1Sa 29 | KaaIBT22L | STEP | Filistler pútkil áskerlerin Afekke topladı. Izraillılar bolsa, Izreeldegi bulaqtıń janına orda qurıp, jaylasıp alǵan edi.

‏ 1 Samuel 29

Filistlerdiń Dawıtqa isenbewi

1 Filistler pútkil áskerlerin Afekke topladı. Izraillılar bolsa, Izreeldegi bulaqtıń janına orda qurıp, jaylasıp alǵan edi. 2 Filist húkimdarları júz hám mıń adamlıq toparlar menen baratırǵan edi. Dawıt hám onıń adamları patsha Axish penen birge izde kiyatırǵan edi. 3 Filist áskerbasıları:

– Mına evreyler bul jerde ne qılıp júr? – dep soraǵanda, Axish olarǵa:

– Bul adam Izrail patshası Shauldıń xızmetshisi Dawıt boladı. Bir jıldan aslam waqıttan beri, ol meniń janımda júr. Men tárepke ótkennen beri, onnan birde bir jamanlıq kórmedim, – dep juwap berdi.

4 Biraq filist áskerbasıları Axishke ashıwlanıp bılay dedi:

– Bul adamdı izine qaytarıp jiber. Ol sen belgilep bergen jerge qaytsın. Bizler menen urısqa barmasın, bolmasa sawash waqtında bizge qarsı shıǵıwı múmkin. Ol aldınǵı mırzasına ózin qalay jaqsı kórsete aladı? Oǵan adamlarımızdıń basın alıp barıwdan basqa jaqsı jol bar ma? 5 Olardıń oyınǵa túsip: «Shaul mıńlaǵanın,
Al Dawıt on mıńlaǵanın óltirdi», –

dep usı Dawıt haqqında qosıq aytıp júrgen joq pa edi?

6 Sonda Axish Dawıttı shaqırıp alıp bılay dedi:

– Tiri Jaratqan Iye haqı ant ishemen: sen haq adamsań. Meniń menen birge urısqa barıwıńdı qáler edim. Sen janıma kelgen kúnnen beri, hesh bir jaman is islegenińdi kórmedim. Biraq sen filist húkimdarlarına jaqpadıń. 7 Endi aman-esen izińe qayta ber. Jáne filist húkimdarlarına jaqpaytuǵın is islep qoyma.

8 Dawıt Axishke:

– Biraq men ne qıldım? Janıńızǵa kelgennen baslap, házirge deyin mennen qanday ayıp taptıńız? Taqsır, ne ushın men barıp, siziń dushpanlarıńızǵa qarsı urısa almayman? – dedi.

9 Axish oǵan bılay dedi:

– Bilemen, sen meniń názerimde Qudaydıń perishtesi sıyaqlı jaqsısań. Degen menen, filist áskerbasıları seni: «Bizler menen urısqa barmasın», – dep atır. 10 Endi sen hám seniń menen birge kelgen mırzań Shauldıń qulları azanda erte turıp, tań atar-atpastan ketińler.

11 Solay etip, Dawıt hám onıń adamları filistlerdiń jerine qaytıw ushın, azanda erte turdı. Al filistler bolsa, Izreelge ketti.