1Sa 5 | KaaIBT22L | STEP | Filistler Qudaydıń sandıǵın qolǵa kirgizgennen soń, onı Eben-Ezerdegi sawash maydanınan Ashdodqa alıp keldi.

‏ 1 Samuel 5

Kelisim sandıǵı filistler qolında

1 Filistler Qudaydıń sandıǵın qolǵa kirgizgennen soń, onı Eben-Ezerdegi sawash maydanınan Ashdodqa alıp keldi. 2 Olar Qudaydıń sandıǵın Dagonnıń butxanasına aparıp, onı Dagonnıń músininiń janına qoydı. 3 Erteńine azanda erte turǵan ashdodlılar Dagonnıń Jaratqan Iyeniń sandıǵınıń aldında et betinen jıǵılıp jatırǵanın kórdi. Olar Dagondı aldı da, onı óz ornına qoydı. 4 Biraq olar erteńine azanda turǵanda, Dagonnıń jáne Jaratqan Iyeniń sandıǵınıń aldında et betinen jıǵılıp jatırǵanın kórdi. Bul rette onıń bası hám eki qolı julınıp, bosaǵada jatırǵan edi. Onıń tek gewdesi ǵana pútin qalǵan edi. 5 Sonlıqtan Dagonnıń ruwxaniyleri de, Ashdodtaǵı Dagonnıń butxanasına kelgenlerdiń hámmesi de usı kúnge shekem ol jatqan bosaǵanı baspaydı.

6 Jaratqan Iye ashdodlılardı hám dógeregindegi xalıqtı awır jazaladı. Olardı shıyqan menen jazalap, qıyınshılıqqa duwshar etti. 7 Bolıp atırǵan waqıyalardı kórgen Ashdod xalqı: «Izraildıń Qudayınıń sandıǵı bizlerde qalmasın, sebebi Ol bizlerdi de, qudayımız Dagondı da awır jazalap atır», – dedi. 8 Sonlıqtan olar adam jiberip, pútkil filist húkimdarların shaqırttı hám olardan:

– Izraildıń Qudayınıń sandıǵın ne qılayıq? – dep soradı.

Olar:

– Sandıq Gatqa aparılsın, – dedi.

Solay etip, olar Izraildıń Qudayınıń sandıǵın Gatqa apardı.

9 Biraq sandıq Gatqa aparılǵannan soń, Jaratqan Iye sol qalanı da jazaladı. Qalanı kúshli qorqınısh biylep aldı. Jaratqan Iye pútkil qala xalqın, kishkenesinen úlkenine shekem jazaladı. Olarǵa da shıyqanlar shıǵa basladı. 10 Sol sebepli olar Qudaydıń sandıǵın Ekronǵa jiberdi.

Sandıq qalaǵa kirer-kirmesten, ekronlılar: «Bizlerdi hám xalqımızdı joq qılıw ushın, Izraildıń Qudayınıń sandıǵın bizlerge alıp keldińler!» – dep baqırıstı. 11 Olar pútkil filist húkimdarların toplap: «Izraildıń Qudayınıń sandıǵın bul jerden alıp ketińler. Bizlerdi de, xalqımızdı da joq qılmawı ushın, ol óz jerine qaytarılsın», – dedi. Sebebi pútkil qalanı ólim qorqınıshı biylep alǵan edi. Qudaydıń olarǵa bergen jazası júdá awır edi. 12 Tiri qalǵanlarǵa shıyqanlar shıqtı. Qala xalqınıń dadı aspanǵa jetti.