‏ 1 Samuel 9

Samueldiń Shaul menen ushırasıwı

1Benyamin urıwınan Kish degen abıraylı bir adam bar edi. Ol Abieldiń ulı, Serordıń aqlıǵı, Bexorattıń shawlıǵı, Afiaxtıń quwlıǵı edi. 2Kishtiń jas hám sımbatlı Shaul atlı bir ulı bar edi. Izrail xalqı arasında onnan asqan sımbatlı adam joq edi. Hár qanday adamnıń boyı onıń iynine keletuǵın edi.

3Bir kúni Shauldıń ákesi Kishtiń eshekleri joytılıp ketti. Sonda Kish ulı Shaulǵa:

– Xızmetshilerden birewin janıńa alıp, esheklerdi izle, – dedi.

4Shaul Efrayımnıń tawlı úlkesin hám Shalisha jerlerin aylanıp shıqtı. Biraq esheklerdi taba almadı. Olar Shaalim úlkesine bardı, biraq eshekler ol jerde de joq bolıp shıqtı. Sońınan olar Benyamin jerine bardı, biraq esheklerdi ol jerden de taba almadı. 5Olar Suf jerine jetkende, Shaul janındaǵı xızmetshisine:

– Júr, qayta qoyayıq. Bolmasa, ákem esheklerdi qoyıp, bizlerdi qayǵıra baslar, – dedi.

6Biraq xızmetshi oǵan:

– Qara, mına qalada Qudaydıń adamı turadı. Ol abıraylı adam bolıp, onıń aytqanlarınıń bári orınlanadı. Házir sol jerge barayıq. Bálkim, ol bizlerge jol kórseter, – dedi.

7Shaul onnan:

– Eger barsaq, oǵan ne aparamız? Dorbamızdaǵı nanımız da tawısıldı. Qudaydıń adamına beretuǵın hesh qanday sawǵamız joq. Nemiz qaldı? – dep soradı.

8Xızmetshi Shaulǵa jáne:

– Mine, mende sherek shekel ▼

▼ Sherek shekel – bir shekel shama menen 11 gr.

gúmis bar. Ol bizlerge baratuǵın jolımızdı kórsetiwi ushın, men onı Qudaydıń adamına beremen, – dep juwap berdi.

9Burın Izrailda bir adam Qudaydan bir nárse soramaqshı bolǵanda: «Júriń, kózi ashıqqa barayıq», – deytuǵın bolǵan. Sebebi házir payǵambar dep atalatuǵın adamlardı burın «kózi ashıqlar» dep ataǵan.

10Shaul xızmetshisine:

– Yaqshı, barayıq, – dedi. Solay etip, olar Qudaydıń adamı jasaytuǵın qalaǵa qaray ketti.

11Olar qalaǵa qaray kóterilip baratırǵanda, suw alıwǵa shıqqan qızlardı ushıratıp, olardan:

– Kózi ashıq usı jerde me? – dep soradı.

12Qızlar olarǵa bılay dep juwap berdi:

– Awa, ol sizlerdiń aldıńızda ketip baratır. Asıǵıńlar, ol qalamızǵa búgin keldi. Sebebi xalıq búgin sıyınıw orında qurbanlıq berejaq. 13Qalaǵa kiriwińizden-aq, awqatlanıw ushın sıyınıw orınǵa shıqpasınan burın onı tawıp alasız. Ol barıp, qurbanlıqtı muxaddeslemegenshe, xalıq awqat jemeydi. Shaqırılǵanlar ol kelgennen soń jewdi baslaydı. Házir barsańız, onı dárhal tawıp alasız.

14Shaul hám onıń xızmetshisi qalaǵa ketti. Olar qalaǵa kirgende, sıyınıw ornına baratırǵan Samuel olardıń qarsı aldınan shıqtı.

15Shaul kelmesinen bir kún aldın, Jaratqan Iye Samuelge ayan berip: 16«Erteń usı waqıtta saǵan Benyamin jerinen bir adamdı jiberemen. Onı maylap, xalqım Izrailǵa húkimdar etip qoy. Ol xalqımdı filistler qolınan qutqaradı. Men xalqımnıń awhalın kórdim. Óytkeni olardıń dadı Maǵan jetip keldi», – degen edi.

17Samuel Shauldı kórgende, Jaratqan Iye Samuelge: «Saǵan aytqan adamım usı boladı. Xalqıma ol húkimdarlıq etedi», – dedi. 18Shaul qala dárwazasında Samueldi ushıratıp, onnan:

– Kózi ashıqtıń úyi qay jerde, aytıp jiberesiz be? – dep soradı.

19Samuel oǵan bılay dep juwap berdi:

– Kózi ashıq men bolaman. Meniń aldımda júrip, sıyınıw ornına kóteril. Búgin meniń menen birge awqatlanasań. Al azanda júregińdeginiń bárin ózińe aytıp berip, úyińe qaytaraman. 20Úsh kún aldın joytılǵan esheklerińdi qayǵırma, olar tabıldı. Izraildıń pútkil úmiti kimnen? Sennen hám ákeńniń xojalıǵınan emes pe?

21Shaul Samuelge:

– Men Izrail urıwları ishindegi eń kishkenesi bolǵan Benyamin urıwınan emespen be? Men tiyisli bolǵan tiyre de Benyamin urıwındaǵı barlıq tiyrelerdiń eń kishkenesi emes pe? Maǵan ne ushın bul sózlerdi aytıp turıpsız? – dedi.

22Samuel Shauldı hám onıń xızmetshisin sıyınıw ornınıń awqatlanıw bólmesindegi shaqırılǵan otızday qonaqtıń ústine alıp barıp, eń tórge otırǵızdı. 23Sońınan aspazǵa:

– Meniń saǵan bólek alıp qoy dep bergen góshimdi alıp kel, – dedi. 24Aspaz sannıń góshin ákelip, Shauldıń aldına qoydı. Samuel Shaulǵa:

– Bul seniń payıń. Márhámat, je! Sebebi bunı belgilengen kúni men shaqırǵan xalıq penen birge jewiń ushın saqlap qoyǵan edim, – dedi.

Sol kúni Shaul Samuel menen birge awqatlandı. 25Olar sıyınıw ornınan qalaǵa túskennen keyin, Samuel úyiniń tóbesinde Shaul menen sóylesip otırdı.

Shauldıń húkimdarlıqqa tayınlanıwı

26Tań azanda Samuel úydiń tóbesinde jatırǵan Shauldı shaqırıp:

– Tayarlan, seni jolǵa shıǵarıp salayın, – dedi.

Shaul ornınan turıp, Samuel menen birge sırtqa shıqtı. 27Olar qala shetine jetkende, Samuel Shaulǵa:

– Xızmetshińe ayt, aldımızǵa túsip júre bersin, – dedi. Xızmetshi aldıǵa júrip ketkennen keyin, Samuel Shaulǵa:

– Biraq sen toqtap tur, men saǵan Qudaydıń sózlerin bildireyin, – dedi.