2Ch 16 | KaaIBT22L | STEP | Yahuda patshası Asanıń húkimdarlıǵınıń otız altınshı jılında Izrail patshası Baasha Yahudaǵa qarsı shıqtı hám Asanıń jerlerine hesh kimniń kirip-shıqpawı ushın, Rama qalasınıń bekinisin kúsheytti.

‏ 2 Chronicles 16

Asanıń sońǵı jılları

1 Yahuda patshası Asanıń húkimdarlıǵınıń otız altınshı jılında Izrail patshası Baasha Yahudaǵa qarsı shıqtı hám Asanıń jerlerine hesh kimniń kirip-shıqpawı ushın, Rama qalasınıń bekinisin kúsheytti. 2 Sonda Asa Jaratqan Iyeniń Úyindegi hám saray qaznasındaǵı gúmis penen altındı aldı da, olardı xızmetshileri arqalı Damaskte jasaytuǵın Aram patshası Ben-Hadadqa jiberip, oǵan bılay dedi: 3 «Ákelerimiz arasında bolǵanı sıyaqlı, bizlerdiń aramızda da kelisim bolsın. Sizge gúmis hám altın jiberip atırman. Izrail patshası Baasha meniń jerimnen ketiwi ushın, siz onıń menen dúzgen kelisimińizdi buzsańız».

4 Ben-Hadad patsha Asanıń usınısın qabıl etip, Izrail qalalarına qarsı áskerbasıların jiberdi. Olar Iyyon, Dan, Abel-Mayım qalaların, pútkil Naftaliy jerindegi barlıq telekleri bar qalalardı basıp aldı. 5 Baasha bunı esitkende, Ramanıń bekinisiniń qurılısın toqtatıp, isti taslap ketti. 6 Patsha Asa pútkil yahudalılardı shaqırttı. Olar Ramanıń bekinisin qurǵanda, Baasha qollanǵan tas hám aǵashlardı Ramadan tasıp alıp ketti hám patsha Asa olardan Geba hám Mispa qalalarınıń bekinisin kúsheytti.

7 Sol waqıtları kózi ashıq Xananiy Yahuda patshası Asaǵa kelip, bılay dedi:

– Siz Qudayıńız Jaratqan Iyege súyenbey, Aram patshasına súyendińiz. Sol sebepli Aram patshasınıń áskerlerin qoldan shıǵardıńız. 8 Esińizge túsiriń, xabashstanlılar menen liviyalılar kóp sanlı sawash arbaları hám atlıları menen úlken bir orda bolıp kelmep pe edi? Sonda siz Jaratqan Iyege súyengenińiz ushın, Ol olardı sizge táslim etken edi. 9 Jaratqan Iye Ózine shın júrekten sadıq bolǵanlarǵa kúsh-quwat berip turıw ushın, pútkil jer júzine názer salıp turadı. Siz aqılsızlarsha is tuttıńız, sol sebepli bunnan bılay siziń basıńız urıstan shıqpaydı.

10 Asa kózi ashıqtıń bul sózlerine ǵázeplendi. Onıń ǵázeplengeni sonshelli, kózi ashıqtı zindanǵa taslattı. Sol waqıtları Asa xalqınıń ayırımlarına qısım kórsetip, ezdi.

11 Asanıń barlıq isleri basınan ayaǵına shekem, Yahuda hám Izrail patshalarınıń jılnama kitabında jazılǵan. 12 Húkimdarlıǵınıń otız toǵızınshı jılında, Asa ayaq awırıwına shalındı. Awırıwı asqınlap atırǵan bolsa da, ol Jaratqan Iyege júz burmay, táwiplerden úmit etti. 13 Asa óz húkimdarlıǵınıń qırıq birinshi jılı ólip, ata-babalarına qosıldı. 14 Onı hár túrli xosh iyisli zatlarǵa toltırılǵan tabıtqa jatqarıp, Dawıttıń qalasında ózi ushın oydırǵan qábirge qoydı. Onıń húrmetine úlken ot jaqtı.