2Ch 2 | KaaIBT22L | STEP | Sulayman Jaratqan Iyege arnap Úy hám ózi ushın bir saray qurıwdı buyırdı.

‏ 2 Chronicles 2

Qudaydıń Úyiniń qurılısına tayarlıq

1 Sulayman Jaratqan Iyege arnap Úy hám ózi ushın bir saray qurıwdı buyırdı. 2 Ol júk tasıw ushın jetpis mıń, tawlarda tas kesiw ushın seksen mıń hám olardı qadaǵalaw ushın úsh mıń altı júz adam belgiledi. 3 Sulayman Tir patshası Xiramǵa bılay dep aytıw ushın adamların jiberdi: «Ákem Dawıt ózi jasaw ushın saray saldırǵanda jibergen kedr bórenelerinen maǵan da jiberseńiz. 4 Házir men Qudayım Jaratqan Iyege arnap Úy qurıp, Úydi Oǵan baǵıshlamaqshıman. Sol jerde Onıń aldında xosh iyisli tútetkiler tútetilip, hárdayım usınılǵan nanlar turıwı kerek. Jáne de, hár kúni azanda hám keshte, Shabbat kúnleri, Jańa ay bayramlarında hám Qudayımız Jaratqan Iye belgilegen bayramlarda jandırılatuǵın qurbanlıqlar usınılıwı tiyis. Bul rásimler Izrail ushın máńgi qaǵıyda boladı. 5 Qudayımız basqa barlıq qudaylardan ullı bolǵanlıǵı sebepli, Men quratuǵın Úy de asa ullı boladı. 6 Biraq kókler, hátte, kóklerdiń kókleri Onı sıyǵıza almaǵanda, Oǵan arnap Úy qurıwǵa kimniń shaması jetedi? Oǵan arnap Úy quratuǵınday, men kim bolıppan? Tek Onıń aldında qurbanlıqlardı órtep usınıw ushın bir orın qurmaqshıman. 7 Sol sebepli maǵan altın, gúmis, qola hám temirden zat islewde, shım qızıl, qırmızı hám qızǵısh kók reńli jiplerden zat toqıwda hám oymashılıqta sheber usta bolǵan bir adam jiberseńiz. Ol ákem Dawıt jetistirgen sheber ustalar menen birge Yahudada hám Erusalimde jumıs islesin. 8 Maǵan Lebanon tawlarınan kedr, sárwi hám sapalı arsha aǵashların da jiberseńiz. Sebebi adamlarıńızdıń Lebanondaǵı aǵashlardı kesiwge uqıplı ekenin bilemen. Meniń adamlarım siziń adamlarıńız benen birge isleydi. 9 Olar maǵan júdá kóp muǵdarda aǵash kesip bersin. Óytkeni men quratuǵın Úy záwlim hám saltanatlı bolıwı kerek. 10 Men aǵashlardı kesetuǵın adamlarıńızǵa jigirma mıń kor ^{▼▼ Jigirma mıń kor – bir kor shama menen 220 l.} jenshilgen biyday, jigirma mıń kor arpa, jigirma mıń bat ^{▼▼ Jigirma mıń bat – bir bat shama menen 22 l.} sharap hám jigirma mıń bat záytún mayın jiberemen».

11 Tir patshası Xiram Sulaymanǵa xat arqalı bılay dep juwap berdi: «Jaratqan Iye Óz xalqın súygenlikten, sizdi patsha etip qoydı».

12 Xiram xatın bılay dawam etti: «Aspan hám jerdi jaratqan Izraildıń Qudayı Jaratqan Iyege alǵıslar bolsın! Ol patsha Dawıtqa Jaratqan Iye ushın Úy, ózi ushın saray salatuǵın dana, aqıllı hám parasatlı ul inam etipti. 13 Sizge Xuram-Abiy degen aqıllı hám sheber bir adamdı jiberemen. 14 Onıń anası Dan urıwınan, al ákesi tirli. Xuram-Abiy altın, gúmis, qola, temir, tas hám aǵash penen, shım qızıl, qızǵısh kók hám qırmızı reńli jipler, jáne hasıl zıǵır menen jumıs isley aladı. Ol oymashılıqtıń hámme túrlerine usta bolıp, qálegen buyırtpańızdı orınlay aladı. Ol siziń sheberlerińiz hám ákeńiz mırzam Dawıttıń sheberleri menen isleydi. 15 Endi mırzam, ózińiz aytqan biyday, arpa, záytún mayı hám sharaptı qullarıńızǵa jiberseńiz. 16 Bizler de Lebanon toǵaylarınan sizge kerekli aǵashlardı kesip, bir-birine baylap sal soǵıp, teńiz arqalı Yafoǵa jetkerip beremiz. Siz aǵashlardı sol jerden Erusalimge alıp ketersiz».

17 Ákesi Dawıt júrgizgen sol sanaqtan keyin, Sulayman da Izrailda jasaytuǵın barlıq shet ellilerdiń esabın aldı. Olardıń sanı bir júz eliw úsh mıń altı júz boldı. 18 Olardıń jetpis mıńın júk tasıwshı, seksen mıńın tawlarda tas kesiwshi, al úsh mıń altı júzin jumısshılar ústinen qadaǵalawshı etip belgiledi.