1Sa 6 | KaaIBT22L | STEP | Jaratqan Iyeniń sandıǵı filistler elinde jeti ay bolǵannan soń,

‏ 1 Samuel 6

Kelisim sandıǵınıń Izrailǵa qaytarılıwı

1 Jaratqan Iyeniń sandıǵı filistler elinde jeti ay bolǵannan soń, 2 filistler ruwxaniylerdi hám palkerlerdi shaqırtıp, olarǵa:

– Jaratqan Iyeniń sandıǵın ne qılsaq eken? Onı óz ornına qalay qaytarıwımız kerekligin bizlerge aytıńlar, – dedi.

3 Olar:

– Eger sizler Izraildıń Qudayınıń sandıǵın izge qaytarmaqshı bolsańız, onı bos jibermey, oǵan qosa ayıbıńızdı juwıw ushın sıy berip jiberińler. Sonda shıpa tabasızlar hám Onıń sizlerdi ne ushın jazalap atırǵanın bilip alasızlar, – dedi.

4 Sonda filistler:

– Ayıbımızdı juwıw ushın Oǵan qanday sıy jibereyik? – dep soradı.

Ruwxaniyler hám palkerler bılay dep juwap berdi:

– Sizler jiberetuǵın sıylar filist húkimdarlarınıń sanına qaray bes shıyqannıń hám bes tıshqannıń altın músinlerinen ibarat. Óytkeni sizler de, húkimdarlarıńız da birdey jazaǵa tartılǵansız. 5 Bunıń ushın shıyqanlardıń hám jerińizdi wayran etken tıshqanlardıń músinlerin isleń hám Izraildıń Qudayın ullılań. Múmkin, sonda Ol sizlerdi, qudaylarıńızdı hám jerińizdi jazalawdı toqtatar. 6 Ne ushın mısırlılar hám faraon sıyaqlı qaysarlıq qılasızlar? Quday mısırlılardıń janına tiygende, olar Izrail xalqın bosatıp jibermedi me? 7 Endi jańa bir arba isletińler de, birinshi ret tóllegen hám hesh qashan arbaǵa jegilmegen eki qashardı alıp, olardı arbaǵa jegińler. Qasharlardıń buzawların ayırıp alıp, qoraǵa aparıńlar. 8 Jaratqan Iyeniń sandıǵın arbanıń ústine qoyıńlar. Ayıbıńızdı juwıw ushın Oǵan jiberip atırǵan altın zatlarıńızdı qutıǵa salıp, sandıqtıń janına jaylastırıńlar. Sońınan arbanı aydap jiberińler, kete bersin. 9 Biraq izinen gúzetip barıńlar. Eger arba óz eline, Beyt-Shemeshke qaray betlese, onda bul ullı apatshılıqtı bizlerge Jaratqan Iyeniń Ózi jibergen boladı. Eger arba basqa tárepke jol alsa, onda bul apatshılıqtıń Onnan jiberilmegenin, al oǵan tosattan duwshar bolǵanımızdı bilip alamız.

10 Adamlar aytılǵanday isledi. Olar birinshi ret tóllegen eki qashardı arbaǵa jekti, al buzawların qoraǵa qamap tasladı. 11 Jaratqan Iyeniń sandıǵı menen birge ishine shıyqanlardıń hám tıshqanlardıń altın músinleri salınǵan qutını arbaǵa saldı. 12 Sonda qasharlar tuwrı Beyt-Shemeshke qaray jol aldı. Olar ońǵa da, solǵa da burılmastan, móńirewi menen alǵa ilgeriledi. Al filist húkimdarları bolsa, Beyt-Shemeshtiń shegarasına deyin olarǵa erip keldi.

13 Sol waqıtta Beyt-Shemesh xalqı oypatlıqta biyday orıp atırǵan edi. Olar basların kóterip qarap, sandıqtı kórgende, quwanıp ketti. 14 – 15 Arba beyt-shemeshli Eshuanıń atızına kirip, sol jerdegi úlken bir tastıń janında toqtadı. Lebiyliler Jaratqan Iyeniń sandıǵın hám altın zatlar salınǵan qutını arbadan túsirip, úlken tastıń ústine qoydı. Beyt-shemeshliler arbanıń aǵashların otın etip jardı da, qasharlardı Jaratqan Iyege arnap jandırılatuǵın qurbanlıq etip berdi. Sol kúni beyt-shemeshliler Jaratqan Iyege arnap jandırılatuǵın qurbanlıqlar berip, basqa qurbanlıqlar da shaldı. 16 Filistlerdiń bes húkimdarı bolıp ótkenlerdi kórgennen soń, sol kúni Ekronǵa qaytıp ketti.

17 Filistler ayıbın juwıw ushın sıy retinde Ashdod, Gaza, Ashkelon, Gat hám Ekron qalaları ushın Jaratqan Iyege bir-birden shıyqanlardıń altın músinlerin jibergen edi. 18 Al altınnan islengen tıshqan músinleri bolsa, bes filist húkimdarlarına qaraslı bolǵan qorǵan qalalar menen qosa dógeregindegi awıllardıń sanına tuwrı keletuǵın edi. Ústine Jaratqan Iyeniń sandıǵı qoyılǵan sol úlken tas búginge deyin beyt-shemeshli Eshuanıń atızında gúwalıq bolıp tur. 19 Beyt-shemeshlilerden bazıları Jaratqan Iyeniń sandıǵınıń ishine úńilgen edi. Sonıń ushın Jaratqan Iye olardı jazalap, jetpis ^{▼▼ jetpis – Bazı evreyshe qoljazbalardan. Evreyshe qoljazbalardıń kópshiliginde hám áyyemgi grekshe awdarmada «eliw mıń jetpis».} adamdı joq qıldı. Xalıq Jaratqan Iyeniń ózlerine bergen bul awır jazası sebepli aza tuttı. 20 Beyt-Shemesh xalqı: «Bul muxaddes Qudaydıń, Jaratqan Iyeniń aldında kim tura aladı? Sandıq bizlerden kimge aparılıwı tiyis?» – dep soradı. 21 Olar Kiryat-Yarimde jasawshılarǵa xabarshılar jiberip: «Filistler Jaratqan Iyeniń sandıǵın qaytarıp jiberipti, kelip, onı alıp ketińler», – dedi.