2Ch 10 | KaaIBT22L | STEP | Rexabam Shexemge ketti. Óytkeni pútkil izraillılar Rexabamdı patsha etip qoyıw ushın Shexemge toplanǵan edi.

‏ 2 Chronicles 10

Izraillılardıń Rexabamǵa qarsı kóteriliwi

1 Rexabam Shexemge ketti. Óytkeni pútkil izraillılar Rexabamdı patsha etip qoyıw ushın Shexemge toplanǵan edi. 2 Patsha Sulaymannan qashıp, Mısırda jasap atırǵan Nabat ulı Yarobam bunı esitkende, Mısırdan qayttı. 3 Izraillılar Yarobamdı shaqırttı. Yarobam pútkil izraillılar menen birge Rexabamǵa kelip:

4 – Ákeńiz moynımızǵa awır moyıntırıq salǵan edi. Siz ákeńiz júklegen awır júkti hám ol salǵan moyıntırıqtı jeńilletiń. Sonda sizge xızmet etemiz, – dedi.

5 Rexabam olarǵa:

– Úsh kúnnen keyin qaytıp kelińler, – dedi. Xalıq tarap ketti.

6 Patsha Rexabam ákesi Sulaymannıń kóziniń tirisinde oǵan xızmet etken aqsaqallar menen oylasıp:

– Mına xalıqqa ne dep juwap bereyin, qanday másláhát beresizler? – dep soradı.

7 Aqsaqallar oǵan:

– Eger siz bul xalıqqa jıllı shıray kórsetip, kewlin alıp, jaqsı sózińizdi ayamasańız, olar sizge bir ómir qul boladı, – dep juwap berdi.

8 Degen menen, Rexabam aqsaqallardıń másláhátine qulaq aspay, ózi menen birge ósken jas xızmetshileri menen keńesip, 9 olardan: – «Ákeńizdiń bizlerge salǵan moyıntırıǵın jeńilletseńiz», – dep atırǵan bul xalıqqa ne dep juwap bersem eken? Sizler qanday másláhát beresiz? – dep soradı.

10 Sonda ózi menen birge ósken jas jigitler oǵan bılay dep juwap berdi:

– Sizge: «Ákeńiz moynımızǵa awır moyıntırıq salǵan edi, siz onı jeńilletseńiz», – dep atırǵan xalıqqa: «Meniń shunatay barmaǵım ákemniń belinen de juwanıraq. 11 Ákem sizlerge awır moyıntırıq salǵan bolsa, men moyıntırıǵıńızdı onnan da awırlataman. Ákem sizlerdi qamshı menen jazalaǵan bolsa, men sizlerdi sım qosıp órilgen qamshı menen jazalayman», – dep aytıń.

12 Patshanıń: «Úsh kúnnen keyin qaytıp kelińler», – degen sózi boyınsha, úshinshi kúni Yarobam hám pútkil xalıq Rexabamǵa keldi. 13 Patsha aqsaqallardıń keńesine qulaq aspay, olarǵa qatal juwap berdi. 14 Ol jas jigitlerdiń másláháti boyınsha xalıqqa:

– Ákem sizlerge awır moyıntırıq salǵan bolsa, men onı jáne de awırlataman. Ákem sizlerdi qamshı menen jazalaǵan bolsa, men sizlerdi sım qosıp órilgen qamshı menen jazalayman, – dedi. 15 Patsha xalıqqa qulaq salmadı. Sebebi Jaratqan Iyeniń shilolı Axiya arqalı Nabat ulı Yarobamǵa aytqan sózleri ^{▼▼ 3Pat 11:29-39.} orınlanıwı ushın Quday usılay isledi.

16 Pútkil izraillılar patshanıń ózlerine qulaq salmaǵanın kórgende, patshaǵa bılay dep juwap berdi:

«Dawıt penen biziń ne baylanısımız bar,
Ishaydıń ulında alatuǵın úlesimiz de joq.
Háy, Izrail xalqı, úylerińizge qaytıńlar!
Háy Dawıt, óz úyiń ózińe ardana bolsın!»

Usılardı aytıp, izraillılar hámmesi óz úylerine qaytıp ketti.

17 Biraq Rexabam Yahuda qalalarında jasaytuǵın izraillılarǵa patshalıq etiwin dawam etti.

18 Patsha Rexabam márdikarǵa alınǵanlar ústinen qadaǵalawshı Hadoramdı Izrail xalqına jiberdi. Xalıq onı tas boran qılıp óltirdi. Sonda patsha Rexabam tez sawash arbasına mindi de, Erusalimge qashıp ketti. 19 Sol kúnnen baslap házirge deyin, Izrail xalqı Dawıttıń urpaǵına qarsı kóterilip kelmekte.