1 Samuel 31
Shauldıń hám onıń ullarınıń ólimi
1Sol waqıtta filistler izraillılar menen urısıp atırǵan edi. Izraillılar filistlerdiń aldına túsip qashıp, kópshiligi Gilboa tawında nabıt boldı. 2Filistler Shaul menen onıń ullarınıń izine túsip, Shauldıń ulları Ionatandı, Abinadabtı hám Malkiy-Shuanı óltirdi. 3Shauldıń átirapında sawash háwij alǵan edi. Sonda sadaqshılar tárepinen atılǵan oq Shaulǵa tiyip, ol awır jaraqatlandı. 4Shaul óz nókerine: – Qılıshıńdı qınabınan suwırıp al da, meni óltir. Bolmasa, mına súnnetsizler keledi de, qılıshın suǵıp, meni xorlaydı, – dedi. Biraq nókeri qattı qorqıp, bunı islemedi. Sonlıqtan Shaul qılıshın qınınan suwırıp alıp, ózin qılıshtıń ústine tasladı. 5Nókeri Shauldıń ólgenin kórgende, ol da qılıshınıń ústine ózin taslap, Shaul menen birge óldi. 6Solay etip, Shaul, onıń úsh ulı, nókeri hám pútkil adamları bir kúnde qaza taptı. 7Oypatlıqtıń arǵı tárepinde hám Iordan dáryasınıń arjaǵında jasaytuǵın izraillılar Izrail áskerleriniń qashıp, Shaul hám onıń ullarınıń ólgenin kórgende qalaların taslap, qasha basladı. Filistler kelip, sol qalalarǵa ornalasıp aldı. 8Erteńine filistler ólgenlerdi tonaw ushın kelgende, Gilboa tawında Shauldıń hám onıń úsh ulınıń óligin taptı. 9Olar Shauldıń basın kesip aldı hám qural-jaraqların talan-taraj qıldı. Sońınan bul xabardı butxanalarına hám xalqına jetkeriw ushın, filistlerdiń jerleriniń hámmesine xabarshılar jiberdi. 10Shauldıń qural-jaraǵın qudayı Ashtartanıń butxanasına qoydı, al denesin Beyt-Shan qalasınıń diywalına asıp qoydı. 11Yabesh-Gilad xalqı filistlerdiń Shaulǵa islegen isleri tuwralı esitkende, 12olardıń barlıq márt jawıngerleri túni menen jol júrip, Beyt-Shanǵa bardı. Olar Shauldıń hám onıń ullarınıń denelerin Beyt-Shan diywallarınan túsirip alıp, Yabeshke alıp keldi hám sol jerde jaǵıp jiberdi. 13Sońınan súyeklerin jıynap alıp, Yabeshtegi tamarisk aǵashınıń astına kómdi hám jeti kún oraza tutıp, azaladı.
Copyright information for
KaaIBT22L