2Ch 27 | KaaIBT22L | STEP | Iotam jigirma bes jasında patsha boldı hám Erusalimde on altı jıl patshalıq etti. Onıń anasınıń atı Erusha bolıp, ol Sadoq degen adamnıń qızı edi.

‏ 2 Chronicles 27

Yahuda patshası Iotam

1 Iotam jigirma bes jasında patsha boldı hám Erusalimde on altı jıl patshalıq etti. Onıń anasınıń atı Erusha bolıp, ol Sadoq degen adamnıń qızı edi. 2 Iotam da ákesi Uzziyaǵa uqsap, Jaratqan Iyeniń názerinde tuwrı bolǵan islerdi isledi. Onıń ákesinen ayırmashılıǵı, ol Jaratqan Iyeniń Ibadatxanasına bastırıp kirmedi. Degen menen, xalıq jawızlıqların dawam ete berdi. 3 Iotam Jaratqan Iyeniń Úyiniń joqarǵı dárwazasın saldırdı hám qala diywalınıń Ofel tóbeshigindegi bólegin ońlap, úlken jumıslar isledi. 4 Bunnan tısqarı, patsha Yahudanıń tawlı úlkesine bir qansha qalalar qurdırdı, toǵaylıqlarǵa qorǵanlar menen minaralar saldırdı. 5 Ol ammonlardıń patshası menen urısıp, jeńiske eristi. Sol jılı ammonlar Iotamǵa salıq retinde júz talant gúmis, on mıń kor biyday hám on mıń kor arpa tóledi. Ekinshi, úshinshi jılı da olar solay isledi. 6 Iotam Qudayı Jaratqan Iyege boysınıp jasaǵanı ushın, qúdiretli patshaǵa aylandı.

7 Iotamnıń basqa isleri, júrgizgen barlıq urısları hám basqa is-háreketleri Izrail hám Yahuda patshalarınıń jılnama kitabında jazılǵan. 8 Iotam jigirma bes jasında patsha boldı hám Erusalimde on altı jıl patshalıq etti. 9 Iotam ólip, ata-babalarına qosıldı hám Dawıttıń qalasına jerlendi. Onıń ornına ulı Axaz patsha boldı.