2Ch 23 | KaaIBT22L | STEP | Ataliyanıń húkimdarlıǵınıń jetinshi jılı ruwxaniy Ehoyada kúshke tolıp, júzbasılar: Eroxam ulı Azariya, Ehoxanan ulı Ismayıl, Obid ulı Azariya, Adaya ulı Maaseya hám Zixriy ulı Elishafat penen kelisim dúzdi.

‏ 2 Chronicles 23

Ataliyaǵa qarsı bas kóteriw

1 Ataliyanıń húkimdarlıǵınıń jetinshi jılı ruwxaniy Ehoyada kúshke tolıp, júzbasılar: Eroxam ulı Azariya, Ehoxanan ulı Ismayıl, Obid ulı Azariya, Adaya ulı Maaseya hám Zixriy ulı Elishafat penen kelisim dúzdi. 2 Olar Yahudanı aralap shıǵıp, lebiyliler menen Izrail áwladlarınıń basshıların jıynadı hám Erusalimge alıp keldi. 3 Solay etip pútkil jámiyet Qudaydıń Úyinde patsha menen kelisim dúzdi. Ehoyada olarǵa bılay dedi:

– Jaratqan Iyeniń Dawıttıń urpaqlarına bergen wádesine muwapıq, patshanıń ulı patshalıq qılıwı kerek. 4 Endi sizler bılay isleysizler: Shabbat kúni xızmetke keletuǵın ruwxaniyler menen lebiylilerdiń úshten biri dárwazalardı qarawıllasın. 5 Úshten biri patshanıń sarayın, al qalǵan úshten biri Tiykar dárwazasın qorǵasın. Basqa adamlardıń hámmesi Jaratqan Iyeniń Úyiniń háwlisine jıynalsın. 6 Ruwxaniyler menen xızmettegi lebiylilerden basqa hesh kim Jaratqan Iyeniń Úyine kirmesin. Olar muxaddes bolǵanlıǵı sebepli, ol jerge kire aladı. Basqa adamlardıń hámmesi Jaratqan Iyeniń tapsırması boyınsha sırtta qalsın. 7 Lebiyliler quralların qolǵa alıp, patshanı qorshap tursın. Úyge kirgen hár bir adam óltirilsin. Patsha ishke kirgende de, shıqqanda da onıń janında bolıńlar.

8 Lebiyliler hám pútkil Yahuda xalqı ruwxaniy Ehoyadanıń hámme buyrıqların orınladı. Hár bir júzbası Shabbat kúni xızmetke túsetuǵın hám xızmetten shıǵatuǵın óziniń qol astındaǵı adamların alıp qaldı. Sebebi ruwxaniy Ehoyada toparlardıń hesh biriniń ketiwine ruxsat bermegen edi. 9 Ruwxaniy Ehoyada Qudaydıń Úyindegi patsha Dawıttan qalǵan nayzalardı, kishkene hám úlken qalqanlardı júzbasılarǵa tarattı. 10 Patshanı qorǵaw ushın Úydiń qublasınan arqasına deyin, qurbanlıq orınnıń hám Úydiń átirapına qurallı saqshılar qoydı. 11 Ehoyada hám onıń ulları patshanıń ulı Ioashtı sırtqa alıp shıǵıp, basına taj kiygizdi, qolına patshalıq nızamların berip, onı patsha dep járiyaladı. Onı maylap, patsha etip qoydı, keyin: «Jasasın patsha!» – dep qıshqırdı.

12 Ataliya juwırısqan hám patshanı alǵıslap baqırısqan xalıqtıń shawqımın esitip, Jaratqan Iyeniń Úyindegi jıynalǵan xalıqtıń janına keldi. 13 Qarasa, patsha Úydiń kireberisindegi óreniń janında, al áskerbasılar hám kárnayshılar onıń átirapında turǵan eken. Al pútkil úlke xalqı bolsa, quwanısh penen kárnay shalıp, qosıqshılar bolsa saz ásbaplarına qosılıp alǵıs-maqtaw qosıqların aytıp turǵan eken. Sonda Ataliya kiyimlerin jırtıp: «Qıyanet, qıyanet!» – dep baqırdı.

14 Ruwxaniy Ehoyada Ataliyanıń Jaratqan Iyeniń Úyinde óltiriliwin qálemegenlikten, áskerlerge juwapker júzbasılardı jiberip atırıp, olarǵa bılay dedi:

– Onı bul jerden sırtqa alıp shıǵıńlar hám oǵan ergen hár bir adamdı qılıshtan ótkizińler, – dedi.

15 Áskerler Ataliyanı tutıp aldı hám saraydıń At dárwazasına ákelip, sol jerde óltirdi.

Ruwxaniy Ehoyada kirgizgen ózgerisler

16 Xalıqtıń Jaratqan Iyeniń xalqı bolıwı ushın, Ehoyada ózi, pútkil xalıq hám patsha arasında kelisim dúzdi. 17 Sońınan pútkil xalıq Baaldıń butxanasına barıp, onı qıyrattı. Ondaǵı qurbanlıq orındı hám músinlerdi buzıp tasladı, al Baaldıń ruwxaniyi Mattandı qurbanlıq orınlardıń aldında óltirdi. 18 Keyin Ehoyada Jaratqan Iyeniń Úyiniń islerin alıp barıwdı lebiyli ruwxaniylerge tapsırdı. Olarǵa Dawıt belgilegen Jaratqan Iyeniń Úyiniń xızmetlerin orınlaw, Muwsanıń Nızamında jazılǵanlarǵa muwapıq, Jaratqan Iyege jandırılatuǵın qurbanlıqlar usınıw hám Dawıttıń buyrıǵına muwapıq, quwanıshlı túrde qosıq aytıw tapsırıldı. 19 Qanday sebep penen bolsa da, haram bolǵan adamnıń Jaratqan Iyeniń Úyine kirip ketpewi ushın, dárwazaǵa qarawıllar qoydı. 20 Sońınan Ehoyada júzbasılardı, aqsúyeklerdi, xalıq basshıların hám pútkil úlke xalqın ertip, patshanı Jaratqan Iyeniń Úyinen alıp shıqtı. Olar Joqarǵı dárwaza arqalı ótip, patshanı taxtqa otırǵızdı. 21 Pútkil úlke xalqı shadlıqqa bólenip, qala tınıshlanıp qaldı. Sebebi Ataliya qılısh penen óltirilgen edi.