‏ 2 Chronicles 24

Yahuda patshası Ioashtıń Ibadatxananı qayta qurıwı

1Ioash jeti jasında patsha bolıp, Erusalimde qırıq jıl patshalıq etti. Onıń anası beer-shebalı bolıp, atı Sibiya edi. 2Ioash ruwxaniy Ehoyadanıń kóziniń tirisinde Jaratqan Iyeniń názerinde tuwrı bolǵan islerdi isledi. 3Ehoyada Ioashqa eki hayal alıp berdi. Ioash olardan ul-qızlar kórdi.

4Aradan biraz waqıt ótkennen keyin, Ioash Jaratqan Iyeniń Úyin ońlawǵa qarar qıldı. 5Ol ruwxaniyler menen lebiylilerdi jıynap, olarǵa:

– Yahuda qalalarına barıp, pútkil Izrail xalqınan Qudayıńızdıń Úyin ońlaw ushın kelip túsetuǵın jıllıq salıqtı jıynap keliń. Bul isti tez orınlań, – dedi.

Biraq lebiyliler asıqpadı. 6Sonda patsha bas ruwxaniy Ehoyadanı shaqırtıp oǵan:

– Ne ushın siz lebiylilerdi Yahudadan hám Erusalimnen salıq jıynap keliwge jibermedińiz? Jaratqan Iyeniń qulı Muwsa hám Izrail jámiyeti bul salıqtı Kelisim shatırınıń qárejetleri ushın belgilep qoyǵan-ǵo, – dedi. 7Sebebi zalım hayal Ataliyanıń ulları Qudaydıń Úyine bastırıp kirip, hátte, ol jerdegi muxaddes nárselerdi de Baallar ushın qollanǵan edi.

8Patshanıń buyrıǵı boyınsha bir qutı islenip, qutı Jaratqan Iyeniń Úyiniń dárwazasınıń sırtına qoyıldı. 9Qudaydıń qulı Muwsanıń shólde Izrail xalqı ushın belgilegen salıǵın Jaratqan Iyege alıp keliw Yahuda hám Erusalim boylap járiyalandı. 10Barlıq hámeldarlar hám pútkil xalıq salıqtı quwanıshlı túrde alıp kelip, tolǵansha qutıǵa tasladı. 11Lebiyliler qutını patshanıń xızmetshilerine alıp keletuǵın edi. Olar qutınıń tolǵanın kórgende, patshanıń xatkerine hám bas ruwxaniydiń járdemshisine xabar beretuǵın edi. Olar da kelip, qutını bosatıp, keyin qaytadan ornına aparıp qoyatuǵın edi. Olar bárqulla solay isledi hám kóp pul jıynadı. 12Patsha hám Ehoyada bul pullardı Jaratqan Iyeniń Úyiniń islerin júrgiziw ushın qoyılǵan adamlarǵa berdi. Olar bul pullarǵa Jaratqan Iyeniń Úyin qayta tiklew ushın tas kesiwshilerdi hám aǵash ustaların, sonday-aq Úydi ońlaw ushın temir hám qolaǵa islew beretuǵın jumısshılardı jalladı.

13Jumısshılar ıqlas penen isledi hám isler olardıń qolında alǵa ilgeriledi. Qudaydıń Úyi dáslepki awhalına qaytıp, bekkemlendi. 14Olar islerin tamamlap, qalǵan pullardı patshaǵa hám Ehoyadaǵa alıp keldi. Bul pullarǵa Jaratqan Iyeniń Úyi ushın xızmette hám jandırılatuǵın qurbanlıqlar bergende qollanılatuǵın buyımlar, tostaǵanlar, basqa altın hám gúmis buyımlar islendi. Ehoyadanıń kóziniń tirisinde Jaratqan Iyeniń Úyinde hár kúni jandırılatuǵın qurbanlıqlar berilip bardı.

15Ehoyada mazmunlı ómir súrip, qartayıp, bir júz otız jasında dúnyadan ótti. 16Izrailda Quday hám Onıń Úyi ushın islegen xızmetleri esapqa alınıp, onıń denesi Dawıttıń qalasına patshalardıń qasına qoyıldı.

Ioashtıń zulımlıǵı

17Ehoyadanıń óliminen soń, Yahuda basshıları patshaǵa kelip, oǵan tájim etti. Patsha da olarǵa qulaq saldı. 18Olar ata-babalarınıń Qudayı Jaratqan Iyeniń Úyin tárk etip, kiyeli aǵashlarǵa hám butlarǵa tabına basladı. Olardıń gúnası sebepli, Yahuda hám Erusalimge Jaratqan Iyeniń ǵázebi keldi. 19Jaratqan Iye xalıqtı Ózine qaytarıw ushın payǵambarlar jibergen bolsa da, payǵambarlar olarǵa eskertken bolsa da, bári bir xalıq payǵambarlarǵa qulaq aspadı.

20Sonda Qudaydıń Ruwxı ruwxaniy Ehoyada ulı Zexariyanı biylep aldı. Zexariya xalıqtıń aldına shıǵıp, bılay dedi:

– Quday bılay deydi: «Nege buyrıqlarıma qarsı shıǵıp atırsızlar? Sizler tabısqa erise almaysızlar. Sebebi sizler Meni tárk ettińler, Men de sizlerdi tárk ettim».

21Biraq Zexariyaǵa qarsı til biriktirilip, patshanıń buyrıǵı menen Jaratqan Iyeniń Úyiniń háwlisinde ol tas boran qılıp óltirildi. 22Patsha Ioash Zexariyanıń ákesi Ehoyada kórsetken jaqsılıqlardı umıtıp, onıń ulın óltirdi. Zexariya jan berip atırıp:

– Jaratqan Iye bul islerińizdi kórip, esesin qaytarsın! – dedi.

23Sol jıldıń aqırında, Aram ordası Ioashqa hújim jasadı. Olar Yahuda hám Erusalimge kirip, xalıqtıń barlıq basshıların óltirdi, al alǵan oljalarınıń hámmesin Damaskke, óz patshasına jiberdi. 24Aram ordası kóp sanlı bolmasa da, Jaratqan Iye ózlerinen júdá úlken bolǵan ordanı olarǵa táslim etti. Óytkeni Yahuda xalqı ózleriniń ata-babalarınıń Qudayı Jaratqan Iyeni tárk etken edi. Solay etip, Ioash óz jazasın aldı. 25Aram áskerleri Ioashtı awır jaralanǵan halda taslap ketti. Sonda Ioashtıń xızmetkerleri ruwxaniy Ehoyadanıń ulınıń qanı ushın ósh almaqshı bolıp til biriktirdi hám Ioashtı óz tóseginde óltirdi. Onı Dawıttıń qalasına jerledi, biraq patshalardıń qábirine qoymadı. 26Ioashqa qarsı til biriktirgenler: ammon xalqınan Shimeat degen hayaldıń ulı Zabad hám moablı Shimrit degen hayaldıń ulı Ehozabad edi. 27Ioashtıń ulları haqqında maǵlıwmat, Ioashqa qarsı aytılǵan kóp sanlı payǵambarshılıqlar hám Qudaydıń Úyiniń ońlanıwı haqqındaǵı maǵlıwmatlar Patshalar kitabında jazılǵan. Ioashtıń ornına onıń ulı Amasiya patsha boldı.