2 Chronicles 19
Wáliy Ehudıń Ehoshafatqa eskertiwi
1Yahuda patshası Ehoshafat Erusalimdegi sarayına aman-esen qaytıp kiyatırǵanda, 2Xananiy ulı wáliy Ehu Ehoshafattıń aldınan shıǵıp, oǵan bılay dedi: – Zalımlarǵa járdem berip, Jaratqan Iyeni jek kórgenlerdi súyiwiń kerek pe edi? Bul isiń ushın saǵan Jaratqan Iyeniń ǵázebi tógildi. 3Degen menen, seniń jaqsı isleriń de bar. Sen eldi kiyeli aǵashlardan tazaladıń hám shın júrekten Qudaydı izlediń.Ehoshafat kirgizgen jeńillikler
4Ehoshafat Erusalimde jasadı. Biraq ol tez-tez Beer-Shebadan Efrayımnıń tawlı úlkelerine deyin jasaytuǵın xalıqtı aralap, olardı ata-babalarınıń Qudayı Jaratqan Iyege júz burıwǵa shaqırar edi. 5Ol Yahuda elindegi barlıq bekinisli qalalarǵa qazılar qoydı. 6Ol qazılarǵa: «Islegen isińizge dıqqatlı bolıńlar. Sebebi sizler adamlar atınan emes, al Jaratqan Iyeniń atınan húkim shıǵarasızlar. Jaratqan Iye húkim isinde sizler menen birge boladı. 7Jaratqan Iyeden qorqıń, itibarlı túrde húkim shıǵarıń. Óytkeni Qudayımız Jaratqan Iye nahaqlıqqa, jaǵımpazlıqqa hám paraǵa kóz jumıp qaramaydı», – deytuǵın edi. 8Ehoshafat Erusalimde de ayırım lebiylilerdi, ruwxaniylerdi hám Izraildıń áwlad basshıların Jaratqan Iyeniń Nızamına baylanıslı sheshimlerdi qabıllaw hám dawlardı sheshiw ushın tayınladı. Olar Erusalimde jasadı 9Patsha olarǵa mınaday buyrıq berdi: «Sizler óz wazıypalarıńızdı Jaratqan Iyeden qorqqan halda, sadıqlıq penen shın júrekten orınlańlar. 10Óz qalalarında jasap atırǵan tuwısqanlarıńız: tógilgen qan tuwralı bolsın, Jaratqan Iyeniń Nızamına, buyrıqlarına, qaǵıydalarına yamasa qararlarına baylanıslı bolsın, qanday da bir dawa menen kelse, olarǵa Jaratqan Iyege qarsı gúna islemewdi qatań eskertiń. Sonda gúnadan qalıs bolasız. Bolmasa, sizge de, tuwısqanıńızǵa da Jaratqan Iyeniń ǵázebi tógiledi. 11Jaratqan Iyeniń Nızamına baylanıslı islerde bas ruwxaniy Amariya, patshaǵa baylanıslı islerde Yahudanıń urıwbasısı Ismayıl ulı Zebadiya basshılıq etedi. Al lebiyliler bolsa, bul islerdi qadaǵalawda sizlerge járdem beredi. Márt bolıp iske kirisiń, Jaratqan Iye jaqsılıq islewshilerge yar bolsın!»
Copyright information for
KaaIBT22L