‏ 2 Chronicles 18

Payǵambar Mixanıń Axabtı eskertiwi

1Yahuda patshası Ehoshafat júdá bay bolıp, ataq-abırayı asıp ketti. Ol Izrail patshası Axab penen quda-tamır boldı. 2Aradan bir neshe jıl ótkennen soń, Ehoshafat Axabtı kóriw ushın Samariyaǵa bardı. Axab Ehoshafattıń hám onıń menen barǵanlardıń húrmetine kóplegen mayda hám iri mallardı soydı hám Giladtaǵı Ramot qalasına hújim qılıwǵa kóndirmekshi boldı. 3Sońınan Izrail patshası Axab Yahuda patshası Ehoshafattan:

– Giladtaǵı Ramotqa meniń menen birge barasız ba? – dep soradı.

Ehoshafat Axabqa:

– Meni ózińizdey, xalqımdı xalqıńızday, kóriń. Siz benen birge urısqa baramız, – dep juwap berdi. 4Sońınan Ehoshafat:

– Dáslep Jaratqan Iyeniń ne deytuǵının bilip alayıq, – dedi.

5Sonda Izrail patshası tórt júz payǵambardı toplap, olarǵa:

– Giladtaǵı Ramotqa qarsı urısıw ushın barayıq pa yamasa barmayıq pa? – dep soradı.

Olar:

– Barıń, Quday qalanı sizge táslim etedi, – dep juwap berdi.

6Biraq Ehoshafat:

– Bul jerde bulardan basqa Jaratqan Iyeniń payǵambarı bar ma? Onnan da sorayıq, – dedi.

7Izrail patshası Ehoshafatqa:

– Jaratqan Iyeniń erkin soraǵanday, jáne bir payǵambar bar. Ol Imla ulı Mixa. Biraq men onı jaman kóremen. Sebebi ol men tuwralı hesh jaqsı payǵambarshılıq aytpaydı, tek jaman payǵambarshılıq aytadı, – dep juwap berdi.

Ehoshafat patshaǵa:

– Patsha, bulay demeńiz, – dedi.

8Sonda Izrail patshası bir xızmetkerdi shaqırıp, oǵan:

– Imla ulı Mixanı tez alıp kel, – dep buyırdı.

9Izrail patshası Axab hám Yahuda patshası Ehoshafat patshalıq kiyimlerin kiyip, Samariyanıń dárwazasınıń kirer awzındaǵı maydanda, hár biri óz taxtında otırǵan edi. Barlıq payǵambarlar olardıń aldında payǵambarshılıq etip atırǵan edi. 10Kenaana ulı Sedekiya ózine temirden shaqlar islep:

– Jaratqan Iye bılay deydi: «Aramlılardı qırıp tawıspaǵansha, usı shaqlar menen súze beresiz», – dedi.

11Basqa payǵambarlardıń hámmesi de:

– Giladtaǵı Ramotqa hújim etiń, jeńiske erisesiz. Sebebi Jaratqan Iye olardı sizge táslim etedi, – dep, anıq sol sózdi qaytaladı.

12Mixanı shaqırıw ushın ketken xızmetker oǵan barıp:

– Mine, payǵambarlardıń hámmesi bir awızdan patshaǵa jaqsı boljawlardı aytıp atır. Siziń sózińiz de olardiki menen birdey bolsın, siz de jaqsı boljaw aytıń, – dedi.

13Biraq Mixa oǵan:

– Tiri Jaratqan Iye haqı ant ishemen: Qudayım maǵan ne dese, sonı aytaman, – dep juwap berdi.

14Mixa patshaǵa keldi. Patsha Mixadan:

– Mixa, bizler Giladtaǵı Ramotqa qarsı urısıw ushın barayıq pa yamasa men onnan bas tartayın ba? – dep soradı.

Mixa patshaǵa:

– Bara berińler, jeńesizler, olar sizlerge táslim etiledi, – dep juwap berdi.

15Degen menen, patsha Mixaǵa:

– Jaratqan Iyeniń atı menen tek haqıyqattı aytıwıń ushın, saǵan neshe márte ant ishkiziwim kerek? – dedi.

16Sonda Mixa patshaǵa bılay dedi:

– Maǵan pútkil izraillılar tawlar ústinde jayılıp júrgen shopansız qoylar sıyaqlı kórinip tur. Jaratqan Iye maǵan: «Bulardıń xojayını joq, hár biri aman-esen úyine qaytsın», – dedi.

