1Ti 4 | KaaIBT22L | STEP | Muxaddes Ruwx anıq aytpaqta: sońǵı waqıtlarda geybir adamlar aldawshı ruwxlarǵa hám jinlerdiń tálimatlarına qulaq asıp, isenimnen qaytadı.

‏ 1 Timothy 4

Jalǵan tálimatlar haqqında

1 Muxaddes Ruwx anıq aytpaqta: sońǵı waqıtlarda geybir adamlar aldawshı ruwxlarǵa hám jinlerdiń tálimatlarına qulaq asıp, isenimnen qaytadı. 2 Bunday tálimatlar hújdansız bolǵan eki júzli ótirikshiler tárepinen tarqaladı. 3 Bul ótirikshiler úyleniwdi hám turmısqa shıǵıwdı qadaǵan etedi, jáne de, ayırım azıq-awqatlardı jemewdi buyıradı. Degen menen, Quday bul nárselerdi haqıyqattı biletuǵın iseniwshilerdiń minnetdarshılıq bildirip jewi ushın jaratqan. 4 Quday jaratqan hár bir nárse jaqsı hám eger minnetdarshılıq penen qabıl etilse, hesh nársege tıyım salınbawı kerek. 5 Óytkeni bizler hár bir nárseni Qudaydıń sózi boyınsha hám duwa etiw arqalı muxaddes dep qabıl etemiz.

Jaqsı xızmetshi

6 Eger bulardı tuwısqanlarǵa násiyatlasań, onda sen isenimniń hám óziń tutınǵan jaqsı tálimattıń sózleri menen azıqlanǵan, Masiyx Iysanıń jaqsı xızmetshisi bolasań. 7 Jaramas hám mánissiz gáplerden awlaq bolıp, ózińdi Quday jolında shınıqtırıp bar. 8 Deneni shınıqtırıwdıń paydası az. Al Qudaydıń jolında shınıǵıw hár tárepleme paydalı. Sebebi bul arqalı házir hám keleshekte ómir beriledi. 9 Bul sózler isenimli hám hár tárepleme qabıl etiliwge ılayıqlı. 10 Sonıń ushın bizler awır miynet etip, azap shekpektemiz. Óytkeni hámme adamlardıń, ásirese iseniwshilerdiń Qutqarıwshısı bolǵan tiri Qudaydan úmit etemiz.

11 Sen usılardı buyır hám úyret. 12 Jassań dep, ózińdi hesh kimniń kemsitiwine jol qoyma. Kerisinshe, sóylegen sóziń, jasaw táriziń, súyispenshiligiń, isenimiń hám pákligiń menen iseniwshilerge órnek bol. 13 Men janıńa barǵanımsha, iseniwshiler jámáátine Muxaddes Jazıwlardı oqıwǵa, úgit-násiyat etiwge hám úyretiwge ózińdi baǵıshla. 14 Aqsaqallar jıyını seniń ústińe qol qoyıp duwa etkende ^{▼▼ Qol qoyıp duwa etiw – iseniwshiler jámáátinde bir adam xızmetke qoyılǵanda islenetuǵın is-háreket.}, ózińe payǵambarshılıq arqalı berilgen ruwxıy sıyǵa ^{▼▼ Ruwxıy sıy – Ózine xızmet etiwi ushın, Qudaydıń iseniwshilerge beretuǵın sıyı.} biypárwa bolma. 15 Usını is júzinde qollan hám tabıslarıńdı hámme kóriwi ushın, ózińdi buǵan tolıq baǵıshla. 16 Ózińe hám berip atırǵan tálimińe dıqqat awdar, usı islerińdi dawam et. Usılay isleseń, ózińdi de, seni tıńlaytuǵınlardı da qutqarasań.