1Sa 8 | KaaIBT22L | STEP | Samuel qartayǵan shaǵında, óziniń ulların Izrailǵa biyler etip qoydı.

‏ 1 Samuel 8

Izrail xalqınıń patsha talap etiwi

1 Samuel qartayǵan shaǵında, óziniń ulların Izrailǵa biyler etip qoydı. 2 Tuńǵısh ulınıń atı Ioel, ekinshisiniń atı Abiya bolıp, olar Beer-Shebada biylik etti. 3 Biraq ulları ákesiniń jolınan júrmedi. Olar haram paydaǵa berilip, para alatuǵın hám ádillikti burmalaytuǵın edi.

4 Sonlıqtan pútkil Izrail aqsaqalları jıynalıp, Ramadaǵı Samueldiń aldına bardı. 5 Olar Samuelge:

– Mine, sen de qartaydıń. Ullarıń da seniń jolıńnan júrmey atır. Sonıń ushın basqa xalıqlarda bolǵanı sıyaqlı, bizlerge biylik etetuǵın bir patsha qoyıp ber, – dedi.

6 Olardıń: «Bizlerge biylik etetuǵın bir patsha qoyıp ber», – degen sózleri Samuelge unamadı. Sol sebepli ol Jaratqan Iyege duwa etti. 7 Sonda Jaratqan Iye Samuelge bılay dep juwap berdi:

– Xalıqtıń saǵan aytıp atırǵan sózleriniń hámmesin tıńla. Sebebi olar sennen emes, al ózleriniń patshası bolǵan Mennen waz keshti. 8 Olardı Mısırdan alıp shıqqan kúnimnen baslap, usı kúnge shekem Maǵan ne qılǵan bolsa, saǵan da sonı islep atır. Olar Meni taslap, basqa qudaylarǵa xızmet etken edi. 9 Endi olarǵa qulaq sal. Biraq olarǵa ózleriniń ústinen patshalıq etetuǵın patshanıń huqıqları tuwralı bildirip, qatań eskert.

10 Samuel ózinen patsha talap etken xalıqqa Jaratqan Iyeniń barlıq sózlerin jetkerip, 11 olarǵa bılay dedi:

– Sizlerdiń ústińizden húkimdarlıq etetuǵın patshanıń huqıqları mınaday: ol sizlerdiń ullarıńızdı alıp, óziniń sawash arbaları hám atları ushın xızmet ettirip qoyadı. Jáne de, olar onıń arbasınıń aldında juwırıp júretuǵın boladı. 12 Ol bazıların mıńbasılar hám eliwbasılar etip qoyadı. Bazılarǵa jerin súrdirip, eginin jıynatadı. Al bazılarǵa bolsa, urıs quralların hám sawash arbalarınıń ásbap-úskenelerin soqtırıp qoyadı. 13 Qızlarıńızdı iyis may islewshi, aspaz hám nanbay etip aladı. 14 Jaqsı egislik jerlerińizdi, júzim hám záytún baǵlarıńızdı alıp, óz xızmetshilerine beredi. 15 Ol zúráátińizdiń hám júzimińizdiń onnan birin alıp, óz aqtalarına hám xızmetshilerine beredi. 16 Qul hám shorılarıńızdı, eń jaqsı ógiz ^{▼▼ ógiz – Áyyemgi grekshe awdarmadan. Evreyshe qoljazbalarda «jigitler».} hám esheklerińizdi alıp, óz jumıslarında paydalanadı. 17 Ol mayda mallarıńızdıń da onnan birin aladı, al ózlerińiz onıń qulları bolasızlar. 18 Usılar orınlanǵanda, ózlerińiz tańlaǵan patshańızdıń dártinen nala shegesizler. Biraq sol kúni Jaratqan Iye sizlerge juwap bermeydi.

19 Degen menen, xalıq Samueldiń sózin tıńlaǵısı kelmey:

– Yaq, bizlerdi basqaratuǵın bir patsha bolsın. 20 Sonda bizler de basqa xalıqlar sıyaqlı bolamız. Patshamız bizlerge biylik etedi hám aldımızda júrip, sawashlarımızdı basqaradı, – dedi.

21 Samuel xalıqtıń barlıq sózlerin tıńlaǵannan soń, olardı Jaratqan Iyege aytıp berdi. 22 Sonda Jaratqan Iye Samuelge:

– Olardıń sózine qulaq salıp, olarǵa bir patsha qoyıp ber, – dep juwap berdi.

Sonnan keyin, Samuel izraillılarǵa:

– Hár bir adam óz qalasına qaytsın, – dedi.