1Th 2 | KaaIBT22L | STEP | Tuwısqanlar! Sizlerge bolǵan saparımızdıń bosqa ketpegenin ózlerińiz de bilesiz.

‏ 1 Thessalonians 2

Paveldiń Salonikadaǵı xızmeti

1 Tuwısqanlar! Sizlerge bolǵan saparımızdıń bosqa ketpegenin ózlerińiz de bilesiz. 2 Biraq ózlerińizge málim, bunnan aldın Filipte azap shegip, masqaralanıwǵa duwshar bolǵan edik. ^{▼▼ Elsh 16:16-40.} Degen menen, kúshli qarama-qarsılıqlarǵa qaramastan, Qudaydıń Xosh Xabarın sizlerge járiyalaw ushın, bizler Qudayımızdan mártlik alıp turatuǵın edik. ^{▼▼ Elsh 17:1-9.} 3 Óytkeni bizlerdiń aqıl-násiyatımız ótirikke de, napák niyetke de, hiylege de negizlenbegen edi. 4 Kerisinshe, Quday bizlerdi minásip kórip, bizlerge Xosh Xabardı isenip tapsırdı. Sonlıqtan bizler adamlarǵa emes, al kewillerimizdi sınaytuǵın Qudayǵa unaw ushın Xosh Xabardı járiyalap júrmiz. 5 Xabarıńız bar, bizler hesh qashan jaǵımpazlanıp sóylemedik, paydakúnemligimizdi jasırıw ushın nıqap taqpadıq. Quday buǵan gúwa. 6 Jáne bizler hesh kimnen: ya sizlerden, ya basqalardan húrmet-maqtaw izlep júrgen joqpız.

7 Masiyxtıń elshileri sıpatında sizlerge awırmanlıq salıwımızǵa bolar edi. Biraq, balalarına ǵamxor bolǵan ana sıyaqlı, sizlerge múláyim boldıq. 8 Sizlerdi usılay jaqsı kórip, sizlerge tek Qudaydıń Xosh Xabarın emes, al óz janlarımızdı beriwge de qayıl edik. Sebebi sizler bizler ushın sonshelli qádirli edińiz. 9 Tuwısqanlar! Bizlerdiń awır miynetimiz hám qıyınshılıqlarımız yadıńızda. Hesh birińizge awırmanlıǵımız túspewi ushın, kúni-túni miynet etip, sizlerge Qudaydıń Xosh Xabarın járiyaladıq.

10 Siz iseniwshilerdiń aldında qanday muxaddes, haq hám kemshiliksiz bolıp jasaǵanımızǵa sizler de, Quday da gúwa. 11 Xabarıńız bar, bir áke óz balalarına qanday qatnas jasasa, bizler de sizlerdiń hár birińizge sonday qatnas jasadıq. 12 Sizlerge aqıl-násiyat hám jubanısh berip, Óz Patshalıǵına hám saltanatına shaqırǵan Qudayǵa ılayıqlı jasawdı ótinish ettik.

13 Bizler Qudayǵa jáne bir nárse ushın úzliksiz shúkirlik etemiz. Óytkeni sizler Qudaydıń sózin bizlerden esitip qabıl etkenińizde, bunı adamnıń sózi sıpatında emes, al Qudaydıń sózi sıpatında qabıl ettińler. Bul sóz haqıyqattan Qudaydıń sózi bolǵanlıqtan, siz iseniwshilerde háreket etpekte. 14 Sebebi tuwısqanlar, sizler Masiyx Iysaǵa tiyisli bolǵan Yahudiyadaǵı Qudaydıń jámáátlerine eliklewshiler boldıńlar. Olar yahudiylerden qanday azap-aqıret kórgen bolsa, sizler de óz milletińizden sonday azap-aqıret kórdińler. 15 Iyemiz Iysanı hám payǵambarlardı óltirgen yahudiyler bizlerdi de quwıp shıǵardı hám olar Qudaydı nariyza qılıp, pútkil adamlarǵa dushpanlıq islep atır. 16 Basqa milletlerdiń qutqarılıwı ushın, bizlerdiń sóylewimizge olar tosqınlıq jasap, hár qashan óz gúnalarınıń mólsherin toltırıp atır. Biraq olar aqırında Qudaydıń ǵázebine ushıraydı.

Paveldiń salonikalılarǵa degen saǵınıshı

17 Tuwısqanlar, sizlerden az waqıtqa ayra túsirilip, ózlerimiz alısta bolsaq ta, kewillerimiz sizler menen birge edi. Sizlerdi júdá saǵınıp, diydar kórisiwge qattı tırıstıq. 18 Sonlıqtan sizlerge barǵımız kelip, ásirese men, Pavel, bir neshe márte barmaqshı bolǵanımda, shaytan bizlerge kesent etti. 19 Bizlerdiń úmitimiz, quwanıshımız hám Iyemiz Iysa kelgende, Onıń aldında kiyetuǵın maqtaw tajımız ne? Sizler emessiz be? 20 Awa, maqtanıshımız hám quwanıshımız sizlersiz.