1Sa 7 | KaaIBT22L | STEP | Solay etip, Kiryat-Yarimniń xalqı kelip, Jaratqan Iyeniń sandıǵın aldı da, onı tóbeshiktegi Abinadabtıń úyine apardı. Onıń ulı Elazardı Jaratqan Iyeniń sandıǵına qaraw ushın tayınladı.

‏ 1 Samuel 7

1 Solay etip, Kiryat-Yarimniń xalqı kelip, Jaratqan Iyeniń sandıǵın aldı da, onı tóbeshiktegi Abinadabtıń úyine apardı. Onıń ulı Elazardı Jaratqan Iyeniń sandıǵına qaraw ushın tayınladı.

Samueldiń Izrailǵa biylik etiwi

2 Sandıq uzaq waqıt, jigirma jıl dawamında Kiryat-Yarimde qaldı. Sol waqıt ishinde pútkil Izrail xalqı qayǵıǵa batıp, Jaratqan Iyege intizar boldı.

3 Samuel pútkil Izrail xalqına bılay dedi:

– Eger Jaratqan Iyege shın júrekten júz burmaqshı bolsańız, onda ózlerińizdegi basqa qudaylardıń hám Ashtartanıń músinlerin joq qılıńlar. Ózlerińizdi Jaratqan Iyege baǵıshlap, tek Oǵan xızmet etińler. Sonda Ol sizlerdi filistlerdiń qolınan qutqaradı.

4 Solay etip, izraillılar Baaldıń hám Ashtartanıń músinlerin joq qılıp, jalǵız Jaratqan Iyege xızmet ete basladı.

5 Sonda Samuel:

– Pútkil izraillılardı Mispaǵa jıynańlar, men sizler ushın Jaratqan Iyege jalbarınaman, – dedi. 6 Mispaǵa jıynalǵan izraillılar qudıqtan suw alıp, onı Jaratqan Iyege arnap tókti. Olar sol kúni oraza tutıp: «Jaratqan Iyege qarsı gúna isledik», – dedi. Samuel Mispada Izrail xalqına biylik etti.

7 Filistler Izrail xalqınıń Mispaǵa toplanǵanın esitkende, filist húkimdarları izraillılarǵa qarsı hújimge atlandı. Izraillılar bunı esitkende, filistlerden qorqtı. 8 Olar Samuelge:

– Bizlerdi filistlerdiń qolınan qutqarıwı ushın Qudayımız Jaratqan Iyege tınbay jalbarın, – dedi.

9 Sonda Samuel ele sútten shıqpaǵan bir qozını alıp, onı Jaratqan Iyege arnap tolıǵı menen jandırılatuǵın qurbanlıq etip berdi. Samuel Izrail xalqı ushın Jaratqan Iyege jalbarındı. Jaratqan Iye de oǵan juwap berdi.

10 Samuel qurbanlıqtı jandırıp atırǵanda, filistler izraillılarǵa hújim qılıw ushın jaqınlasıp qalǵan edi. Biraq sol waqıtta Jaratqan Iye kúshli dawıs penen gúrkirep, filistlerdi qattı albırattı hám olar izraillılardıń aldında kúl-talqan boldı. 11 Mispadan shıqqan izraillılar filistlerdiń izinen quwıp, olardı Beyt-Kardıń tómengi jaǵına shekem óltirip bardı.

12 Samuel bir tas alıp, onı Mispa menen Shenniń arasına ornattı. Ol: «Jaratqan Iye bizlerge usı jerge deyin járdem berdi», – dep tasqa Eben-Ezer ^{▼▼ Eben-Ezer – «járdem tası» degendi bildiredi.} dep at qoydı. 13 Solay etip, jeńiliske ushıraǵan filistler qaytıp Izrail jerine hújim jasamaytuǵın boldı. Samueldiń kóziniń tirisinde Jaratqan Iye filistlerge qarsı turdı. 14 Ekronnan Gatqa shekemgi filistlerdiń basıp alǵan qalaları izraillılarǵa qaytarıp berildi. Izraillılar olardıń átirapındaǵı jerlerdi de filistlerdiń qolınan qutqardı. Izrail hám amor xalqı arasında paraxatshılıq ornadı.

15 Samuel pútkil ómiri boyı Izrailǵa biylik etti. 16 Ol hár jılı Beyt-Eldi, Gilgaldı hám Mispanı aylanıp shıǵatuǵın, bul qalalarda turıp, pútkil Izrailǵa biylik etetuǵın edi. 17 Sońınan Ramadaǵı óz úyine qaytıp ketetuǵın hám sol jerden Izrailǵa biylik etetuǵın edi. Ol sol jerde Jaratqan Iyege arnap qurbanlıq orın qurdı.