1Sa 2 | KaaIBT22L | STEP | Xanna bılay dep duwa etti: «Júregim Jaratqan Iyede yoshlanar, Onıń Ózi maǵan kúsh berdi. Dushpanlarım aldında tilim uzayıp, Onıń qutqarǵanına quwanaman.

‏ 1 Samuel 2

Xannanıń duwası

1 Xanna bılay dep duwa etti:

«Júregim Jaratqan Iyede yoshlanar,
Onıń Ózi maǵan kúsh berdi.
Dushpanlarım aldında tilim uzayıp,
Onıń qutqarǵanına quwanaman.
2 Hesh kim joq Jaratqan Iyedey muxaddes,
Awa, Sen sıyaqlı hesh kim joq, Jaratqan Iye!
Qorǵawshı jartas ta joq Qudayımız sıyaqlı!
3 Bunnan bılay menmensip sóylegendi toqtatıń,
Awzıńızdan tákabbir sózler shıqpasın.
Sebebi Jaratqan Iye hámmesin biliwshi Quday-ǵo,
Hár bir isti tárezige tartıwshı da Ol.
4 Kúshlilerdiń oq jayları sınar,
Kúshsizler kúshke tolar.
5 Toqlar nan ushın jallanıp,
Ashlar toyar,
Násilsizler jetewin tuwıp,
Kóp balalı hayallar biyperzent qalar.
6 Jaratqan Iye óltiredi de, tiriltedi de,
Óliler mákanına túsiredi de, shıǵarıp aladı da.
7 Ol kimisin jarlı qılıp, kimisin bayıtar,
Kimisin qulatıp, kimisin joqarılatar.
8 Jarlını topıraqtan kóterip alıp,
Biysharanı taslandı arasınan alıp shıǵar.
Otırǵızıp aqsúyekler menen,
Húrmet taxtın berer.
Óytkeni jerdiń tiykarı Jaratqan Iyeniń qolında,
Sol tiykar ústine Ol dúnyanı ornatqan.
9 Jaratqan Iye sadıq qullarınıń adımların qorǵar,
Al jamanlar qarańǵılıqta joq bolar,
Sebebi óz kúshi menen jeńiske erispes insan.
10 Jaratqan Iyege qarsı turǵanlar shıl-párshe bolar,
Jaratqan Iye olarǵa qarsı kóklerdi gúrkireter,
Pútkil dúnyanı Ol húkim qılar,
Óz patshasın kúshke toltırıp,
Maylaǵan adamın dańqqa eristirer».

11 Sońınan Elqana Ramaǵa, úyine qaytıp ketti. Al kishkene Samuel bolsa, ruwxaniy Eliydiń qolında Jaratqan Iyege xızmet ete basladı.

Eliydiń ullarınıń jaman isleri

12 – 13 Eliydiń ulları jaramas adamlar edi. Olar Jaratqan Iyeni mensinbedi hám xalıq aldındaǵı ruwxaniylik wazıypasına húrmetsizlik etti. Birew qurbanlıq shalıp, gósh qaynatıp atırǵanda, ruwxaniylerdiń xızmetshisi qolına úsh tisli shanıshqını alıp keletuǵın edi. 14 Ol shanıshqını shúlen qazanǵa, qazanǵa, tabaǵa yamasa tabaqqa tıǵıp, oǵan ilingenniń hámmesin ruwxaniy ushın alatuǵın edi. Olar Shiloǵa kelgen izraillılardıń hámmesine usılay isleytuǵın edi. 15 Hátte, qurbanlıqtıń mayları tútetip jandırıw ushın ajıratıp alınbastan burın ruwxaniydiń xızmetshisi kelip, qurbanlıq shalǵan adamǵa: «Ruwxaniyge quwırıw ushın shiyki gósh ber. Ol sennen pisken gósh emes, al shiyki gósh aladı», – deytuǵın edi. 16 Eger qurbanlıq shalǵan adam: «Dáslep maydı tútetip jandırayıq, sońınan qálegenińdi alarsań», – dese, xızmetshi oǵan: «Yaq, házir bereseń, bolmasa tartıp alaman», – deytuǵın edi. 17 Jaratqan Iyeniń názerinde jigitlerdiń islegen gúnası júdá awır edi. Óytkeni olar Jaratqan Iyege arnalǵan qurbanlıqlarǵa húrmetsizlik etti.

