2Ch 14 | KaaIBT22L | STEP | Abiya ólip, ata-babalarına qosılǵanda, Dawıttıń qalasına jerlendi. Onıń ornına ulı Asa patsha boldı. Asanıń dáwirinde elde on jıl tınıshlıq boldı.

‏ 2 Chronicles 14

1 Abiya ólip, ata-babalarına qosılǵanda, Dawıttıń qalasına jerlendi. Onıń ornına ulı Asa patsha boldı. Asanıń dáwirinde elde on jıl tınıshlıq boldı.

Yahuda patshası Asa

2 Asa Qudayı Jaratqan Iyeniń názerinde jaqsı hám durıs bolǵan islerdi isledi. 3 Ol jat qudaylardıń qurbanlıq orınları menen sıyınıw orınların alıp taslap, kiyeli taslardı hám kiyeli aǵashlardı buzıp tasladı. 4 Ol yahudiylerge ata-babalarınıń Qudayı Jaratqan Iyege júz burıp, Onıń nızam hám buyrıqların orınlawdı buyırdı. 5 Ol Yahudanıń barlıq qalalarındaǵı sıyınıw orınların hám tútetki tútetiletuǵın orınlardı alıp tasladı. Onıń dáwirinde patshalıq paraxatshılıqta jasadı. 6 Elde tınıshlıq húkim súrgen waqıtta, Asa Yahudada qorǵanlı qalalar qurdı. Sol jılları onıń menen hesh kim urıspadı, sebebi Jaratqan Iye oǵan tınıshlıq sıylaǵan edi. 7 Asa Yahuda xalqına bılay degen edi: «Mına qalalardı salıp, átirapın diywallar menen qorshayıq. Olarǵa minaralar hám támbilenetuǵın dárwazalar qurıp, qalalardı bekkemleyik. Bizler Qudayımız Jaratqan Iyege júz burǵanımız ushın, bul el ele bizlerdiki. Awa, bizler Oǵan júz burdıq hám Ol bizlerge hár tárepleme tınıshlıq sıyladı».

Solay etip, olar qurılıstı baslap, tabıslı tamamladı.

8 Asanıń Yahuda urıwınan úlken qalqan hám nayza menen qurallanǵan úsh júz áskeri, al Benyamin urıwınan kishkene qalqan hám oq jay menen qurallanǵan eki júz seksen áskeri bar edi. Olardıń hámmesi márt jawıngerler edi.

9 Xabashstanlı Zerax millionlaǵan áskeri hám úsh júz sawash arbası menen Yahudaǵa atlanıp, Maresha qalasına jetip keldi. 10 Asa oǵan qarsı atlandı. Olar Mareshaǵa jaqın jerdegi Sefata oypatlıǵında urısıw ushın sap tartıp turdı. 11 Asa óz Qudayı Jaratqan Iyege:

– Jaratqan Iye! Kúshliniń aldında turǵan kúshsizge Sennen basqa hesh kim járdem bere almaydı. Qudayımız Jaratqan Iye, bizlerge járdem bere gór! Sebebi bizler Saǵan súyenemiz hám Seniń atıń menen mına sansız láshkerge qarsı shıǵıp turmız. Jaratqan Iye, Sen bizlerdiń Qudayımızsań, insan zatınıń Ózińdi jeńiwine jol qoyma! – dep jalbarındı.

12 Sonda Jaratqan Iye Asa menen yahudalılardıń aldında xabashstanlılardı qırǵınǵa ushıratıp, xabashstanlılar qasha basladı. 13 Asa bolsa óz áskerleri menen olardı Gerarǵa deyin quwıp bardı. Xabashstanlılardan qaza tapqanlar sonshelli kóp bolıp, birde birewi aman qalmadı. Olar Jaratqan Iyeniń hám Onıń ordasınıń aldında qırıp taslandı. Yahuda áskerleri kóp olja menen qayttı. 14 Gerar átirapındaǵı qalalarda jasaytuǵın xalıq Jaratqan Iyeden qorqıp qalǵan edi. Yahudalılar olarǵa da shabıwıl jasap, qırǵınǵa ushırattı hám talan-taraj etip, mol olja alıp qayttı. 15 Yahudalılar shopanlardıń shatırlarına da shabıwıl jasap, olardıń kóp qoy-eshki hám túyelerin aydap ketti. Keyin olar Erusalimge qaytıp keldi.