2Ch 28 | KaaIBT22L | STEP | Axaz jigirma jasında patsha bolıp, Erusalimde on altı jıl patshalıq etti. Ol babası Dawıtqa uqsamadı, Jaratqan Iyeniń názerinde tuwrı bolǵan islerdi islemedi.

‏ 2 Chronicles 28

Yahuda patshası Axaz

1 Axaz jigirma jasında patsha bolıp, Erusalimde on altı jıl patshalıq etti. Ol babası Dawıtqa uqsamadı, Jaratqan Iyeniń názerinde tuwrı bolǵan islerdi islemedi. 2 Axaz Izrail patshalarınıń jolınan júrdi. Hátte, Baallarǵa tabınıw ushın quyma but músinlerin isletti. 3 Ol Ben-Hinnom oypatlıǵında qurbanlıqlar jandırdı, hátte, Jaratqan Iye Izrail xalqınıń aldınan quwıp jibergen milletlerdiń jerkenishli dástúrlerine eliklep, óz ulın otqa jaǵıp qurban etti. 4 Ol sıyınıw orınlarında, tóbeshiklerde hám hár bir qoyıw japıraqlı terektiń astında qurbanlıqlar berip, tútetkiler tútetti.

5 Sol sebepli Qudayı Jaratqan Iye Axazdı Aram patshasınıń qolına berdi. Aramlılar onı jeńip, xalqınan kóp adamlardı tutqın etip, Damaskke alıp ketti.

Bunnan tısqarı, onı Izrail patshasınıń da qolına berdi. Izrail patshası Axazdı úlken qırǵınǵa ushırattı. 6 Izrail patshası Remaliya ulı Peqax bir kúnde Yahuda áskerlerinen bir júz jigirma mıń bahadır jawıngerdi óltirdi. Sebebi olar ata-babalarınıń Qudayı Jaratqan Iyeni tárk etken edi. 7 Efrayımlı Zixriy atlı batır ásker patshanıń ulı Maaseyanı, saray basqarıwshısı Azriqamdı hám patshanıń bas wáziri Elqananı óltirdi. 8 Izraillılar ózleriniń tuwısqanı bolǵan yahudalılardan eki júz mıń hayal hám balalardı tutqın qılıp, kóp olja menen birge Samariyaǵa alıp ketti.

9 Samariyada Jaratqan Iyeniń Oded atlı payǵambarı bar edi. Ol qaytıp kiyatırǵan láshkerlerdiń aldınan shıǵıp, olarǵa bılay dedi:

– Ata-babalarıńızdıń Qudayı Jaratqan Iye Yahuda xalqına ǵázeplengeni ushın olardı sizlerge táslim etti. Biraq sizlerdiń olardı qanday qáhárge minip qırǵanıńız aspanǵa jetip bardı. 10 Bul az bolǵanday, endi bolsa Yahuda hám Erusalim turǵınların ózlerińizge qul qılmaqshısız. Ózlerińiz ne, Qudayıńız Jaratqan Iyege hesh gúna qılmadıńız ba? 11 Sonlıqtan maǵan qulaq salıp, tutqınǵa alǵan tuwısqanlarıńızdı izge qaytarıńlar! Óytkeni, Jaratqan Iyeniń lawlaǵan ǵázebi ústińizge dónip tur!

12 Sonda Efrayım xalqınıń ayırım kósemleri: Ehoxanan ulı Azariya, Meshillemot ulı Berexiya, Shallum ulı Xizkiya hám Xadlay ulı Amasa urıstan qaytqanlarǵa qarsı turıp:

13 – Tutqınlardı bul jerge alıp kelmeńler. Bizler Jaratqan Iyeniń aldında ayıplı bolıp qalamız. Yamasa gúna hám ayıplarımızdı jáne de kóbeytiwdi qáleysizler me? Onısız da ayıplarımız kóp, Jaratqan Iyeniń lawlaǵan ǵázebi Izraildıń ústine dónip tur, – dedi.

14 Sonda áskerler tutqınlar menen oljalardı kósemler menen pútkil jıyın turǵan jerge qaldırıp ketti. 15 Joqarıda atı atalǵan tórt kósem orınlarınan turıp, tutqınlarǵa ǵamxorlıq etti. Olardıń kiyimi joqlarına oljadaǵı kiyimlerden alıp, kiyim kiygizdi, ayaq kiyim berdi, ishkizip-jegizdi, jaralarına may jaqtı. Haldan tayǵanların eshekke mingizip, hámmesin palma aǵashları ósetuǵın Erixo qalasındaǵı aǵayinlerine alıp bardı. Keyin ózleri Samariyaǵa qayttı.

16 Sol arada patsha Axaz Assiriya patshasına elshi jiberip, járdem soradı. 17 Sebebi edomlılar qaytadan Yahudaǵa hújim jasap, adamların tutqın etip, alıp ketken edi. 18 Bunıń ústine, filistler Yahudanıń batısındaǵı taw eteklerindegi hám qublasındaǵı qalalarǵa shabıwıl jasap, Beyt-Shemesh, Ayyalon, Gederot qalaların, sonday-aq Soxo, Timna, Gimzo qalaların átirapındaǵı awılları menen qosa basıp alıp, ol jerlerge qonıslanıp aldı. 19 Jaratqan Iye Yahudanı patshası Axazdıń kesirinen ayaq astı qıldı. Axaz Yahudanı gúnaǵa baslap, ózi de Jaratqan Iyege opasızlıq etken edi.

20 Solay etip, Assiriya patshası Tilgat-Pilneser ^{▼▼ Tilgat-Pilneser – kóbinese «Tiglat-Pileser» dep jazılǵan.} Axazǵa keldi. Biraq ol járdem beriwdiń ornına, onı qısqıǵa ala basladı. 21 Axaz Jaratqan Iyeniń Úyindegi, óziniń sarayındaǵı hám hákimleriniń úylerindegi bahalı nárselerdi alıp, Assiriya patshasına salıq retinde berdi. Biraq bul da oǵan járdem bermedi.

22 Awır kúnlerdi basınan keshirip atırsa da, Axaz Jaratqan Iyege degen opasızlıǵın burınǵıdan da kúsheytti. Awa, ol – patsha Axaz-dá! 23 Ol: «Aram patshalarınıń qudayları olarǵa járdem berip kelmekte. Endi olarǵa qurbanlıq bersem, olar da maǵan járdem berer», – dep oylap, ózin jeńiliske ushıratqan Damask qalasınıń qudaylarına qurbanlıqlar berdi. Biraq, tilekke qarsı, olar Axazdıń óziniń hám pútkil Izraildıń qulawına sebepshi boldı.

24 Axaz Qudaydıń Úyindegi buyımlardı jıynap, maydaladı. Jáne, Jaratqan Iyeniń Úyiniń qapıların japtırıp tasladı hám Erusalim kósheleriniń hár bir múyeshine qurbanlıq orınlar qurdırdı. 25 Ol basqa qudaylarǵa arnap tútetkiler tútetiw ushın, Yahudanıń hár bir qalasına sıyınıw orınların qurıp, ata-babalarınıń Qudayı Jaratqan Iyeni ǵázeplendirdi. 26 Axazdıń basqa isleri hám barlıq is-háreketleri bastan ayaǵına shekem Yahuda hám Izrail patshalarınıń jılnama kitabında jazılǵan. 27 Axaz ólip, ata-babalarına qosıldı hám Erusalim qalasında jerlendi. Biraq onı Izrail patshalarınıń mazarına qoymadı. Onıń ornına ulı Xizkiya patsha boldı.