1Sa 24 | KaaIBT22L | STEP | Dawıt sol jerden ketip, En-Gediy úlkesindegi adam bara almaytuǵın jerlerde jasırınıp júrdi.

‏ 1 Samuel 24

Dawıttıń Shauldıń janın saqlap qalıwı

1 Dawıt sol jerden ketip, En-Gediy úlkesindegi adam bara almaytuǵın jerlerde jasırınıp júrdi. 2 Shaul filistler menen bolǵan urıstan qaytıp kelgende, Dawıttıń En-Gediy shólinde júrgeninen xabar taptı. 3 Shaul Dawıttı hám onıń adamların «Taw eshkisi» jartaslıǵınan izlew ushın, pútkil Izraildan úsh mıń aǵla ásker alıp, jolǵa shıqtı.

4 Jol jiyeginde qoy qorası bolıp, onıń janında bir úńgir bar edi. Shaul maydanlaw ushın úńgirge kirdi. Al sol úńgirdiń eń túpkirinde Dawıt penen onıń adamları otırǵan edi. 5 Adamları Dawıtqa:

– Jaratqan Iye saǵan: «Dushpanlarıńa qálegenińdi isley alıwıń ushın, olardı saǵan táslim etemen», – degen edi. Mine, búgin sol kún keldi, – dedi.

Sonda Dawıt ornınan turıp, bildirmey Shauldıń shapanınıń shalǵayınan kesip aldı. 6 Biraq Dawıt keyin ala Shauldıń shalǵayınan kesip alǵanı ushın, ózin ayıplı sezdi. 7 Dawıt óz adamlarına:

– Taqsırıma, Jaratqan Iyeniń maylaǵan adamına qol kóterip, oǵan bir nárse islewden Jaratqan Iyeniń Ózi saqlasın! Sebebi ol Jaratqan Iyeniń maylaǵan adamı, – dedi. 8 Dawıt usı sózleri menen adamlarına tıyım salıp, Shaulǵa qol tiygiziwge ruxsat bermedi. Al Shaul úńgirden shıǵıp, jolǵa tústi. 9 Dawıt ta Shauldıń izinshe úńgirden shıǵıp:

– Taqsır! – dep baqırdı. Shaul artına qaraǵanda, Dawıt et betinen jerge jıǵılıp, oǵan tájim etti. 10 Sońınan ol Shaulǵa bılay dedi:

– «Dawıt saǵan jamanlıq qılajaq», – degenlerdiń sózlerine nege qulaq salasız? 11 Búgin Jaratqan Iyeniń sizdi qolıma tutıp bergenin kózińiz benen kórip turıpsız. Bazılar meniń sizdi óltiriwimdi qálegen edi. Biraq meniń sizge janım ashıp: «Taqsırıma qol tiygizbeymen, óytkeni ol Jaratqan Iyeniń maylaǵan adamı», – dedim. 12 Háy áke, minekey, shapanıńızdıń shalǵayınan kesip alınǵan qolımdaǵı mına qıyındıǵa qarań! Men siziń shapanıńızdıń shalǵayınan kesip aldım, biraq sizdi óltirmedim. Bunnan kewlimde jamanlıqtıń hám zulımlıqtıń joq ekenin bilip alıń. Men sizge jamanlıq qılmasam da, siz meni óltirmekshi bolıp atırsız. 13 Jaratqan Iye aramızda tórelik etsin hám meniń óshimdi sizden Ol alsın. Biraq men sizge qol kótermeymen. 14 Ata-babalarımız: «Jamanlıq jaman adamlardan shıǵadı», – degeni sıyaqlı, men sizge qol kótermeymen. 15 Izrail patshası kimge qarsı shıqtı? Siz kimdi quwdalap atırsız? Ólgen iytti yamasa bir búrgeni emes pe? 16 Jaratqan Iye bizlerge qazılıq etip, qay birimizdiń haq ekenimizdi sheship bersin. Jaratqan Iye dawımdı qarap shıqsın hám meni jaqlap, siziń qolıńızdan qutqarsın.

17 Dawıt sózin tamamlaǵanda, Shaul oǵan:

– Dawıt, ulım! Bul seniń dawısıń ba? – dep soradı hám ókirip jılay basladı. 18 Sońınan ol bılay dedi:

– Sen maǵan qaraǵanda ádilirekseń. Men saǵan jamanlıq islesem de, sen maǵan jaqsılıq penen juwap berdiń. 19 Búgin sen maǵan jaqsı qatnasta ekenligińdi dálillediń. Jaratqan Iye meni qolıńa tutıp berse de, meni óltirmediń. 20 Dushpanın tutıp alǵan qaysı bir adam onı aman jiberedi? Búgin maǵan islegen jaqsılıǵıń ushın, Jaratqan Iye saǵan jaqsılıq sıylasın! 21 Endi men seniń sózsiz patsha bolatuǵınıńdı bildim. Izrail patshalıǵı seniń qolıńda bekkem boladı. 22 Endi mennen keyin urpaqlarımdı joq qılmaytuǵınıńdı, ákemniń xojalıǵınan atımdı óshirmeytuǵınıńdı aytıp, Jaratqan Iye haqı ant ish.

23 Dawıt Shaulǵa ant berdi. Sonnan keyin, Shaul úyine qayttı, al Dawıt hám onıń adamları panalaǵan jerlerine ketti.