2Ch 11 | KaaIBT22L | STEP | Rexabam Erusalimge bardı da, Izrail menen urısıp, óz patshalıǵın qaytarıp alıw ushın, Yahuda hám Benyamin urıwınan bir júz seksen mıń aǵla jawıngerdi áskerlikke topladı.

‏ 2 Chronicles 11

Shemayanıń payǵambarshılıǵı

1 Rexabam Erusalimge bardı da, Izrail menen urısıp, óz patshalıǵın qaytarıp alıw ushın, Yahuda hám Benyamin urıwınan bir júz seksen mıń aǵla jawıngerdi áskerlikke topladı. 2 Biraq sol arada Qudaydıń adamı bolǵan Shemayaǵa Jaratqan Iyeden mınaday sóz tústi:

3 – Yahuda patshası Sulaymannıń ulı Rexabamǵa, Yahuda hám Benyamin jerindegi barlıq izraillılarǵa bılay dep ayt: 4 «Jaratqan Iye bılay deydi: Óz tuwısqanlarıńızǵa qarsı urıs ashıp, urıstı baslamańlar. Hár birińiz óz úyińizge qaytıńlar. Óytkeni bul islerdi islep atırǵan Men bolaman».

Jaratqan Iyeniń bul sózlerin esitken xalıq Yarobamǵa qarsı urısıwdan waz keship, izine qayttı.

Rexabamnıń Yahuda qalaların bekkemlewi

5 Rexabam Erusalimde jasadı hám qorǵanıw ushın Yahudadaǵı mına qalalardı diywallar menen qorshadı: 6 Beytlehem, Etam, Teqoa, 7 Beyt-Sur, Soxo, Adullam, 8 Gat, Maresha, Zif, 9 Adorayım, Laxish, Azeqa, 10 Sora, Ayyalon hám Xebron. Bular Yahuda hám Benyamin jerlerindegi qorǵanlı qalalar edi. 11 Rexabam usı qalalardıń bekinislerin kúsheytip, bekinislerge áskerbasılar qoydı hám olarda azıq-awqat, záytún mayı hám sharap saqlanatuǵın orınlar qurdı. 12 Hár bir qalanı úlken qalqan hám nayzalar menen támiyinlep, qorǵanıwdı bekkemledi. Solay etip, Yahuda hám Benyamin urıwları Rexabamnıń qol astında qaldı.

13 Izraildıń barlıq aymaqlarındaǵı ruwxaniyler menen lebiyliler Rexabamnıń qasına toplandı. 14 Lebiyliler, hátte, óz jaylawları menen mal-múliklerin taslap, Yahuda hám Erusalimge kóship keldi. Sebebi Yarobam menen onıń ulları olardı ruwxaniy bolıp, Jaratqan Iyege xızmet etiwden shetletken edi. 15 Yarobam teke hám tana músinlerin isletip sıyınıw orınlarına qoydı hám ol jerlerge xızmet etiw ushın óz ruwxaniylerin tayınladı. 16 Izraildıń barlıq urıwlarındaǵı Izraildıń Qudayı Jaratqan Iyege shın júrekten umtılǵanlar ózleriniń ata-babalarınıń Qudayı Jaratqan Iyege qurbanlıq beriw ushın, ruwxaniyler menen lebiylilerge erip, Erusalimge keldi. 17 Olar Yahuda patshalıǵın bekkemledi hám úsh jıl dawamında Dawıt penen Sulaymannıń jolı menen júrip, Sulaymannıń ulı Rexabamdı qollap quwatladı.

Rexabamnıń xojalıǵı

18 Rexabam Dawıttıń ulı Erimottıń qızı Maxalatqa úylendi. Onıń anası Ishaydıń ulı Eliabtıń qızı Abihayıl edi. 19 Maxalat Rexabamǵa Eush, Shemariya hám Zaham degen ullardı tuwıp berdi.

20 Maxalattan soń Rexabam Abshalomnıń qızı Maaxaǵa úylendi. Ol Rexabamǵa Abiya, Attay, Ziza hám Shelomitti tuwıp berdi. 21 Rexabam basqa hayalları hám toqallarına qaraǵanda, Abshalomnıń qızı Maaxanı kóbirek jaqsı kórdi. Rexabamnıń on segiz hayalı hám alpıs toqalı bolıp, olardan jigirma segiz ul hám alpıs qızı bar edi. 22 Rexabam Maaxadan tuwılǵan ulı Abiyanı óz taxtınıń miyrasxorı qılmaqshı bolıp, basqa tuwısqanlarına basshı etip qoydı. 23 Rexabam aqıllılıq penen is tutıp, basqa ullarınıń hámmesin Yahuda menen Benyamin jerlerindegi qorǵanlı qalalarǵa bólip jiberdi. Olardı kerek-jaraǵı menen moldan támiyinlep, bir qansha hayallar alıp berdi.