‏ 2 Chronicles 20

Moablılar menen ammonlarǵa qarsı urıs

1Aradan biraz waqıt ótkennen keyin, moablar, ammonlar hám maon xalqınıń bir bólegi Ehoshafatqa qarsı urıs ashıw ushın jolǵa shıqtı. 2Sonda xabarshılar kelip Ehoshafatqa:

– Edomnan, Óli teńizdiń arǵı tárepinen sizge urıs ashıw ushın úlken orda kiyatır. Olar házir Xaseson-Tamarǵa, yaǵnıy En-Gediyge jetip qaldı, – dep xabarladı.

3Qorqıp ketken Ehoshafat Jaratqan Iyeniń erkin biliwge qarar etti hám pútkil Yahuda boylap oraza tutıwdı járiyaladı. 4Sonda Jaratqan Iyeden járdem soraw ushın, Yahudanıń barlıq qalalarınan xalıq aǵılıp kelip, Erusalimge jıynaldı.

5Ehoshafat Yahuda hám Erusalim jıyınında, Jaratqan Iyeniń Úyiniń jańa háwlisi aldında turıp, 6bılay dep duwa etti:

– Ata-babalarımızdıń Qudayı Jaratqan Iye! Kóklerdegi Quday Sen emespiseń? Sen xalıqlardıń barlıq patshalıqlarına biylik eteseń. Kúsh hám qúdiret Seniń qolıńda. Saǵan hesh kim de qarsı tura almaydı. 7Qudayımız! Usı eldiń burınǵı turǵınların Óz xalqıń Izraildıń aldınan quwıp shıǵıp, eldi Óz dostıń Ibrayımnıń urpaqlarına máńgige bergen Sen emespiseń? 8Olar usı elde qonıs basıp, Seniń atıńa arnap Muxaddes mákan qurdı hám bılay degen edi: 9«Eger apat, yaǵnıy qılıshtan jazalanıw, illet yamasa ashlıq basımızǵa tússe, Óziń bar bolǵan usı Úydiń aldına, Seniń aldıńa kelip, qıyınshılıq ishinde Saǵan jalbarınamız, Sen de bizlerdi esitip, qutqarasań». 10Mine, Ammon, Moab hám tawlı Seir jeriniń turǵınlarınıń ne islep atırǵanına qara! Izraillılar Mısırdan shıqqanda, Sen olarǵa sol xalıqlardıń jerlerine kiriwge ruxsat bermediń. Sonlıqtan olardı aylanıp ótip, olardı qırıp jibermegen edi. 11Endi bolsa, bul xalıqlardıń bizge berip atırǵan sawǵasına qarap qoy! Sen bizlerge múlik etip bergen jerden olar bizlerdi quwıp shıǵarıwǵa kiyatır. 12O Qudayımız, Sen olardı jazalay gór! Sebebi bizlerde ózimizge bastırıp kiyatırǵan bul úlken ordaǵa qarsılıq qılatuǵın kúsh joq. Bizler ne qılıwdı bilmeymiz, biraq kóz tigip, Sennen úmit etemiz.

13Sol waqıtta pútkil Yahuda erkekleri náresteleri, hayalları hám balaları menen birge Jaratqan Iyeniń aldında turǵan edi. 14Sonda jıyın ortasında turǵan Yaxazielge Jaratqan Iyeniń Ruwxı tústi. Asaf urpaǵınan shıqqan lebiyli Yaxaziel Mattaniyanıń quwlıǵı, Eieldiń shawlıǵı, Benayanıń aqlıǵı, Zexariyanıń ulı edi. 15Yaxaziel til qatıp, bılay dedi:

– Háy, pútkil Yahuda menen Erusalim turǵınları hám patsha Ehoshafat, tıńlańlar! Jaratqan Iye sizlerge bılay deydi: «Bul san-sanaqsız láshkerlerden qorqıp, qáweterlenbeń. Bul urıs sizlerdiki emes, Meniki, yaǵnıy Qudaydiki. 16Erteń olarǵa qarsı tómen qaray júristi baslań. Olar Siske baratuǵın jol arqalı kóterilip kiyatır. Sizler olardı Eruel shóliniń aldındaǵı oypatlıqtıń aqırında ushıratasız. 17Biraq sizler urıspaysız. Tek barıp, ornıńızdı iyelep turıp, Jaratqan Iyeniń qutqarıwın kóresiz. Háy, Yahuda hám Erusalim xalqı! Qorqıp, qáweterlenbeń. Erteń olarǵa hújim qılıń, Jaratqan Iye bolǵan Men sizler menen birge bolaman».

18Ehoshafat bası jerge tiygenshe iyilip tájim etti. Pútkil Yahuda hám Erusalim xalqı da tájim etip, Jaratqan Iyege sıyındı. 19Qohat hám Qorax urpaqlarınan taraǵan lebiyliler orınlarınan turıp, bálent dawıs penen Izraildıń Qudayı Jaratqan Iyege alǵıs-maqtaw ayttı.