17Izrail patshası Ehoshafatqa:

– Bunıń men tuwralı jaqsı emes, al tek jaman payǵambarshılıq aytatuǵının sizge aytqan joq pa edim? – dedi.

18Mixa patshaǵa bılay dedi:

– Onda Jaratqan Iyeniń sózin tıńlań. Men Jaratqan Iyeniń Óz taxtında otırǵanın, pútkil aspan barlıqlarınıń Onıń oń hám shep tárepinde turǵanın kórdim. 19Sonda Jaratqan Iye: «Giladtaǵı Ramotqa barıp, sol jerde óliwi ushın, Izrail patshası Axabtı kim kóndire aladı?» – dep soradı. Birewi anaw, birewi mınaw dep turǵanda, 20bir ruwx aldıǵa shıqtı da, Jaratqan Iyeniń aldında turıp: «Men kóndire alaman», – dedi. Jaratqan Iye onnan: «Qalay?» – dep soradı. 21Sol ruwx: «Men jalǵan ruwxqa aylanıp, Axabtıń barlıq payǵambarlarına jalǵan sóyletemen», – dep juwap berdi. Jaratqan Iye oǵan: «Sen onı kóndirip, bunı isleyseń. Barıp, solay isle», – dedi. 22Mine, házir Jaratqan Iye siziń sol payǵambarlarıńızdıń awzına jalǵan ruwxtı salıp qoydı. Óytkeni Jaratqan Iye sizge jamanlıq islewge qarar etti.

23Kenaana ulı Sedekiya Mixaǵa jaqınlap, onıń betine shapalaq penen urıp jiberdi de:

– Jaratqan Iyeniń Ruwxı seniń menen sóylesiw ushın, mennen qaysı jol arqalı shıǵıp ketken eken? – dedi.

24Mixa oǵan:

– Bunı sen jasırınıw ushın ishki bólmege tıǵılǵan waqtıńda kóreseń, – dedi.

25Sonda Izrail patshası bılay dedi:

– Mixanı qala hákimi Amon menen patshanıń ulı Ioashqa qaytıp alıp barıńlar. 26Olarǵa meniń mına sózimdi jetkiziń: «Men aman-esen qaytıp kelgenimshe, bul adamdı qamaqxanaǵa qamap qoysın hám nan menen suwdan basqa hesh nárse bermesin».

27Mixa patshaǵa:

– Eger aman-esen qaytıp kelseńiz, onda Jaratqan Iye meniń awzım arqalı sóylemegen boladı, – dedi, sońınan xalıqqa:

– Hámmeńiz bunı esitip qoyıńlar, – dedi.

Axabtıń ólimi

28Izrail patshası Axab hám Yahuda patshası Ehoshafat Giladtaǵı Ramotqa hújim jasaw ushın jolǵa shıqtı. 29Izrail patshası Ehoshafatqa:

– Men patshalıq kiyimlerin kiymey, urısqa shıǵaman, al siz patshalıq kiyimlerińizdi kiyip shıǵıń, – dedi. Solay etip, Izrail patshası kiyimlerin ózgertip, olar sawashqa shıqtı.

30Aram patshası óz sawash arbalarınıń áskerbasılarına:

– Kishkenesi menen de, úlkeni menen de urısıp otırmay, tek Izrail patshası menen urısqa kirisiń, – dep buyırdı.

31Sawash arbalarınıń áskerbasıları Ehoshafattı kórgende: «Izrail patshası usı bolsa kerek», – dep oylap, oǵan qaray bas saldı. Ehoshafat baqırıp jibergende, Quday Iye oǵan járdemge kelip, hújim qılıwshılardı basqa jaqqa burıp jiberdi. 32Óytkeni sawash arbalarınıń áskerbasıları onıń Izrail patshası emesligin ańǵarıp, izge qayttı. 33Biraq bir adam tosattan oq jayın atıp jiberip, Izrail patshasın jaradar etti. Oq sawıttıń qosılǵan jerinen kirgen edi. Patsha arbakeshine:

– Izge aylanıp, meni sawash maydanınan alıp shıq, men jaraqatlandım, – dedi. 34Degen menen, sol kúni ǵıjlaǵan sawash bolıp, Izrail patshası óziniń sawash arbası menen tıǵılısta qaldı hám keshke shekem aramlılarǵa qarap turıwǵa májbúr boldı. Keshke taman patsha qaza taptı.