18 Sol arada jas Samuel zıǵır efod ^{▼▼ Efod – ádette ruwxaniylerdiń kiygen kiyimi. 28-ayattaǵı efod qımbat baha tawardan tigilgen hám bunı tek ǵana bas ruwxaniy kiygen.} kiyip, Jaratqan Iyeniń aldında xızmet etip júrdi. 19 Anası hár jılı kúyewi menen birge jıllıq qurbanlıq beriw ushın kelgende, tikken kishkene shapanın ulına ákelip beretuǵın edi. 20 Sonda Eliy Elqanaǵa hám onıń hayalına pátiyasın berip: «Tilep alıp, Jaratqan Iyege arnaǵan balańnıń ornına Jaratqan Iye saǵan bul hayaldan basqa balalar bersin», – deytuǵın edi. Sońınan olar úyine qaytatuǵın edi. 21 Jaratqan Iye Xannaǵa názerin túsirdi. Ol hámiledar bolıp, jáne úsh ul, eki qız tuwdı. Al kishkene Samuel Jaratqan Iye aldında ósip bardı.

22 Eliy júdá qartayıp qalǵan edi. Ol ullarınıń izraillılarǵa islegen barlıq isleri hám Ushırasıw shatırınıń aldında xızmet isleytuǵın hayallar menen jatqanı haqqında esitti. 23 Sonda Eliy ullarına bılay dedi:

– Ne ushın bunday islerdi islep atırsızlar? Men sizler islegen jawızlıqlar haqqında hámme adamlardan esittim. 24 Bul jaqsı emes, balalarım! Jaratqan Iyeniń xalqı arasında tarap ketken bul xabar – jaqsı xabar emes. 25 Eger adam adamǵa qarsı gúna islese, Quday ayıpker ushın táwelleshi boladı. Biraq Jaratqan Iyege qarsı gúna islegen adam ushın kim táwelleshi boladı?

Degen menen, olar ákesiniń sózlerine qulaq aspadı. Óytkeni Jaratqan Iye olardı óltiriwdi sheship qoyǵan edi.

Eliydiń ulları haqqında payǵambarshılıq

26 Sol arada óspirim Samuel ósip, Jaratqan Iyeniń de, xalıqtıń da kewline unap bardı. 27 Bir kúni Qudaydıń bir adamı Eliyge kelip, bılay dedi:

– Jaratqan Iye bılay deydi: «Babań hám onıń urpaqları Mısırda faraonnıń xalqına qul bolǵan waqıtta, Men olarǵa Ózimdi ashıp kórsetpegen be edim? 28 Qurbanlıq orınǵa barıw hám xosh iyisli zatlardı tútetip, efod kiyip júriw ushın pútkil Izrail urıwları arasınan tek seniń babańdı ǵana Ózime ruwxaniy etip tańlamadım ba? Jáne de, izraillılardıń pútkil sıyların da seniń ata-babalarıńnıń urpaqlarına bermedim be? 29 Solay eken, Meniń mákanım ushın ákeliwdi buyırǵan qurbanlıq hám sadaqalarǵa nege húrmetsizlik etesizler? Ne ushın xalqım Izraildıń bergen barlıq qurbanlıqlarınıń eń jaqsı jerlerin ózlerińiz jep semirip, nege ullarıńdı Mennen artıq kóreseń?» 30 Sonlıqtan Izraildıń Qudayı Jaratqan Iye bılay deydi: «Seniń xojalıǵıń hám seniń babańnıń urpaqları Maǵan máńgige xızmet etedi, – degen edim». Biraq endi Jaratqan Iye bılay deydi: «Endi bulay islewden awlaqpan. Sebebi Meni húrmetlegendi Men de húrmetleymen, al Meni húrmet etpegenler masqara boladı. 31 Mine, seniń hám babańnıń urpaǵınıń kúshin qurtatuǵın kúnlerim kiyatır. Solay etip, tuqımıńda hesh kim uzaq ómir súrmeydi. 32 Meniń Izrailǵa isleytuǵın jaqsılıǵıma qaramastan, sen Meniń mákanımda qıyınshılıq kóreseń. Endigiden bılay, tuqımıńda hesh kim uzaq ómir súrmeydi. 33 Kózlerińdi soqır qılıp, júregińdi qayǵıǵa toltırıw ushın, Meniń qurbanlıq ornımda seniń tuqımıńnan tek bir adamdı qaldıraman. Biraq basqa urpaqlarıńnıń hámmesi jaslay dúnyadan ótedi. 34 Eki ulıń Xofniy menen Pinexastıń bir kúnde óliwi seniń ushın bir nıshan boladı. 35 Men Ózime qálewlerimdi hám maqsetlerimdi orınlaytuǵın sadıq bir ruwxaniy qoyajaqpan. Ol Meniń maylaǵan patshamnıń aldında bárqulla xızmet etiwi ushın, onıń urpaǵın máńgige usı xızmetke qoyaman. 36 Sonda seniń urıwıńnan aman qalǵan hár bir adam bir bólek gúmis yamasa bir tislem nan ushın bas iyip kelip, nan tawıp jewi ushın, ózin qanday da bir diniy xızmetke qoyıwdı soraydı».