2 Chronicles 17
Yahuda patshası Ehoshafat
1Asanıń ornına ulı Ehoshafat patsha boldı hám Izrailǵa qarsı bekinisin kúsheytti. 2Ol Yahudanıń barlıq qorǵanlı qalalarına áskerlerin ornalastırıp, pútkil Yahuda jerinde hám ákesi Asa Efrayım urıwınan basıp alǵan qalalarǵa saqshılar toparların qoydı. 3Ehoshafat babası Dawıttıń dáslepki júrgen jollarınan júrgeni ushın, Jaratqan Iye onıń menen birge boldı. Ol Baallarǵa sıyınbay, 4ákesi Asa sıyınǵan Qudayǵa umtılıp, Onıń buyrıqlarına boysındı. Al Izrail xalqı islegen dástúrlerge ermedi. 5Sonlıqtan Jaratqan Iye Ehoshafattıń patshalıǵın bekkemledi. Pútkil Yahuda eli oǵan sıylıqlar alıp kelip turdı. Usılayınsha patsha mol baylıqqa hám húrmetke iye boldı. 6Onıń júregi Jaratqan Iyege baǵıshlanǵan edi. Ol Yahudadaǵı sıyınıw orınların hám kiyeli aǵashlardı alıp tasladı. 7Ehoshafat óz húkimdarlıǵınıń úshinshi jılında óziniń xızmetkerlerinen Ben-Xayıldı, Obadiyanı, Zexariyanı, Netaneldi hám Mixayanı xalıqqa tálim beriwi ushın Yahuda qalalarına jiberdi. 8Olar menen birge lebiylilerden: Shemaya, Netaniya, Zebadiya, Asahel, Shemiramot, Ehonatan, Adoniya, Tobiya hám Tob-Adoniyanı, ruwxaniylerden: Elishama hám Ioramdı jiberdi. 9Jiberilgenler Jaratqan Iyeniń Nızam kitabın janına alıp júrip, Yahudada tálim berdi. Olar pútkil Yahuda qalaların aralap, xalıqqa úyretti. 10Yahuda átirapındaǵı barlıq úlkelerdiń patshalıqlarına Jaratqan Iye qorqıw salǵanlıqtan, olardıń hesh biri Ehoshafatqa qarsı urıs ashpadı. 11Bazı filistler sawǵa hám salıq sıpatında Ehoshafatqa gúmis, al arablar mayda mal súriwin: jeti mıń jeti júz qoshqar hám jeti mıń jeti júz teke alıp keldi. 12Ehoshafat kúsheyip bara berdi. Ol Yahudada qorǵanlar hám telekleri bar qalalar qurǵızıp, 13Yahuda qalalarında kóp muǵdarda kerek-jaraq jıynap qoydı. Al Erusalimde tájiriybeli márt jawıngerleri bar edi. 14Olardıń áwladları boyınsha dizimi mınaday: Yahuda urıwında mıńbasılar bar edi. Áskerbası Adna úsh júz mıń márt jawıngerdi basqardı. 15Onnan keyingi áskerbası Ehoxanan bolıp, ol eki júz seksen mıń jawıngerge basshılıq etti. 16Onnan keyingi áskerbası Zixriy ulı Amasiya bolıp, ol eki júz mıń márt jawıngerge basshılıq etti. Amasiya óz erki menen Jaratqan Iyege xızmet etip atırǵan edi. 17Benyamin urıwınan shıqqan oq jay hám qalqan menen qurallanǵan eki júz mıń márt jawıngerge Elyada basshılıq etti. 18Onnan keyingi áskerbası Ehozabad urısqa tayar, qurallanǵan bir júz seksen mıń adamdı basqardı. 19Bul jawıngerler patshanıń pútkil Yahuda elindegi bekinisli qalalarına jaylastırǵan áskerlerinen tısqarı áskerleri edi.
Copyright information for
KaaIBT22L