1Sa 3 | KaaIBT22L | STEP | Óspirim Samuel Eliydiń qolı astında Jaratqan Iyege xızmet etetuǵın edi. Ol kúnleri Jaratqan Iyeniń sózi siyrek, ayanları da az boldı.

‏ 1 Samuel 3

Qudaydıń Samueldi shaqırıwı

1 Óspirim Samuel Eliydiń qolı astında Jaratqan Iyege xızmet etetuǵın edi. Ol kúnleri Jaratqan Iyeniń sózi siyrek, ayanları da az boldı. 2 Bir kúni túnde Eliy ornında jatırǵan edi. Onıń kózleri júdá ázzilep qalǵan bolıp, zorǵa kóretuǵın edi. 3 Al Samuel bolsa, Qudaydıń sandıǵı turǵan Jaratqan Iyeniń Ibadatxanasında jatırǵan edi. Qudaydıń shırası ele sónbegen edi. 4 Sonda Jaratqan Iye Samueldi shaqırdı. Samuel Oǵan:

– Lábbáy, – dep juwap berdi.

5 Sońınan Eliyge juwırıp barıp:

– Shaqırdıńız ba? Men keldim, – dedi.

Biraq Eliy:

– Men seni shaqırmadım. Barıp, ornıńa jat, – dedi. Samuel barıp, ornına jattı. 6 Jaratqan Iye jáne:

– Samuel! – dep shaqırdı. Samuel ornınan turdı da, Eliyge barıp:

– Meni shaqırdıńız ba? Men keldim, – dedi.

Eliy oǵan:

– Shaqırmadım, balam. Barıp, ornıńa jat, – dedi.

7 Samuel Jaratqan Iyeniń dawısın tanımaytuǵın edi. Sebebi Jaratqan Iyeniń sózi oǵan ele ayan bolmaǵan edi.

8 Jaratqan Iye Samueldi úshinshi márte shaqırdı. Samuel ornınan turdı da, Eliyge barıp:

– Meni shaqırdıńız ba? Men keldim, – dedi.

Sonda Eliy balanı Jaratqan Iyeniń shaqırǵanın túsindi. 9 Ol Samuelge:

– Barıp, ornıńa jat. Eger Ol seni jáne shaqırsa: «Jaratqan Iye! Ayta ber, qulıń tıńlap tur», – dep ayt, – dedi.

Samuel barıp, ornına jattı. 10 Jaratqan Iye kelip, sol jerde turdı hám burınǵıday etip:

– Samuel, Samuel! – dep shaqırdı.

Samuel Oǵan:

– Ayta ber, qulıń tıńlap tur, – dep juwap berdi.

11 Sonda Jaratqan Iye Samuelge bılay dedi:

– Men Izrailda esitken hár bir adamnıń húreyin ushıratuǵın bir nárse isleyjaqpan. 12 Sol kúni Eliydiń xojalıǵına qarsı aytqanlarımnıń hámmesin basınan ayaǵına shekem júzege asıraman. 13 Eliyge ózi biletuǵın gúna sebepli xojalıǵın máńgige jazalaytuǵınımdı xabarlaǵan edim. Onıń ulları Qudayǵa til tiygizse de, ol ullarına tıyım salmadı. 14 Sonlıqtan Men: «Eliydiń xojalıǵınıń ayıbı hesh qashan hesh qanday qurbanlıq penen ótelmeydi», – dep onıń xojalıǵı haqqında ant ishtim.

15 Samuel azanǵa shekem jattı, sońınan Jaratqan Iyeniń Úyiniń qapıların ashtı. Ol kórgen ayanın Eliyge aytıwǵa qorqtı. 16 Biraq Eliy onı:

– Balam, Samuel! – dep shaqırdı.

Samuel oǵan:

– Lábbáy, – dep juwap berdi.

17 Eliy Samuelge:

– Jaratqan Iye saǵan nelerdi ayttı? Mennen hesh nárseni jasırma. Eger Onıń saǵan aytqanlarınan birin jasırıp qalsań, Ol seni jazalaǵan ústine jazalasın, – dedi.

18 Samuel hesh nárseni jasırmastan, oǵan hámmesin aytıp berdi. Sonda Eliy:

– Ol Jaratqan Iye-ǵo. Neni maqul kórse, sonı islesin, – dedi.

Samueldiń payǵambarlıq xızmetiniń baslanıwı

19 Samuel ósip bardı. Jaratqan Iye onıń menen birge edi. Jaratqan Iyeniń oǵan aytqan sózleriniń birewi de orınlanbay qalmadı. 20 Dannan Beer-Shebaǵa shekemgi pútkil Izrail xalqı Samueldiń Jaratqan Iyeniń payǵambarı bolıp belgilengenin bildi. 21 Jaratqan Iye Shiloda kóriniwin dawam etti. Sol jerde Ol Óz sózi arqalı Samuelge Ózin tanıtqan edi.