2 Chronicles 15
Patsha Asanıń jeńillikleri
1Oded ulı Azariyanıń ústine Qudaydıń Ruwxı tústi. 2Sonda Azariya patsha Asa menen ushırasıw ushın jolǵa shıqtı hám oǵan barıp bılay dedi: – Háy, Asa, pútkil Yahuda hám Benyamin xalqı, maǵan qulaq salıńlar! Sizler Jaratqan Iye menen birge bolǵan dáwirde, Ol da sizler menen birge boladı. Eger Onı izleseńiz, tabasızlar. Al eger Onı tárk etseńiz, Ol da sizlerdi tárk etedi. 3Uzaq waqıt dawamında Izrail xalqı haqıyqıy Qudaydan, tálim beretuǵın ruwxaniyden hám Onıń Nızamınan alısta jasadı. 4Biraq qıyınshılıqqa ushıraǵanında olar Izraildıń Qudayı Jaratqan Iyege bet burıp, Onı izledi hám Onı taptı. 5Sol kúnleri saparǵa shıǵıw qáwipli bolıp, hámme ellerdiń turǵınları ushın ǵawasatlı waqıtlar edi. 6Millet milletke, qala qalaǵa qarsı urısatuǵın edi. Sebebi Quday olardı hár túrli apatshılıqlarǵa ushıratıp, albıratıp qoyǵan edi. 7Biraq sizler bekkem bolıńlar! Túskinlikke túspeńler! Óytkeni miynetińizdiń jemisin alasızlar. 8Oded ulı Azariya payǵambardıń bul payǵambarshılıq sózlerin esitkende, Asa jigerlendi. Ol pútkil Yahuda menen Benyamin jerlerindegi hám Efrayımnıń tawlı úlkesindegi ózi qolǵa kirgizgen qalalardaǵı jerkenishli butlardı alıp tasladı. Sonday-aq, Jaratqan Iyeniń Úyiniń aywanınıń aldına ornatılǵan Jaratqan Iyeniń qurbanlıq ornın qayta tikledi. 9Bunnan keyin, Asa Yahuda hám Benyamin urıwı menen birge olardıń arasında jasap atırǵan Efrayım, Menashshe hám Shimon urıwınan bolǵanlardı topladı. Óytkeni kóp adamlar Asanıń Qudayı Jaratqan Iyeniń onıń menen birge ekenin kórip, Izraildı taslap, Yahudaǵa kóship kelgen edi. 10Olar Asanıń húkimdarlıǵınıń on besinshi jılınıń úshinshi ayında Erusalimge jıynaldı. 11Sol kúni olar urıstan alıp kelgen oljasınan jeti júz bas iri mal hám jeti mıń bas mayda maldı Jaratqan Iyege arnap qurbanlıqqa berdi. 12Xalıq ata-babalarınıń Qudayı Jaratqan Iyeni shın júrekten, jan-táni menen izlew ushın kelisim dúzdi. 13Izraildıń Qudayı Jaratqan Iyeni izlemegen hár bir adam: jas bolsın, ǵarrı bolsın, erkek bolsın, hayal bolsın hámmesi óltiriletuǵın boldı. 14Olar baqırıp, hár túrli kárnaylar hawazları astında bálent dawıs penen Jaratqan Iyege ant ishti. 15Pútkil yahudalılar bergen antı ushın quwanıshlı edi, sebebi olar shın júrekten ant ishken edi. Olar ıqlaslanıp Jaratqan Iyeni izlegeni ushın, Onı taptı. Jaratqan Iye olarǵa hár tárepleme tınıshlıq berdi. 16Kempir apası Maaxa Asheraǵa arnap jerkenishli bir but soqtırǵanı ushın, patsha Asa onnan xanbiykelik ataǵın tartıp aldı. Asa bul jerkenishli buttı shawıp taslap, maydalap, Kidron sayında jaǵıp jiberdi. 17Ol Izraildaǵı sıyınıw orınların joq qılmasa da, ómir boyı Jaratqan Iyege sadıq qaldı. 18Asa ákesiniń hám óziniń ataǵan nárselerin: gúmisti, altındı hám buyımlardı Qudaydıń Úyine alıp keldi. 19Asanıń patshalıǵınıń otız besinshi jılına deyin elde urıs bolmadı.
Copyright information for
KaaIBT22L