1Th 3 | KaaIBT22L | STEP | Solay etip, bizler artıq shıday almay, Afinada jalǵız qalıwdı uyǵardıq.

‏ 1 Thessalonians 3

1 Solay etip, bizler artıq shıday almay, Afinada jalǵız qalıwdı uyǵardıq. ^{▼▼ Elsh 17:13-16.} 2 Isenimińizdi bekkemlep, sizlerdi jigerlendiriw ushın, Masiyxtıń Xosh Xabarın járiyalaytuǵın Qudaydıń xızmetshisi, tuwısqanımız Timofeydi sizlerge jiberdik. 3 Azap-aqıretler sebepli hesh kim isenimde silkinbesin dep, bizler usılay isledik. Azap shegiw táǵdirimizge jazılǵanı ózlerińizge málim. 4 Óytkeni sizler menen birge bolǵanımızda, azap shegetuǵınımızdı aldın aytqan edik. Xabarıńız bar, aytqanımızday anıq solay boldı da. 5 Sonlıqtan men de artıq shıday almay, azǵırıwshı sizlerdi azǵırıp, miynetimiz bosqa ketpesin dep, isenimińizdiń jaǵdayın biliw ushın Timofeydi sizlerge jiberdim.

6 Biraq, sizlerdiń janıńızdan bizlerge jańa ǵana qaytıp kelgen Timofey sizlerdiń isenimińiz hám súyispenshiligińiz haqqında quwanıshlı xabar alıp keldi. Bizlerdi bárqulla jaqsı oy menen eske alıp, bizlerdiń sizlerdi saǵınǵanımızday, sizlerdiń de bizlerdi saǵınıp atırǵanıńızdı aytıp berdi. 7 Sol sebepten tuwısqanlar, qıyınshılıqlar hám azap-aqıretler ishinde bolsaq ta, sizlerdiń isenimińiz sebepli jigerlenip qaldıq. 8 Sebebi sizler Iyemiz benen bekkem baylanısta bolsańız, bizlerdiń janımız jay tabadı. 9 Qudayımızdıń aldında sizler sebepli alǵan barlıq quwanıshımızdıń esesin Oǵan qansha shúkirlik aytıp qaytarsaq ta az. 10 Sizler menen júzbe-júz kórisip, isenimińizdegi jetispegen nárselerdi tolıqtırıw ushın, kúni-túni bar kúshimiz benen duwa etip atırmız.

11 Ákemiz Qudaydıń Ózi hám Iyemiz Iysa sizlerge barıwǵa jolımızdı ashsın! 12 Iyemiz bir-birińizge hám pútkil adamlarǵa degen súyispenshiligińizdi bizlerdiń sizlerge degen súyispenshiligimiz sıyaqlı kóbeytip arttırsın! 13 Solay etip, Iyemiz Iysa Óziniń pútkil muxaddesleri ^{▼▼ Muxaddesler – Iysaǵa iseniwshiler.} menen kelgende, Ákemiz Qudaydıń aldında muxaddeslikte kemshiliksiz bolıwıńız ushın, júreklerińizdi bekkemlesin.