1Ti 2 | KaaIBT22L | STEP | Eń aldı menen mınanı ótinish etemen: olar Quday aldında hámme adamlar ushın sorap, duwa etip, jalbarınıp, minnetdarshılıq bildirsin.

‏ 1 Timothy 2

Qudayǵa sıyınıw haqqında

1 Eń aldı menen mınanı ótinish etemen: olar Quday aldında hámme adamlar ushın sorap, duwa etip, jalbarınıp, minnetdarshılıq bildirsin. 2 Patshalar hám basshılar ushın da duwa etsin. Sonda bizler Qudaydıń jolı menen hadal jasap, paraxat hám tınısh ómir súremiz. 3 Bul is jaqsı bolıp, Qutqarıwshımız Qudayǵa unaydı. 4 Sebebi Ol hámme adamlardıń qutqarılıwın hám haqıyqatlıqtı biliwin qáleydi. 5 Quday jalǵız hám Quday menen adamlardıń arasındaǵı Táwelleshi, Ózi adam bolǵan Masiyx Iysa da jalǵız. 6 Ol hámme adamlardıń azatlıq qunı ushın Óz janın baǵıshladı. Bul arqalı Ol Qudaydıń hámme adamlardı qutqarıwdı qáleytuǵının belgilengen waqıtta dálilledi. 7 Men usı ushın Masiyx Iysa tárepinen xabarshı hám elshi bolıp tayınlanıp, basqa milletlerge isenim hám haqıyqatlıq haqqında úyretetuǵın muǵallim boldım. Men aldap atırǵan joqpan, haqıyqatın aytıp turman.

8 Jámááttegi er adamlarǵa ashıwlanbawdı hám tartıspawdı, al hámme jerde muxaddes qolların kóterip duwa etiw kerekligin úyretiwińdi qáleymen. 9 Hayallar da shashlarına artıqsha sán bermey, ózlerin altınlar, hinjiler yamasa qımbat kiyimler menen emes, al sıpayı kiyim, ádep hám iybe menen bezesin. 10 Kerisinshe, olar Qudaydan qorqıp jasaytuǵın hayallarǵa ılayıqlı jaqsı isler menen ózlerin kórkem qılsın. 11 Hayal tınısh hám tolıq boysınǵan halda tálim alsın. 12 Hayaldıń tálim berip, er adamdı basqarıwına ruxsat etpeymen. Hayal tınısh bolsın. 13 Óytkeni dáslep Adam-ata, sońınan Hawa-ene jaratıldı. 14 Jáne de, Adam-ata emes, al hayal aldanıp, gúna isledi. ^{▼▼ Jar 2:7, 18, 21-23; 3:1-13.} 15 Biraq, hayal isenim, súyispenshilik hám muxaddeslik penen, ádepli bolıp jasasa, bala tuwıwı arqalı qutqarıladı ^{▼▼ Bul ayat hayal bala tuwıwı arqalı qutqarıladı, degen mánisti emes, al hayal xojalıqta hayallıq hám analıq wazıypasın jaqsı orınlawı tiyis degen mánisti beredi. Bul ayattı aldında aytılǵan ayatlar menen baylanıstırıp túsiniw tiyis.}.