1Sa 4 | KaaIBT22L | STEP | Samueldiń sózi pútkil Izrailǵa jayıldı. Sol kúnleri izraillılar filistler menen urısıw ushın jolǵa shıqtı. Izraillılar Eben-Ezerge, filistler Afekke ordaların qurdı.

‏ 1 Samuel 4

1 Samueldiń sózi pútkil Izrailǵa jayıldı.

Kelisim sandıǵınıń dushpan qolına túsiwi

Sol kúnleri izraillılar filistler menen urısıw ushın jolǵa shıqtı. Izraillılar Eben-Ezerge, filistler Afekke ordaların qurdı. 2 Filistler izraillılarǵa qarsı sawash maydanına tústi. Sawash háwij alǵanda, filistler izraillılardı jeńiliske ushırattı. Sawashta izraillılardıń tórt mıńǵa shamalas adamı qaza taptı. 3 Áskerler ordaǵa qaytıp kelgende, Izrail aqsaqalları: «Ne ushın búgin Jaratqan Iye bizlerdiń filistlerden jeńiliwimizge jol qoydı? Jaratqan Iyeniń Kelisim sandıǵın Shilodan usı jerge alıp keleyik. Ol aramızda bolıp, bizlerdi dushpanlarımızdıń qolınan qutqarsın», – dedi.

4 Solay etip, xalıq Shiloǵa adamlardı jiberdi. Olar barıp, kerublar ^{▼▼ Kerub – qanatlı ruwxıy barlıq.} arasında taxtta otırǵan Álemniń Jaratqan Iyesiniń Kelisim sandıǵın alıp keldi. Eliydiń eki ulı Xofniy menen Pinexas ta Qudaydıń Kelisim sandıǵınıń janında edi. 5 Jaratqan Iyeniń Kelisim sandıǵı ordaǵa ákelingende, pútkil izraillılardıń qattı baqırısqan dawıslarınan jer lárzege keldi. 6 Filistler baqırıslardı esitip: «Evreyler ordasında nege bunshelli baqırıs bolıp atır eken?» – desti. Olar Jaratqan Iyeniń sandıǵınıń ordaǵa ákelingenin bilgende, 7 qorqıp ketip bılay dedi: «Olardıń qudayları ordaǵa kelipti. Qurıp qaldıq! Burın hesh qashan bunday nárse bolıp kórmegen edi. 8 Qurıp qaldıq! Bul kúshli qudaylardıń qolınan bizlerdi kim qutqaradı? Olar shólde mısırlılardı túrli bálelerge ushıratqan qudaylar-ǵo. 9 Bekkem bolıńlar, filistler! Márt bolıńlar! Bolmasa, evreylerdiń sizlerge qul bolǵanı sıyaqlı, sizler de olarǵa qul bolasızlar. Márt bolıp, sawashqa túsińler».

10 Solay etip, filistler sawashqa túsip, izraillılardı jeńdi. Izraillılardıń hár biri óz shatırına qaray qashtı. Qırǵınǵa ushıraǵanı sonshelli, izraillılar otız mıń piyada áskerinen ayırıldı. 11 Qudaydıń sandıǵı qolǵa tústi, al Eliydiń eki ulı Xofniy hám Pinexas qaza taptı.

Eliydiń ólimi

12 Benyamin urıwınan bir adam sawash maydanınan qashıp shıǵıp, sol kúnniń ózinde Shiloǵa jetip keldi. Ol qayǵıdan kiyimlerin jırtıp, basına topıraq shashqan edi. 13 Sol adam jetip kelgende, Qudaydıń sandıǵın oylap, júregi ezilgen Eliy jol shetindegi otırǵıshta jolǵa qarap otırǵan edi. Adam qalaǵa kirip, bolǵan waqıyanı aytıp bergende, qaladaǵılardıń hámmesi dad salıp baqırıstı. 14 Eliy dad salıp baqırısqandı esitip:

– Nege shawqım kóterilip atır? – dep soradı.

Xabarshı bolǵan waqıyanı aytıp beriw ushın dárriw Eliydiń janına keldi. 15 Sonda Eliy toqsan segiz jasta bolıp, kózleri ázzilep, kórmey qalǵan edi. 16 Xabarshı Eliyge:

– Men sawash maydanınan kiyatırman. Házir ǵana sol jerden qashıp shıqtım, – dedi.

Eliy onnan:

– Balam, ne boldı? – dep soradı.

17 Xabarshı Eliyge:

– Izraillılar filistlerdiń aldına túsip qashtı. Áskerler úlken qırǵınǵa ushıradı. Eki ulıńız Xofniy menen Pinexas qaza taptı, al Qudaydıń sandıǵı qolǵa tústi, – dedi.

18 Xabarshı Qudaydıń sandıǵı tuwralı aytqanda, Eliy otırǵıshtan shalqasına túsip, qala dárwazasınıń qasına quladı. Ol júdá ǵarrı hám semiz bolǵanlıqtan julını úzilip, jan tapsırdı. Eliy Izrailǵa qırıq jıl biylik etken edi.

19 Sol waqıtta Eliydiń kelini, Pinexastıń hayalı júkli bolıp, tuwatuǵın waqtı shamalasqan edi. Hayal Qudaydıń sandıǵınıń qolǵa túskeni, qáyin atası hám kúyewiniń ólgeni haqqında esitkende, birden tolǵaǵı tuttı da, dizerlep otırıp bosandı. 20 Járdem bergen hayallar oǵan ólimi aldınan:

– Qorqpa, ullı boldıń, – dedi. Biraq ol juwap ta bermedi, dıqqat ta awdarmadı. 21 Qudaydıń sandıǵınıń qolǵa túsip, qáyin atası hám kúyewiniń ólgenligi sebepli hayal: «Ullılıq Izraildı tárk etti», – dep ulına Ixabod ^{▼▼ Ixabod – «ullılıq joq» degendi bildiredi.} dep at qoydı. 22 Ol:

– Ullılıq Izraildı tárk etti. Sebebi Qudaydıń sandıǵı qolǵa tústi, – dedi.