2Ch 12 | KaaIBT22L | STEP | Rexabam óz húkimdarlıǵın bekkemlep, kúshke tolǵannan keyin, onıń ózi de, pútkil Izrail xalqı da Jaratqan Iyeniń Nızamınan júz burdı.

‏ 2 Chronicles 12

Shishaqtıń Yahudaǵa hújim jasawı

1 Rexabam óz húkimdarlıǵın bekkemlep, kúshke tolǵannan keyin, onıń ózi de, pútkil Izrail xalqı da Jaratqan Iyeniń Nızamınan júz burdı. 2 Olar Jaratqan Iyege qıyanet etti. Sonlıqtan Rexabamnıń patshalıǵınıń besinshi jılında Mısır patshası Shishaq Erusalimge hújim jasadı. 3 Shishaq ózi menen birge Mısırdan bir mıń eki júz sawash arbasın, alpıs mıń atlı áskerdi, sonday-aq liviyalı, suklı hám xabashstanlı san-sanaqsız láshkerlerdi alıp keldi. 4 Shishaq Yahudanıń qorǵanlı qalaların basıp alıp, Erusalimge deyin jaqınlastı. 5 Sonda Shishaqtan qorqıp, Erusalimge jıynalǵan Rexabamǵa hám Yahuda basshılarına payǵambar Shemaya kelip, bılay dedi:

– Jaratqan Iye bılay deydi: «Sizler Meni tárk ettińiz, endi Men de sizlerdi tárk etip, Shishaqtıń qolına tapsıraman».

6 Izrail basshıları hám patsha óz ayıpların tán alıp:

– Jaratqan Iye ádil, – dedi.

7 Jaratqan Iye olardıń ayıpların tán alǵanın kórgende, Shemayaǵa Onnan mınaday sóz tústi: «Olar gúnaların moyınladı. Sonlıqtan Men olardı qırıp taslamayman, qutqarılıwı ushın az-maz járdem beremen. Erusalimge degen ǵázebim Shishaq arqalı tógilmeydi. 8 Biraq olardı Shishaqqa baǵınıshlı qılaman. Sonda olar Maǵan xızmet etiw menen basqa ellerdiń patshalarına xızmet etiw arasındaǵı ayırmashılıqtı bilip aladı».

9 Mısır patshası Shishaq Erusalimge bastırıp kelip, Jaratqan Iyeniń Úyindegi hám patsha sarayındaǵı ǵáziynelerdi tartıp alıp ketti. Ol hámme nárseni, Sulayman soqtırǵan altın qalqanlardı da aldı. 10 Patsha Rexabam olardıń ornına qoladan qalqanlar isletip, olardı patsha sarayınıń kirer awzın qorǵaytuǵın saqshılardıń basshılarına berdi. 11 Patsha Jaratqan Iyeniń Úyine hár barǵanda, saqshılar patshanıń qasında bul qalqanlardı alıp júretuǵın, sońınan jáne saqshılardıń bólmesine aparıp qoyatuǵın edi.

12 Rexabam gúnasın moyınlaǵanda, Jaratqan Iye ǵázepten qaytıp, Yahuda xalqın tolıq qırıp jibermedi. Yahudada ele de jaqsı isler bar edi.

13 Patsha Rexabam Erusalimde patshalıǵın bekkemlep, húkimdarlıq qıla berdi. Ol taxtta otırǵanda qırıq bir jasta edi. Rexabam Jaratqan Iye Óz atın ornatıw ushın Izraildıń pútkil urıwları arasınan tańlap alǵan qalası Erusalimde on jeti jıl patshalıq qıldı. Onıń anası ammon xalqınan bolıp, atı Naama edi. 14 Rexabam Jaratqan Iyege shın júrekten umtılmaǵanı sebepli, jaman islerdi islep turdı. 15 Rexabam islegen isler basınan ayaǵına shekem Shemaya payǵambardıń jazıwlarında hám wáliy Iddonıń shejirege kirgizilgen jazıwlarında bayan etilgen. Rexabam menen Yarobam pútkil ómiri dawamında urısıp keldi. 16 Rexabam ólip, ata-babalarına qosıldı hám Dawıttıń qalasına jerlendi. Onıń ornına ulı Abiya patsha boldı.