2 Chronicles 22
Yahuda patshası Axaziya
1Erusalim turǵınları Ehoramnıń ornına onıń eń genje ulı Axaziyanı patsha etip qoydı. Sebebi arablar menen birge áskeriy ordaǵa shabıwıl jasaǵan basqınshılar patshanıń Axaziyadan úlken ullarınıń hámmesin óltirgen edi. Usılayınsha, Ehoram ulı Axaziya Yahuda ústinen patshalıq ete basladı. 2Axaziya jigirma eki ▼ jasında patsha bolıp, Erusalimde bir jıl patshalıq etti. Onıń anası Izrail patshası Omriydiń aqlıǵı bolıp, atı Ataliya edi. 3Axaziya Axabtıń urpaǵınıń jolınan júrdi. Sebebi anası oǵan másláhát berip, jaman islerdi islewge túrtki salıp otırdı. 4Axaziya Axabtıń urpaǵı sıyaqlı Jaratqan Iyeniń názerinde jawız bolǵan islerdi isledi. Ákesi Ehoram ólgennen keyin, Axabtıń urpaqları oǵan keńesshi bolıp, onı qulawǵa alıp keldi. 5Axaziya olardıń másláhátine qulaq salıp, Izrail patshası Axab ulı Ioramǵa erip, Aram patshası Xazael menen urısıw ushın Giladtaǵı Ramotqa ketti. Aramlılar Ioramdı jaradar etti. 6Patsha Ioram Ramada, Aram patshası Xazael menen urısqanda, aramlılardan alǵan jaraqatın emletiw ushın Izreelge qayttı. Yahuda patshası Ehoram ulı Axaziya da jaradar bolǵan Axab ulı Ioramdı kóriw ushın Izreelge keldi. 7Biraq Quday Axaziyanı Ioramdı kóriwge kelgende óltiriwdi sheship qoyǵan edi. Axaziya kelgennen keyin, Ioram menen birge Nimshiydiń ulı Ehudı qarsı alıwǵa shıqtı. Jaratqan Iye Ehudı maylap, Axabtıń úy-ishin joq qılıw ushın tańlaǵan edi. 8Ehu Axabtıń úy-ishi ústinen shıǵarılǵan húkimdi orınlap atırǵanda, Axaziyaǵa xızmet etip atırǵan Yahuda basshıları menen Axaziyanıń ájaǵalarınıń ullarına dus keldi hám olardı da óltirdi. 9Keyin ol Axaziyanı izley basladı. Ehudıń adamları Axaziyanı Samariyadaǵı jasırınǵan jerinen taptı hám onı Ehuǵa alıp kelip, sol jerde óltirdi. Keyin: «Bul ózin shın júrekten Jaratqan Iyege baǵıshlaǵan Ehoshafattıń ulı ǵoy!» – dep, onı jerledi. Solay etip, Axaziyanıń úy-ishinen patshalıq qılǵanday hesh kim qalmadı.Ataliyanıń patshalıqqa otırıwı
10Axaziyanıń anası Ataliya ulınıń óltirilgenin esitkende, Yahudadaǵı patsha tuqımınan bolǵanlardıń hámmesin qırıp taslawdı sheshti. 11Biraq patsha Ehoramnıń qızı Ehoshabat Axaziyanıń ulı Ioashtı patshanıń óltiriliwi kerek bolǵan ullarınıń arasınan alıp qashıp, tárbiyashısı menen birge jatatuǵın bólmege jasırıp tasladı. Usılayınsha, patsha Ehoramnıń qızı, ruwxaniy Ehoyadanıń hayalı, Axaziyanıń ógey qarındası bolǵan Ehoshabat balanı Ataliyadan jasırdı. Solay etip, Ataliya balanı óltire almadı. 12Ataliya el ústinen patshalıq etip turǵanda, bala Qudaydıń Úyinde olar menen altı jıl jasırın túrde jasadı.
Copyright information for
KaaIBT22L