaydıń ulıman, – dep juwap berdi.