2Ch 1 | KaaIBT22L | STEP | Dawıt ulı Sulayman óz patshalıǵın bekkemlep aldı. Qudayı Jaratqan Iye onıń menen birge bolıp, mártebesin júdá joqarılattı.

‏ 2 Chronicles 1

Sulaymannıń danalıq sorawı

1 Dawıt ulı Sulayman óz patshalıǵın bekkemlep aldı. Qudayı Jaratqan Iye onıń menen birge bolıp, mártebesin júdá joqarılattı. 2 Bir kúni Sulayman pútkil Izrail xalqın – mıńbasılardı, júzbasılardı, biylerdi, Izraildıń barlıq kósemlerin hám áwlad basshıların shaqırttı. 3 Sulayman jıynalǵanlardı ertip, Gibon qalasındaǵı sıyınıw ornına jol aldı. Jaratqan Iyeniń qulı Muwsa shólde qurdırǵan Qudaydıń Ushırasıw shatırı sol jerde edi. 4 Dawıt Qudaydıń Kelisim sandıǵın qoyıw ushın Erusalimde bir shatır tigip, sandıqtı Kiryat-Yarimnen sol shatırǵa alıp barǵan edi. 5 Biraq Xurdıń aqlıǵı Uriydiń ulı Besalel qurǵan qoladan islengen qurbanlıq orın ele Gibondaǵı Jaratqan Iyeniń Muxaddes shatırınıń aldında turǵan edi. Sulayman hám jıynalǵan xalıq Qudaydıń erkin biliw ushın sol jerge bardı. 6 Sulayman Jaratqan Iyeniń aldında Ushırasıw shatırınıń aldındaǵı qoladan islengen qurbanlıq orınǵa kóterilip, onda mıń bas maldı jandırıp qurbanlıqqa berdi.

7 Sol túni Quday Sulaymanǵa kórinip, oǵan:

– Tile tilegińdi, soraǵanıńdı beremen, – dedi. 8 Sulayman Qudayǵa bılay dedi:

– Ákem Dawıtqa úlken jaqsılıq islediń hám meni onıń ornına patsha etip qoydıń. 9 Endi Quday, Jaratqan Iye, ákem Dawıtqa bergen wádeńdi orınla! Aqırı, Sen meni jerdiń shańınday kóp bolǵan xalıq ústinen patsha etip qoydıń. 10 Bul xalıqtı basqara alıwım ushın, maǵan danalıq hám bilim ber. Bolmasa, bul ullı xalqıńa kim húkimdarlıq qıla aladı? 11 Quday Sulaymanǵa bılay dedi:

– Demek júregińniń qálewi usı. Sen baylıq, mal-múlik, dańq-ataq yaki dushpanlarıńa ólim tilemediń, hátte, óziń ushın uzaq ómir de soramadıń. Qaytama, seni patsha etip qoyǵan xalqımdı basqarıw ushın danalıq hám bilim soradıń. 12 Sonlıqtan saǵan danalıq hám bilim beriledi. Buǵan qosa, saǵan deyingi hesh bir patsha kórmegen hám sennen keyin de hesh bir patsha kórmeytuǵın baylıq, mal-múlik hám dańq-ataq beremen.

13 Sulayman Gibondaǵı Ushırasıw shatırı ornalasqan sıyınıw ornınan Erusalimge keldi hám Izrail ústinen húkimdarlıq qıla basladı.

Patsha Sulaymannıń kúshi hám baylıǵı

14 Sulayman sawash arbaları menen atlardı jıynadı. Onıń bir mıń tórt júz sawash arbası hám on eki mıń atı bar edi. Olardıń bir bólegin sawash arbaları ushın ajıratılǵan qalalarǵa, bir bólegin óziniń janına, Erusalimge jaylastırdı. 15 Patsha Erusalimde gúmis penen altındı ápiwayı taslarǵa teń qılıp qoydı. Al kedr aǵashı júdá kóp bolǵanlıqtan, batıstaǵı taw eteklerinde ósetuǵın jabayı ánjir aǵashına teń bolıp qaldı. 16 Sulaymannıń atları Mısır menen Quweden alıp kelindi. Patshanıń sawdagerleri atlardı Quweden satıp alatuǵın edi. 17 Mısırdan hár bir sawash arbası altı júz shekel gúmiske, hár bir at bir júz eliw shekel ^{▼▼ Bir júz eliw shekel – bir shekel shama menen 11 gr.} gúmiske satıp ákelinip, olar patsha sawdagerleri arqalı pútkil Xet hám Aram patshalarına satılatuǵın edi.