2Ch 13 | KaaIBT22L | STEP | Izrail patshası Yarobamnıń patshalıǵınıń on segizinshi jılında Abiya Yahudaǵa patsha boldı.

‏ 2 Chronicles 13

Yahuda patshası Abiya

1 Izrail patshası Yarobamnıń patshalıǵınıń on segizinshi jılında Abiya Yahudaǵa patsha boldı. 2 Ol Erusalimde úsh jıl patshalıq etti. Abiyanıń anası gibalı Urieldiń qızı Mixaya edi.

Abiya menen Yarobam ortasında urıs boldı. 3 Abiya tórt júz mıń aǵla áskerdi sawashqa basladı. Yarobam bolsa, segiz júz mıń aǵla hám márt áskerin oǵan qarsı sapqa dizdi. 4 Abiya Efrayımnıń tawlı úlkesindegi Semarayım tawına shıǵıp, bılay dedi:

– Háy, Yarobam hám pútkil Izrail, meni tıńlańlar! 5 Izraildıń Qudayı Jaratqan Iyeniń buzılmas bir kelisim boyınsha Izrailǵa patshalıq qılıwdı máńgige Dawıtqa hám onıń urpaqlarına bergenin bilmeysiz be? 6 Biraq Dawıt ulı Sulaymannıń xızmetshisi Nabat ulı Yarobam óz mırzasına qarsı bas kóterdi. 7 Onıń qasına ońbaǵan hám jaramas adamlar jıynalıp, Sulayman ulı Rexabamǵa qarsı shıqtı. Rexabam sol waqıtta jas hám tájiriybesiz bolǵanlıqtan, olarǵa qarsı tura almadı. 8 Endi bolsa, Dawıttıń urpaǵınıń qolında bolǵan Jaratqan Iyeniń patshalıǵına qarsı turmaqshısız. Awa, sizler kópshiliksiz! Bunıń ústine, qudayıńız dep Yarobam soqtırıp bergen altın tanalar ^{▼▼ 3Pat 12:26-30.} da janıńızda! 9 Jaratqan Iyeniń ruwxaniyleri bolǵan Xaronnıń urpaqların hám lebiylilerdi quwıp jibergen sizler emes pe? Olardıń ornına basqa xalıqlardıń dástúrine say, ápiwayı adamlardan ruwxaniylerdi qoyıp alǵan joqsız ba? Awa, tayınlanıw rásimine bir buǵa yamasa jeti qoshqar alıp kelgen hár bir adam jalǵan qudaylarǵa ruwxaniy bola aladı-dá! 10 Al bizlerge kelsek, Jaratqan Iye bizlerdiń Qudayımız! Bizler Onnan júz burmadıq. Jaratqan Iyege xızmet etip atırǵan ruwxaniyler de Xaron urpaǵınan bolıp, lebiyliler olarǵa járdem bermekte. 11 Olar hár kúni azanda hám keshte Jaratqan Iyege jandırılatuǵın qurbanlıqlar beredi, xosh iyisli tútetkiler tútetedi, arnawlı stolǵa usınılǵan nanlar qoyadı, hár kúni keshte altın shıra qoyǵıshtaǵı shıralardı jaǵadı. Awa, bizler Qudayımız Jaratqan Iyeniń tapsırmaların orınlap júrmiz. Al sizler bolsańız, Onı tárk ettińiz. 12 Quday bizler menen birge, Ol bizlerdiń jolbasshımız. Onıń ruwxaniyleri kárnaylar shalıp, sizlerge qarsı urısqa shaqıradı. Izrail urpaqları, ata-babalarıńızdıń Qudayı Jaratqan Iyege qarsı urıspańlar! Bári bir jeńiske erispeysiz.

13 Sol arada Yarobam áskerleriniń bir bólegin Yahuda áskerleriniń artqı tárepine buqqı qoyıw ushın jibergen edi. Áskerlerdiń tiykarǵı bólimi Yahuda áskerleriniń aldında turdı, al buqqıdaǵılar artqı tárepinde edi. 14 Yahuda áskerleri átirapqa qarap, ózlerine aldıdan da arttan da hújim jasamaqshı bolıp turǵanlardı kórgende, Jaratqan Iyege jalbarındı. Al ruwxaniyler kárnayların shaldı. 15 Yahuda áskerleri súren salıp baqırıstı. Olar baqırısqanda, Quday Yarobamdı hám izraillılardı Abiya menen Yahuda aldında qırǵınǵa ushırattı. 16 Izraillılar yahudalılardıń aldına túsip qashtı hám Quday olardı yahudalılarǵa táslim etti. 17 Abiya hám onıń áskerleri izraillılarǵa awır soqqı berdi. Izraillılardıń bes júz mıń aǵla áskeri qaza taptı. 18 Solay etip izraillılar jeńiliske ushıradı. Al yahudalılar ata-babalarınıń Qudayı Jaratqan Iyege súyengeni ushın jeńiske eristi. 19 Abiya Yarobamdı quwıp ketip, oǵan tiyisli Beyt-El, Eshana, Efron qalaların hám olardıń dógeregindegi awıllardı qolǵa kirgizdi.

20 Yarobam Abiya dáwirinde óziniń burınǵı qúdiretin tikley almadı. Jaratqan Iye onıń janın aldı hám ol qaytıs boldı. 21 Al Abiyanıń húkimdarlıǵı kúsheye berdi. Ol on tórt hayal alıp, olardan jigirma eki ul hám on altı qızlı boldı. 22 Abiyanıń basqa isleri, islegen isleri hám aytqanları Iddo payǵambardıń túsindirme kitabında jazılǵan.