‏ 2 Chronicles 25

Yahuda patshası Amasiya

1Amasiya patsha bolǵanda, jigirma bes jasında edi, ol Erusalimde jigirma toǵız jıl patshalıq etti. Onıń anası erusalimli bolıp, atı Ehoaddan edi. 2Amasiya Jaratqan Iyeniń názerinde tuwrı bolǵan islerdi islese de, olardı shın júrekten islemedi. 3Amasiya óziniń patshalıq biyligin bekkemlep alǵannan soń, ákesi Ioash patshanı óltirgen xızmetshilerdi óltirdi. 4Biraq Muwsanıń Nızam kitabında jazılǵanına say is tutıp, olardıń balaların óltirmedi. Onda Jaratqan Iye: «Balalarınıń gúnası ushın ákeler, ákeleriniń gúnası ushın balalar óltirilmesin. Hár bir adam óz gúnası ushın óltirilsin», ▼

▼ Nzm 24:16.

– dep buyırǵan edi.

5Amasiya Yahuda xalqın toplap, pútkil yahudalılar menen benyaminlilerge áwladları boyınsha mıńbasılar hám júzbasılar qoydı. Keyin jigirma hám onnan joqarı jastaǵılardı sanaqtan ótkerip, áskeriy xızmetke jaramlı hám nayza menen úlken qalqandı islete alatuǵın úsh júz mıń aǵla áskerdiń bar ekenin bildi. 6Bulardan tısqarı, júz talant gúmiske Izraildan júz mıń bahadır jawıngerdi jallap aldı.

7Sol arada Qudaydıń bir adamı Amasiyaǵa kelip bılay dedi:

– Taqsır! Izrail áskerleri siz benen birge barmasın, sebebi Jaratqan Iye izraillılar, yaǵnıy pútkil efrayımlılar menen birge emes. 8Jaqsısı, ózińiz barıp, iske kirisiń hám mártlershe urısıń. Bolmasa, Quday sizdi jeńiliske ushıratadı. Óytkeni Qudaydıń qollap quwatlawǵa da, jeńiliske ushıratıwǵa da kúshi jetedi.

9Amasiya Qudaydıń adamınan:

– Onda Izrail áskerleri ushın tólengen júz talant ne boladı? – dep soradı. Qudaydıń adamı oǵan:

– Jaratqan Iye sizge onnan da kóbiregin beriwi múmkin, – dep juwap berdi.

10Sonda Amasiya Efrayımnan kelgen áskerlerdi úylerine qaytarıp jiberdi. Olardıń Yahuda xalqına degen ǵázebi lawladı hám ǵázepke tolıwı menen úylerine qaytıp ketti.

11Amasiya mártlik etip, óz áskerlerin Duz oypatlıǵına alıp bardı hám ol jerde Seirdiń adamlarınan on mıńın óltirdi. 12Yahuda áskerleri olardıń jáne on mıńın tutqınǵa alıp, olardı jartastıń tóbesine alıp shıqtı hám ol jerden tómenge iyterip jiberdi. Olardıń hámmesi bólek-bólek boldı. 13Sol arada Amasiya ózi menen urısqa barıwǵa ruxsat bermey izine qaytarıp jibergen áskerler Samariya menen Beyt-Xoron aralıǵındaǵı Yahuda qalalarına hújim qıldı. Olar úsh mıń adamdı óltirip, kóp olja alıp ketti.

14Amasiya edomlılardı qırıp qaytıp kelgende, Seir xalqınıń butların ózi menen birge alıp keldi. Ol bul butlardı ózine quday etip qoydı hám olarǵa tabınıp, qurbanlıqlar berdi. 15Sonda Amasiyaǵa Jaratqan Iyeniń ǵázebi lawladı hám oǵan bir payǵambardı jiberdi. Payǵambar patshaǵa:

– Óz xalqın seniń qolıńnan qutqara almaǵan sol xalıqtıń qudaylarına ne ushın júz burdıńız? – dey bergende, 16Amasiya onıń gápin bólip:

– Qashannan beri sen patshanıń másláhátshisi bolıp qaldıń?! Únińdi óshir! Bolmasa janıńdı alaman, – dedi.

Payǵambardıń sózi awzında qaldı, biraq sońınan:

– Siz usılay etip, meniń sózlerime qulaq salmaǵanıńız ushın, Qudaydıń sizdi joq qılıwdı qarar etkenin bilemen, – dedi.

17Yahuda patshası Amasiya keńesgóyleri menen másláhátleskennen soń, Ehudıń aqlıǵı Ehoaxazdıń ulı Izrail patshası Ehoashqa xabarshılar jiberip: «Kel, jekpe-jek alısayıq», – dep shaqırıq tasladı.

18Izrail patshası Ehoash ta Yahuda patshası Amasiyaǵa mınaday juwap jiberdi: «Lebanon tawlarındaǵı shat tiken sol jerdegi kedrge: „Qızıńdı meniń ulıma hayallıqqa ber“, – dep xabar jiberipti. Biraq Lebanon tawlarındaǵı bir jabayı haywan sol jerden ótip baratırıp, shat tikendi jenship ketipti. 19Edomlılardı jeńdim dep, maqtanıp, kókiregiń kóterilip ketipti. Jaqsısı, úyińde otır! Jánjel baslawdıń ne keregi bar? Ózińniń de, Yahudanıń da basın bálege qaldırajaqsań».

20Degen menen, Amasiya qulaq aspadı. Bul Qudaydıń isi edi. Amasiyanıń Edomnıń qudaylarına tabınǵanı ushın, Quday olardı dushpannıń qolına beriwge qarar qılǵan edi. 21Izrail patshası Ehoash Yahuda patshası Amasiyaǵa qarsı júris qılıp, olar Yahudanıń Beyt-Shemesh qalasında júzbe-júz keldi. 22Yahudalılar izraillılar tárepinen qıyratılıp, úylerine qaray qashtı. 23Izrail patshası Ehoash Ehoaxazdıń aqlıǵı Ioashtıń ulı Yahuda patshası Amasiyanı Beyt-Shemeshte tutqınǵa alıp, onı Erusalimge alıp keldi. Ehoash Erusalim diywalınıń Efrayım dárwazasınan Múyesh dárwazasına shekemgi tórt júz shıǵanaq aralıǵın qulatıp tasladı. 24Ol Qudaydıń Úyindegi Obed-Edomnıń juwapkershiligi astındaǵı hámme altın hám gúmislerdi, hámme buyımlardı, patsha sarayındaǵı qaznanı, jáne de, kepilge qoyılatuǵın tutqınlardı alıp, Samariyaǵa qaytıp ketti.

Yahuda patshası Amasiyanıń ólimi

25Yahuda patshası Ioash ulı Amasiya Izrail patshası Ehoaxaz ulı Ehoashtıń óliminen soń, on bes jıl ómir súrdi. 26Amasiyanıń basqa isleri, basınan aqırına shekem Yahuda hám Izrail patshalarınıń jılnama kitabında jazılǵan. 27Amasiya Jaratqan Iyeden bas keshken kúnnen baslap, Erusalimde oǵan qarsı til biriktirile basladı. Ol Laxishke qashtı. Biraq til biriktiriwshiler Amasiyanıń izinen Laxishke adam jiberip, onı sol jerde óltirtti. 28Olar Amasiyanıń denesin atqa artıp, alıp keldi hám ol Dawıttıń qalasına, ata-babalarınıń janına jerlendi.