2Ch 26 | KaaIBT22L | STEP | Bunnan keyin, Yahudanıń pútkil xalqı on altı jasar Uzziyanı ákesi Amasiyanıń ornına patsha etip qoydı.

‏ 2 Chronicles 26

Yahuda patshası Uzziya

1 Bunnan keyin, Yahudanıń pútkil xalqı on altı jasar Uzziyanı ^{▼▼ Uzziya – onıń basqa atı Azariya.} ákesi Amasiyanıń ornına patsha etip qoydı. 2 Ákesi Amasiyanıń óliminen keyin, Elat qalasın Yahudaǵa qaytarıp alıp, onı qaytadan qurǵan usı Uzziya edi. 3 Uzziya on altı jasında taxtqa otırıp, Erusalimde eliw eki jıl patshalıq etti. Onıń anası erusalimli bolıp, atı Exoliya edi. 4 Uzziya da ákesi Amasiyaǵa uqsap, Jaratqan Iyeniń názerinde tuwrı bolǵan islerdi isledi. 5 Ózine Qudaydan qorqıwdı úyretken Zexariyanıń kóziniń tirisinde Uzziya Qudayǵa umtılıp jasadı. Ol Jaratqan Iyege umtılıp jasaǵanında, Quday onı tabıslı qıldı.

6 Uzziya filistlerge urıs ashıp, Gat, Yabne hám Ashdod qalalarınıń diywalların qulattı. Keyin Ashdod janına hám filistlerge qaraslı basqa jerlerge qalalar qurdı. 7 Filistlerge, Gur-Baalda jasaytuǵın arablarǵa hám meunimlilerge qarsı urısta Quday oǵan járdem berdi. 8 Ammonlar Uzziyaǵa salıq tóleytuǵın boldı. Onıń kúsheygenligi sonshelli, dańqı Mısır shegaralarına deyin jetti.

9 Uzziya Erusalimde Múyesh dárwazasınıń, Oypatlıq dárwazasınıń hám diywallardıń múyeshleriniń ústine minaralar qurıp, olardı bekkemledi. 10 Ol shólge de minaralar qurǵızdı, kóplegen suw saqlaǵıshlar qazdırdı. Sebebi onıń batıstaǵı taw eteklerinde hám tegislikte baǵılıp atırǵan malları kóp edi. Al tawlarda hám ónimdar jerlerde diyxanları menen júzim ósiriwshi baǵmanları miynet etti. Uzziya diyxanshılıqtı súydi.

11 Uzziyanıń toparlarǵa bólinip, hárdayım urısqa tayar turǵan láshkerleri bar edi. Olardı dizimge alıp, toparlarǵa bóliw isin patshanıń wázirlerinen biri Xananiyanıń basshılıǵında xatker Eiel hám qadaǵalawshı Maaseya alıp bardı. 12 Bul márt jawıngerlerge jetekshilik etetuǵın áwlad basshılarınıń ulıwma sanı eki mıń altı júz edi. 13 Olardıń qol astında urısqa jaramlı úsh júz jeti mıń bes júz ásker bolıp, patshaǵa dushpanlarına qarsı urısıwda járdem beretuǵın úlken kúsh edi. 14 Uzziya pútkil ordanı qalqan, nayza, duwlıǵa, sawıt, oq jay hám saqpannıń tasları menen támiyinledi. 15 Ol Erusalimdegi minaralar ústine hám qala diywalınıń múyeshlerine óziniń alımları oylap tapqan oq atatuǵın hám úlken taslardı ılaqtıratuǵın urıs quralların ornattı. Onıń dańqı alıslarǵa jayıldı. Ol Qudaydan úlken járdem alǵanlıqtan, qúdiretli patshaǵa aylandı.

16 Degen menen, Uzziyanıń qúdiretli bolıwı, onıń menmensip qulawına alıp keldi. Ol Qudayı Jaratqan Iyege degen sadıqlıǵın buzıp, tútetki tútetiletuǵın orında tútetki tútetiw ushın, Jaratqan Iyeniń Ibadatxanasına kirdi. 17 Ruwxaniy Azariya menen Jaratqan Iyeniń seksen batır ruwxaniyi patshanıń izinen ishke kirip, 18 patshanıń jolın tosıp, oǵan bılay dedi:

– Uzziya, Jaratqan Iyege arnap tútetki tútetiwge haqıńız joq! Tútetki tútetiw – bul Xaron urpaqlarınan bolǵan baǵıshlanǵan ruwxaniylerdiń isi. Muxaddes mákannan shıǵıp ketiń! Siz jınayatqa qol urdıńız. Quday Iye de bul isińizdi maqullamaydı.

19 Tútetki tútetiw ushın, xosh iyisli zatlar salınǵan tabanı qolına uslap turǵan Uzziya ruwxaniylerge qattı ashıwlandı. Sol waqıtta-aq, olardıń kóz aldında Uzziyanıń mańlayında jaman teri keselliginiń daǵı payda boldı. Bul Jaratqan Iyeniń Úyindegi tútetki tútetiletuǵın orın janında júz bergen edi. 20 Bas ruwxaniy Azariya hám barlıq ruwxaniyler patshaǵa qaraǵanda, onıń mańlayında jaman teri keselligi payda bolǵanın kórdi hám onı sırtqa shıǵarıwǵa asıqtı. Patshanıń ózi de Jaratqan Iyeniń jazasına jolıqqanın túsinip, ol jerden ketiwge asıqtı. 21 Ol bir ómir jaman teri keselliginen qutıla almadı. Sonlıqtan ol Jaratqan Iyeniń Úyine kire almay, bólek bir úyde jasadı. Saraydı hám úlke xalqın onıń ulı Iotam basqardı. 22 Uzziyanıń basqa islerin basınan aqırına deyin, Amos ulı payǵambar Iyshaya jazıp qaldırǵan. 23 Uzziya ólip, ata-babalarına qosılǵanda, jaman teri keselligi menen awırǵanlıǵı sebepli, patshalar qoyılatuǵın qábirge emes, al onıń qasındaǵı atızǵa jerlendi. Onıń ornına ulı Iotam patsha boldı.