2Ch 21 | KaaIBT22L | STEP | Ehoshafat ólip, ata-babalarına qosıldı hám Dawıttıń qalasına, ata-babalarınıń janına jerlendi. Onıń ornına ulı Ehoram patsha boldı.

‏ 2 Chronicles 21

1 Ehoshafat ólip, ata-babalarına qosıldı hám Dawıttıń qalasına, ata-babalarınıń janına jerlendi. Onıń ornına ulı Ehoram patsha boldı.

Yahuda patshası Ehoram

2 Ehoshafat ulı Ehoramnıń Azariya, Exiel, Zexariya, Azariyahu, Mixail, Shefatiya atlı inileri bar edi. Bulardıń hámmesi Izrail patshası Ehoshafattıń ulları edi. 3 Ákesi Ehoshafat olarǵa mol gúmis, altın hám qımbatbaha nárselerge qosa, Yahudadaǵı qorǵan qalalardı da sawǵa etti. Al Ehoram tuńǵısh perzent bolǵanlıqtan, patshalıqtı oǵan berdi. 4 Biraq Ehoram ákesiniń taxtına otırıp, onı bekkemlegennen soń, barlıq inilerin hám bir qatar Izrail basshıların qılıshtan ótkizdi. 5 Ehoram patsha bolǵan waqıtta otız eki jasta edi. Ol Erusalimde segiz jıl patshalıq etti. 6 Onıń hayalı Axabtıń qızı bolǵanlıqtan, ol da Axabtıń úy-ishi sıyaqlı Izrail patshalarınıń jolınan júrip, Jaratqan Iyeniń názerinde jawız bolǵan islerdi isledi. 7 Biraq Jaratqan Iye Dawıt penen dúzgen kelisimi sebepli, Dawıttıń úy-ishin joq qılmadı. Óytkeni Ol Dawıtqa hám onıń urpaǵına máńgige sónbeytuǵın shıraq beriwdi wáde etken edi. ^{▼▼ 3Pat 11:36.}

8 Ehoramnıń patshalıǵı dáwirinde edomlılar Yahuda húkimdarlıǵına qarsı bas kóterip, ózlerine patsha qoyıp aldı. 9 Ehoram áskerbasıları hám barlıq sawash arbaları menen birge sol jerge ketti. Ol jerde edomlılar onı hám onıń sawash arbalarınıń sárdarların qorshap aldı. Biraq Ehoram túnde turıp, qamaldı jarıp shıqtı. 10 Sonnan baslap usı kúnge deyin edomlılar Yahudanıń húkimdarlıǵına boysınbay keledi. Sol waqıtta Libna qalası da Ehoramnıń húkimdarlıǵına qarsı bas kóterdi. Sebebi Ehoram ata-babalarınıń Qudayı Jaratqan Iyeni tárk etken edi. 11 Sonday-aq, Ehoram Yahudadaǵı tóbeshikli jerlerge sıyınıw orınların qurıp, Erusalim turǵınların Qudayǵa opasızlıq qılıwǵa jeteledi hám Yahuda xalqın joldan azǵırdı. 12 Bir kúni Ehoramǵa payǵambar Iliyastan xat keldi. Onda bılay dep jazılǵan edi:

«Babań Dawıttıń Qudayı Jaratqan Iye bılay deydi: „Sen ákeń Ehoshafattıń hám Yahuda patshası Asanıń jolınan júrmediń. 13 Kerisinshe, Izrail patshalarınıń jolınan júrdiń hám Axabtıń úy-ishiniń islegeni kibi, Yahuda hám Erusalim turǵınların opasızlıqqa basladıń. Bunıń ústine, bir ákeden tuwılǵan, sennen jaqsıraq bolǵan óz inilerińdi óltirdiń. 14 Sonlıqtan Jaratqan Iye, yaǵnıy Men seniń xalqıńa, hayallarıńa, balalarıńa hám pútkil mal-múlkińe ullı apat jiberemen. 15 Ózińdi bolsa awır ishek keselligine jolıqtıraman. Ishekleriń sırtqa tógilgenshe, awırıw kúnnen-kúnge kúsheye beredi“».

16 Bunnan keyin Jaratqan Iye filistlerdi hám xabashstanlılardıń janında jasap atırǵan arablardı Ehoramǵa qarsı qozǵadı. 17 Olar Yahudaǵa shabıwıl jasap, ishkerige bastırıp kirdi hám patshanıń sarayınan tapqan hámme baylıqlardı, sonday-aq patshanıń balaları menen hayalların alıp ketti. Tek Ehoramnıń Ehoaxaz atlı genje ulı ǵana ózinde qaldı.

18 Bul waqıyalardan keyin, Jaratqan Iye Ehoramdı dawası joq ishek keselligine duwshar etti. 19 Waqıt óte berdi, aradan eki jıl ótkende, kesellik sebepli onıń ishekleri sırtqa atılıp shıqtı. Ol qattı qıynalıp jan tapsırdı. Ehoramnıń ata-babaları ólgende, xalıq olardıń húrmetine ot jaǵıw rásimin ótkergen edi, al Ehoramnıń húrmetine ot jaǵılmadı. 20 Ehoram taxtqa otırǵanda otız eki jasta bolıp, Erusalimde segiz jıl patshalıq etti. Ol ushın hesh kim joqlaw aytıp jılamadı. Ol Dawıttıń qalasına jerlengen bolsa da, patshalar qábirine qoyılmadı.