2Ch 29 | KaaIBT22L | STEP | Xizkiya jigirma bes jasında patsha bolıp, Erusalimde jigirma toǵız jıl patshalıq etti. Onıń anasınıń atı Abiya bolıp, ol Zexariyanıń qızı edi.

‏ 2 Chronicles 29

Yahuda patshası Xizkiya

1 Xizkiya jigirma bes jasında patsha bolıp, Erusalimde jigirma toǵız jıl patshalıq etti. Onıń anasınıń atı Abiya ^{▼▼ Abiya – yamasa Abiy. 4Pat 18:2.} bolıp, ol Zexariyanıń qızı edi. 2 Ol da atası Dawıtqa uqsap, Jaratqan Iyeniń názerinde tuwrı bolǵan islerdi isledi.

Xizkiyanıń Ibadatxananı páklewi

3 Xizkiya óz patshalıǵınıń birinshi jılınıń birinshi ayında Jaratqan Iyeniń Úyiniń qapıların ashıp, olardı dúzettirdi. 4 Sońınan ruwxaniyler menen lebiylilerdi shaqırtıp, Úydiń shıǵıs tárepindegi maydanǵa jıynadı hám 5 olarǵa bılay dedi:

– Lebiyliler, meni tıńlańlar! Ózlerińizdi tazalanıw rásiminen ótkerip, páklenińler, ata-babalarıńızdıń Qudayı Jaratqan Iyeniń Úyin da pákleńler! Haram nárselerdi bul Muxaddes orınnan shıǵarıp taslańlar! 6 Ata-babalarımız opasızlıq qılıp, Qudayımız Jaratqan Iyeniń názerinde jawız bolǵan islerdi isledi hám Onı tárk etti. Olar Jaratqan Iyeniń qonısınan júz burıp, Oǵan arqasın qarattı. 7 Olar Ibadatxana aywanınıń qapıların jawıp taslap, shıraların da óshirip qoydı. Izraildıń Qudayınıń Muxaddes ornında tútetkiler de tútetpey, jandırılatuǵın qurbanlıqlardı da usınbay qoydı. 8 Sol sebepli, Yahuda menen Erusalim Jaratqan Iyeniń ǵázebine ushıradı. Óz kózlerińiz benen kórgenińizdey, Jaratqan Iyeniń olarǵa islegenleri basqalardıń húreyin ushıratuǵın, qorqınıshlı hám jandı túrshiktiretuǵın kóriniske aylandı. 9 Qarańlar, sonlıqtan ákelerimiz qılıshtan qaza taptı, ul-qızlarımız benen hayallarımız tutqında júr. 10 Endi men bizlerge degen lawlaǵan ǵázebinen qaytıwı ushın, Izraildıń Qudayı Jaratqan Iye menen kelisim dúziwdi qáleymen. 11 Balalarım, biypárwa bolmańlar! Sebebi Jaratqan Iye sizlerdi Óziniń aldında turıp xızmet etiwińiz hám qurbanlıqlar jaǵıwıńız ushın tańlap alǵan edi.

12 Sonda mına lebiyliler xızmetti basladı: Qohat urpaǵınan: Amasay ulı Maxat, Azariya ulı Ioel;
Merariy urpaǵınan: Abdiy ulı Kish, Ehallelel ulı Azariya;
Gershon urpaǵınan: Zimma ulı Ioax, Ioax ulı Eden;
13 Elisafan urpaǵınan: Shimriy hám Eiel;
Asaf urpaǵınan: Zexariya hám Mattaniya;
14 Heman urpaǵınan: Exiel hám Shimey;
Edutun urpaǵınan: Shemaya hám Uzziel.

15 Bul lebiyliler tuwısqanların jıynap alıp, pákleniw rásiminen ótti. Sońınan patshanıń buyrıǵı boyınsha, Jaratqan Iyeniń sózine muwapıq, Onıń Úyin páklewge keldi. 16 Ruwxaniyler Jaratqan Iyeniń Úyin páklew ushın ishke kirip, onnan tapqan haram nárselerdiń bárin háwlige shıǵardı. Lebiyliler olardı alıp, Kidron sayına aparıp tasladı. 17 Olar birinshi aydıń birinshi kúni páklewdi baslap, sol aydıń segizinshi kúni Jaratqan Iyeniń Úyiniń aywanına jetti. Olar jáne segiz kún Úydiń ózin pákledi hám birinshi aydıń on altınshı kúni páklew isin juwmaqladı.

18 Sońınan patsha Xizkiyaǵa barıp:

– Bizler Jaratqan Iyeniń Úyin, jandırılatuǵın qurbanlıqlar beriletuǵın orındı hám oǵan tiyisli hámme nárselerdi, usınılǵan nanlar qoyılatuǵın stoldı hám oǵan tiyisli barlıq nárselerdi tolıq pákledik. 19 Axaz patshanıń óz húkimdarlıǵı waqtında Qudayǵa biyopalıq etip, shıǵarıp taslaǵan nárselerin tayarlap, pákledik. Olar házir Jaratqan Iyeniń qurbanlıq ornınıń janında tur, – dedi.

