‏ 1 Samuel 30

Dawıttıń amaleklerdi jeńiwi

1Dawıt hám onıń adamları úshinshi kúni Siklag qalasına jetip keldi. Sol arada amalekler Negebke hám Siklagqa shabıwıl jasap, Siklagtı órtep jibergen edi. 2Olar hesh kimdi óltirmey, tek hayallardı hám sol jerde bolǵan kishkenesinen úlkenine deyinginiń hámmesin tutqın etip, ózleri menen birge alıp ketken edi.

3Dawıt adamları menen ol jerge jetip barǵanda, qalanıń órtep jiberilgenin, hayalları, ulları hám qızlarınıń tutqınǵa alınǵanın bildi. 4Olar haldan tayǵansha, dad salıp jıladı. 5Dawıttıń eki hayalı, izreelli Axinoam hám karmelli Nabaldıń jesiri Abigayıl da tutqın etilgen edi. 6Dawıt qıyın jaǵdayda qaldı. Sebebi hár bir adam ulları hám qızları ushın qayǵırıp: «Dawıttı tas boran qılıp óltiremiz», – desti. Biraq Dawıt óz Qudayı Jaratqan Iyeden kúsh aldı. 7Ol Aximelex ulı ruwxaniy Abiyatarǵa:

– Maǵan efodtı alıp kel, – dedi. Abiyatar efodtı alıp keldi.
8Dawıt Jaratqan Iyeden:

– Bul basqınshılardı quwıp barsam, olarǵa jete alaman ba? – dep soradı.

Jaratqan Iye oǵan:

– Izinen quw, álbette, olarǵa jetip alıp, tutqınlardı azat eteseń, – dep juwap berdi.

9Solay etip, Dawıt janındaǵı altı júz adam menen jolǵa shıǵıp, Besor sayınıń jaǵasına keldi. Olardıń haldan tayǵanları sol jerde qaldı. 10Al Dawıttıń ózi tórt júz adam menen basqınshılardı quwıwdı dawam etti. Saydı kesip ótiwge shaması kelmegen eki júz adam sol jerde qaldı.

11Olar qır daladan bir mısırlını tawıp alıp, Dawıttıń aldına alıp keldi. Oǵan ishiwge suw hám jewge azıq berdi. 12Jáne de, oǵan keptirip nıǵızlanǵan bir bólek ánjir menen eki bólek kishmish berdi. Sol adam jep, hállenip aldı. Ol úsh kún, úsh tún duz tatpaǵan hám suw da ishpegen edi. 13Dawıt onnan:

– Sen kimniń qulısań? Qay jerdenseń? – dep soradı.

Jigit bılay dep juwap berdi:

– Men mısırlıman, bir amalektiń qulı edim. Úsh kún burın nawqaslanıp qalǵanlıǵım sebepli, xojayınım meni taslap ketti.
14Bizler keretlerdiń qubla shegarasına, yaǵnıy Yahuda jerlerine hám Kalebtiń qubla tárepine shabıwıl jasadıq. Al Siklag qalasın órtep jiberdik.

15Dawıt onnan:

– Meni sol basqınshılarǵa alıp bara alasań ba? – dep soradı.

Jigit oǵan:

– Meni óltirmeytuǵınıńızdı hám xojayınımnıń qolına tapsırmaytuǵınıńızdı aytıp, Quday haqı ant ishseńiz, men sizdi sol basqınshılarǵa alıp baraman, – dep juwap berdi.

16Solay etip, mısırlı Dawıtqa jol kórsetip ketti. Basqınshılar dógerekke jayılıp, filistlerdiń jerinen hám Yahudadan basıp alǵan úlken oljalarınan iship-jep máslik qurıp atırǵan edi. 17Dawıt erteńine tań azannan kún batqanǵa deyin olardı qırdı. Basqınshılardıń túyelerge minip qashqan tórt júz jigitinen basqa birde birewi qutılıp kete almadı. 18Dawıt amalekler alıp ketken nárselerdiń hámmesin, sonday-aq óziniń eki hayalın da qutqardı. 19Jaslar, ǵarrılar, ullar, qızlar, oljalanǵan mallar, qullası, amaleklerdiń alıp ketkenlerinen hesh biri joǵalmadı. Dawıt hámmesin qaytarıp aldı. 20Ol pútkil qoy hám qara mallardı da aldı. Dawıttıń adamları olardı óz mallarınıń aldına salıp, aydap baratırıp: «Bul Dawıttıń oljası», – dep aytatuǵın edi.

21Sonnan soń, Dawıt izine eriwge halları kelmey, Besor sayınıń jaǵasında qalǵan eki júz adamnıń janına bardı. Olar da Dawıttı hám onıń janındaǵılardı kútip alıwǵa shıqtı. Dawıt jaqınlasıp, olar menen amanlastı. 22Biraq Dawıt penen ketken jaman hám ońbaǵan adamlardıń hámmesi:

– Bular bizler menen birge barmaǵanlıqtan, oljaǵa alınǵan nárselerden olarǵa pay bermeymiz. Hár biri tek óz hayalın hám balaların alıp ketsin, – dedi.

23Biraq Dawıt olarǵa bılay dedi:

– Yaq, tuwısqanlarım! Jaratqan Iyeniń bizge bergenlerine bulay islemeńler. Ol bizlerdi qorǵadı hám bizlerge shabıwıl jasaǵan basqınshılardı qolımızǵa tutıp berdi.
24Sizlerdiń bul sózlerińizdi kim qabıl etedi? Sawashqa barǵanlar menen júklerdiń qasında qalǵanlardıń payı teńdey boladı. Hár bir nárse teńdey bólip beriledi.

25Sol kúnnen baslap, Dawıt bunı Izrail ushın dástúrge aylandırıp, qaǵıyda etip bekitti. Ol házirge deyin saqlanıp kelmekte.

26Dawıt Siklagqa qaytıp kelgennen soń, dosları bolǵan Yahuda aqsaqallarına: «Mine, bul Jaratqan Iyeniń dushpanlarınan alınǵan oljalardan sizlerge sawǵa», – dep alınǵan oljalardan berip jiberdi. 27Ol sawǵalardı Beyt-El, Negebtegi Ramot, Yattir, 28Aroer, Sifmot, Eshtemoa, 29hám Raxalda bolǵanlarǵa, Eraxmeel tiyresiniń hám kenlerdiń qalalarında bolǵanlarǵa, 30Xorma, Bor-Ashan, Atax 31hám Xebronda bolǵanlarǵa, sonday-aq, ózi adamları menen birge gezgen barlıq jerdegilerge jiberdi.
Copyright information for KaaIBT22L