1Sa 28 | KaaIBT22L | STEP | Sol kúnleri filistler Izrail menen urısıw ushın áskerlerin topladı. Axish Dawıtqa: – Bilip qoy, sen adamlarıń menen birge meniń janımda urısasań,

‏ 1 Samuel 28

1 Sol kúnleri filistler Izrail menen urısıw ushın áskerlerin topladı. Axish Dawıtqa:

– Bilip qoy, sen adamlarıń menen birge meniń janımda urısasań, – dedi.

2 Dawıt oǵan:

– Sol waqıtta siz de qulıńızdıń neler qılatuǵının kóresiz, – dep juwap berdi.

Axish oǵan:

– Yaqshı, onda men seni bir ómirge ózimniń tán saqshım etip tayınlayman, – dedi.

Shauldıń árwaq shaqırıwshı hayalǵa barıwı

3 Samuel ólgende, pútkil Izrail xalqı oǵan joqlaw aytıp jılap, onı óz qalası Ramaǵa jerlegen edi. Al Shaul bolsa, árwaqlardı hám ruwxlardı shaqıratuǵınlardı elden quwıp jibergen edi.

4 Filistler toplanıp, Shunemge keldi hám sol jerge orda qurdı. Shaul da pútkil izraillılardı toplap, Gilboa tawına orda qurdı. 5 Shaul filist áskerlerin kórgende qorqıp ketip, júregin qorqınısh biylep aldı. 6 Ol Jaratqan Iyeden sorasa da, Jaratqan Iye oǵan tús arqalı da, Urim ^{▼▼ Urim – bul Qudaydıń erkin biliw ushın arnalǵan tas bolıp, onı shek taslaw jolı menen qollanǵan bolıwı múmkin.} arqalı da, payǵambarlar arqalı da juwap bermedi. 7 Sonlıqtan Shaul xızmetshilerine:

– Maǵan árwaq shaqıratuǵın bir hayaldı tawıp keliń. Oǵan barıp, másláhát sorayın, – dep buyırdı.

Xızmetshileri oǵan:

– En-Dorda árwaq shaqıratuǵın bir hayal bar, – dedi.

8 Shaul kiyimin almastırıp, sırtqı kórinisin ózgertti de, janına eki adamdı alıp, túnde sol hayalǵa keldi. Shaul hayalǵa:

– Ótinemen, men ushın árwaqlardan sorap, men aytqan adamnıń árwaǵın shaqırıp ber, – dedi.

9 Biraq hayal:

– Shauldıń neler islegenin, árwaqlardı hám ruwxlardı shaqıratuǵınlardı elden quwıp jibergenin bileseń. Solay eken, nege meni óltiriw ushın duzaq qoyıp atırsań? – dedi.

10 Shaul oǵan:

– Tiri Jaratqan Iye haqı ant ishemen, bul isten saǵan hesh qanday zıyan kelmeydi, – dedi.

11 Sonda hayal Shauldan:

– Saǵan kimdi shaqırıp bereyin? – dep soradı.

Shaul oǵan:

– Maǵan Samueldi shaqırıp ber, – dedi.

12 Hayal Samueldi kórgende, dawısınıń barınsha baqırıp jiberip, Shaulǵa:

– Siz Shaulsız-ǵo, nege meni aldadıńız? – dedi.

13 Patsha oǵan:

– Qorqpa, ne kórip tursań? – dedi.

Hayal oǵan:

– Jerdiń astınan shıǵıp kiyatırǵan bir árwaqtı kórip turman, – dep juwap berdi.

14 Shaul hayaldan:

– Onıń kórinisi qanday? – dep soradı.

Hayal oǵan:

– Ústine shapan kiygen bir ǵarrı adam joqarıǵa shıǵıp kiyatır, – dedi.

Sonda Shaul onıń Samuel ekenin bildi de, et betinen jerge jıǵılıp, tájim etti.

15 Samuel Shaulǵa:

– Nege meni shaqırıp, tınıshımdı aldıń? – dedi.

Shaul oǵan:

– Men júdá qıynalıp atırman. Filistler maǵan qarsı urıspaqta. Quday da meni taslap ketti. Ol maǵan payǵambarlar arqalı da, túslerim arqalı da juwap bermey qoydı. Sonlıqtan ne islewim kerekligin bildiriwiń ushın, seni shaqırtqan edim, – dedi.

16 Samuel oǵan bılay dep juwap berdi:

– Jaratqan Iye seni taslap ketip, saǵan dushpan bolǵan bolsa, endi nege mennen sorap tursań? 17 Jaratqan Iye men arqalı aytqanların júzege asırdı. Ol patshalıqtı sennen tartıp alıp, onı janıńdaǵı adamǵa, yaǵnıy Dawıtqa berdi. 18 Óytkeni sen Jaratqan Iyeniń buyrıǵına boysınbadıń, Onıń lawlaǵan ǵázebin amaleklerge shashpadıń. Sonlıqtan Jaratqan Iye búgin bul nárselerdi seniń basıńa saldı. 19 Jaratqan Iye seni de, Izrail xalqın da filistlerge táslim etedi. Erteń sen hám seniń ullarıń meniń janımda bolasızlar. Jaratqan Iye Izrail ordasın da filistlerge táslim etedi.

20 Shaul Samueldiń sózlerinen qattı qorqıp ketip, birden gúrs etip jerge quladı. Bir kún hám bir tún duz tatpaǵanlıqtan, onıń dimarı da qalmaǵan edi. 21 Hayal Shaulǵa jaqınlap keldi de, onıń qattı qorqıp ketkenin kórip bılay dedi:

– Minekey, shorıńız bolǵan men gápińizge qulaq astım. Janımdı qáterge qoyıp, tilegińizdi orınladım. 22 Endi ótinemen, siz de shorıńız bolǵan meniń sózlerimdi tıńlań. Sizge azǵantay awqat alıp keliwge ruxsat beriń. Jolıńızdı dawam etiwge dárman bolıw ushın, awqatlanıp alıńız.

23 Biraq Shaul:

– Jemeymen, – dep bas tarttı.

Degen menen, xızmetshileri de, hayal da zorlay bergennen keyin, Shaul olardıń aytqanın isledi. Ol jatqan jerinen turıp, tósekke otırdı. 24 Hayaldıń qorasında baǵıp otırǵan bir jas baspaǵı bar edi. Hayal onı dárriw soydı, qamır iylep, ashıtqısız nan pisirdi. 25 Sońınan olardı Shaul hám onıń xızmetshileriniń aldına qoydı. Olar iship-jep bolıp, sol kúni túnde ketip qaldı.