Jaratqan Iyeniń Úyindegi xızmettiń tikleniwi

20 Erteńine patsha Xizkiya erte turıp, qala hákimlerin jıynadı hám olardı ertip, Jaratqan Iyeniń Úyine jol aldı. 21 Olar patshalıq, Muxaddes mákan hám Yahuda xalqı ushın gúnaların ótew qurbanlıǵı etip jeti buǵa, jeti qoshqar, jeti toqlı hám jeti teke alıp keldi. Patsha Xaron urpaqlarınan bolǵan ruwxaniylerge bulardı Jaratqan Iyeniń qurbanlıq ornı ústinde qurbanlıqqa beriwdi buyırdı.

22 Ruwxaniyler dáslep buǵalardı shalıp, qanın qurbanlıq orınǵa septi. Sońınan qoshqarlardı shalıp, qanın qurbanlıq orınǵa septi, keyin toqlılardı shalıp, qanın qurbanlıq orınǵa septi. 23 Aqırında, gúna qurbanlıǵı ushın berilgen tekelerdi patsha menen pútkil jámiyettiń aldına alıp keldi. Olar tekelerdiń ústine qolların qoydı. 24 Keyin ruwxaniyler tekelerdi shalıp, qanın pútkil Izrail xalqınıń gúnalardan pákleniwi ushın, gúnanıń qunı retinde qurbanlıq orınǵa septi. Sebebi patsha jandırılatuǵın qurbanlıqlar hám gúna qurbanlıqları pútkil Izrail xalqı ushın berilsin, dep buyırǵan edi. 25 Sońınan patsha Dawıttıń, onıń wáliyi Gadtıń hám payǵambarı Natannıń kórsetpesine muwapıq, lebiylilerge kimbal, arfa hám lira berip, olardı Jaratqan Iyeniń Úyine ornalastırdı. Usılay islewdi Jaratqan Iye Óz payǵambarları arqalı buyırǵan edi. 26 Lebiyliler Dawıttıń saz ásbapları menen, ruwxaniyler kárnaylar menen óz orınların iyeledi. 27 Xizkiya jandırılatuǵın qurbanlıqtı qurbanlıq orında usınıwdı buyırdı. Qurbanlıqlar jandırıla baslaǵanda, kárnaylarǵa hám Izrail patshası Dawıttıń saz ásbaplarına qosılıp, Jaratqan Iyege arnap qosıqlar aytıla basladı. 28 Qurbanlıq jandırılıp bolınǵansha, pútkil jıynalǵanlar tájim etip, qosıqshılar qosıq aytıp, kárnayshılar kárnayların shertip turdı. 29 Qurbanlıq beriw tamam bolǵanda, patsha hám onıń janındaǵılar dizelerin búgip, sıyındı. 30 Patsha Xizkiya hám onıń xızmetshileri lebiylilerge Dawıttıń hám wáliy Asaftıń sózleri menen Jaratqan Iyege alǵıs-maqtaw aytıwdı buyırdı. Olar quwanısh penen alǵıs-maqtaw ayttı, sıyındı hám tájim etti.

31 Keyin Xizkiya:

– Mine, sizler ózlerińizdi Jaratqan Iyege baǵıshladıńlar. Endi jaqınıraq kelip, Jaratqan Iyeniń Úyine qurbanlıqlar hám minnetdarshılıq qurbanlıqların alıp kelińler, – dedi.

Sonda jıynalǵanlar qurbanlıqlar hám minnetdarshılıq qurbanlıqların berdi. Ayırım qálewshiler bolsa, jandırılatuǵın qurbanlıqlar alıp keldi. 32 Xalıq alıp kelgen jandırılatuǵın qurbanlıqlardıń ulıwma sanı mınaday boldı: jetpis buǵa, júz qoshqar, eki júz toqlı. Bulardıń hámmesi Jaratqan Iyege arnap jandırıw ushın alıp kelingen edi. 33 Basqa muxaddes qurbanlıqlar ushın da altı júz bas iri mal, úsh mıń bas mayda mal da alıp kelindi. 34 Biraq ruwxaniyler dım az bolǵanlıqtan, jandırılatuǵın qurbanlıqlardı terisinen ayırıp úlgere almay atırǵan edi. Sol sebepli is tamam bolǵansha hám basqa ruwxaniyler pákleniw rásiminen ótip bolǵansha, lebiyli tuwısqanları olarǵa járdem berdi. Sebebi lebiyliler pákleniw rásimine ruwxaniylerge qaraǵanda itibarlıraq edi. 35 Tatıwlıq qurbanlıqlarınıń mayı hám jandırılatuǵın qurbanlıqlar hám onıń menen beriletuǵın ishimlik sadaqaları mol boldı.

Usılayınsha Jaratqan Iyeniń Úyiniń xızmeti qayta tiklendi. 36 Xizkiya hám pútkil xalıq Qudaydıń xalıq ushın islegen islerine quwandı. Sebebi bul is qısqa waqıt ishinde júz berdi.