1Th 1 | KaaIBT22L | STEP | Ákemiz Qudayǵa hám Iyemiz Iysa Masiyxqa tiyisli bolǵan Salonika iseniwshileriniń jámáátine, Pavel, Sila hám Timofeyden sálem! Sizlerge Qudaydıń miyrimi hám tınıshlıǵı yar bolsın!

‏ 1 Thessalonians 1

1 Ákemiz Qudayǵa hám Iyemiz Iysa Masiyxqa tiyisli bolǵan Salonika iseniwshileriniń jámáátine, Pavel, Sila ^{▼▼ Sila – grekshe tekstte bul attıń basqa variantı Silvanus.} hám Timofeyden sálem! Sizlerge Qudaydıń ^{▼▼ Qudaydıń – Bazı qoljazbalarda «Ákemiz Qudaydıń hám Iyemiz Iysa Masiyxtıń».} miyrimi hám tınıshlıǵı yar bolsın!

Salonikalılardıń úlgili isenimi

2 Duwa etkenimizde sizlerdi tilge alıp, bárqulla hámmeńiz ushın Qudayǵa shúkirlik bildiremiz. 3 Quday Ákemizdiń aldında isenimińizdiń jemisi bolǵan is-háreketińizdi, súyispenshiligińizge tiykarlanǵan miynetińizdi hám Iyemiz Iysa Masiyxqa degen úmitińizden payda bolǵan shıdamlılıǵıńızdı úzliksiz eske alamız.

4 Quday súygen tuwısqanlarım! Onıń sizlerdi tańlap alǵanın bilemiz. 5 Sebebi sizlerge járiyalanǵan Xosh Xabar tek sóz benen ǵana emes, al qúdiret, Muxaddes Ruwx hám tolıq isenim menen jetkizildi. Sizlerdiń paydańız ushın arańızda qalay jasaǵanımızdı bilesizler. 6 Kóp azap-aqıretlerge qaramay, sizler Muxaddes Ruwxtıń bergen quwanıshı menen Qudaydıń sózin qabıl etip, bizlerge hám Iyemizge eliklewshiler boldıńlar. 7 Solay etip, sizler Makedoniya hám Axayadaǵı pútkil iseniwshilerge úlgi boldıńlar. 8 Óytkeni Iyemizdiń sózi sizlerden tarqap, Qudayǵa degen isenimińiz haqqında xabar tek Makedoniya hám Axayaǵa emes, al hámme jerge jetip bardı. Sonlıqtan bizlerdiń bul haqqında bir nárse aytıwımızǵa hájet qalmadı. 9 Sebebi olardıń ózleri bizlerdi qanshelli jaqsı qabıl alǵanıńızdı hám haqıyqıy tiri Qudayǵa xızmet etiw ushın qalay butlardı taslap, Qudayǵa júz burǵanıńızdı aytıp berdi. 10 Jáne de olar bizlerdi keleshektegi qáhárli jazadan qutqaratuǵın Iysanıń, yaǵnıy Qudaydıń Ózi ólimnen tiriltken Ulınıń aspannan keliwin kútip atırǵanıńızdı da sóz etti.