20Ehoshafattıń láshkerleri erteńine azanda erte turıp, Teqoa shóline atlandı. Olar jolǵa shıǵıp baratırǵanda Ehoshafat toqtap olarǵa:

– Háy Yahuda hám Erusalim turǵınları, meni tıńlań! Qudayıńız Jaratqan Iyege iseniń, sonda biyqáter bolasız! Onıń payǵambarlarına iseniń, sonda tabısqa erisesiz, – dedi.

21Ehoshafat xalıq penen keńesip bolǵannan keyin, Jaratqan Iyege arnap qosıq aytatuǵın hám Onıń muxaddes sán-sawlatın táriyipleytuǵın qosıqshılardı tayınladı. Olar áskerlerdiń aldında júrip: «Jaratqan Iyeni táriyipleń,
Onıń sadıqlıǵı máńgi dawam etedi», –

dep qosıq aytıwı kerek edi.

22Olar qosıq hám alǵıs aytıp baslaǵan waqıtta-aq, Jaratqan Iye Yahudaǵa urıs ashıw ushın kelgen ammon, moab xalıqlarına hám tawlı Seir jeriniń turǵınlarına duzaq qurdı hám olar qırıldı. 23Sebebi ammon hám moab xalqı qırıp taslaw ushın, tawlı Seir jeriniń turǵınlarına bas saldı. Olardı qırıp bolǵannan keyin bolsa, ammon hám moab xalqı bir-birin qıra basladı.

24Yahuda xalqı shól daladaǵı gúzetshi minarasına jetip, dushpan ordasına kóz jibergende, olar tek jerde jatqan óli denelerdi kórdi. Olardıń birewi de qashıp qutılmaǵan eken. 25Ehoshafat óz adamları menen olardan qalǵan nárselerdi oljalaw ushın kelgende, júdá kóp qural-saymanlar, kiyim-kenshekler hám qımbatbaha nárselerdi taptı. Olar kótere alǵandayın alıp ketti. Oljanıń kópligi sonshelli, onı jıynawǵa úsh kún ketti. 26Al tórtinshi kúni olar bir oypatlıqqa jıynalıp, Jaratqan Iyeni alǵısladı. Sonlıqtan ol jer búgin de Beraxa ▼

▼ Beraxa – «alǵıslaw» degendi bildiredi.

oypatlıǵı dep ataladı. 27Keyin pútkil Yahuda hám Erusalim xalqı Ehoshafattıń basshılıǵında quwanısh penen Erusalimge qayttı. Sebebi Jaratqan Iye olardı dushpanlarınan qutqarıp, quwanıshqa bólegen edi. 28Olar lira, arfa hám kárnay naması astında Erusalimge kirip, Jaratqan Iyeniń Úyine bet aldı. 29Izraildıń dushpanlarına qarsı Jaratqan Iyeniń Óziniń urısqanın esitkende, átiraptaǵı patshalar Qudaydan qorqıp qaldı. 30Ehoshafattıń patshalıǵında tınıshlıq húkim súrdi. Onıń Qudayı oǵan hár tárepleme paraxatshılıq sıylaǵan edi.

Ehoshafattıń patshalıǵınıń sońı

31Solay etip, Ehoshafat Yahudaǵa patshalıq etti. Ol otız bes jasında patsha bolıp, Erusalimde jigirma bes jıl patshalıq etti. Onıń anasınıń atı Azuba bolıp, ol Shilxiydiń qızı edi. 32Ehoshafat ákesi Asanıń jolınan júrip, sol joldan shıqpay, Jaratqan Iyeniń názerinde tuwrı bolǵan islerdi isledi. 33Biraq sıyınıw orınların joq qılmadı. Sonlıqtan xalıq ele ata-babalarınıń Qudayına tolıq júz burmadı. 34Ehoshafattıń basqa isleri bastan aqırına deyin, Izrail patshalarınıń jılnama kitabınıń bir bólimi bolǵan Xananiy ulı Ehudıń jılnama kitabında bayan etilgen.

35Keyinirek Yahuda patshası Ehoshafat jaman islerge háwes bolǵan Izrail patshası Axaziya menen tınıshlıq kelisimin dúzdi. 36Olar Tarshishke jiberiw ushın keme soqtırıwǵa kelisip aldı. Kemeler Esion-Geberde soǵıldı. 37Sonda mareshalı Dodawahu ulı Eliezer Ehoshafatqa qarsı payǵambarshılıq etip:

– Sen Axaziya menen kelisim dúzgeniń ushın, Jaratqan Iye seniń isińdi joq qıladı, – dedi. Kemeler apatqa ushırap, Tarshishke kete almadı.